ఆంధ్రప్రదేశ్ రాజధాని అమరావతి కేవలం పరిపాలనకే పరిమితం కాకుండా, భవిష్యత్తులో దక్షిణ భారతదేశానికే ఒక ప్రధాన లాజిస్టిక్ హబ్ (రవాణా కేంద్రం)గా మారబోతోంది. దీనిని సాకారం చేసే దిశగా రాష్ట్ర ప్రభుత్వం ఒక భారీ రహదారి ప్రాజెక్టును తెరపైకి తెచ్చింది. ఖరగ్పూర్ (పశ్చిమ బెంగాల్) నుండి అమరావతి వరకు అత్యంత వేగంగా చేరుకునేలా 'యాక్సెస్ కంట్రోల్డ్ గ్రీన్ఫీల్డ్ హైవే' నిర్మాణానికి శ్రీకారం చుట్టింది.
ప్రస్తుతం కోల్కతా-చెన్నై మధ్య ఉన్న ఎన్హెచ్-16పై వాహనాల రద్దీ విపరీతంగా పెరిగిపోయింది. ఈ సమస్యకు పరిష్కారంగా, అమరావతికి ఉత్తర భారతదేశంతో నేరుగా కనెక్టివిటీని పెంచేందుకు ఈ కొత్త హైవే ఒక అద్భుతమైన ప్రత్యామ్నాయంగా నిలవనుంది.
ఖరగ్పూర్-కటక్-విశాఖపట్నం-అమరావతి యాక్సెస్ కంట్రోల్డ్ నూతన గ్రీన్ ఫీల్డ్ హైవేకు సంబంధించి డీపీఆర్ను రాష్ట్ర రోడ్డు, రవాణ శాఖ రూపొందిస్తోంది. దీనిని సాధ్యమైనంత త్వరగా కేంద్ర ఉపరితల, జాతీయ రహదారుల శాఖకు నివేదించి, ఆమోదం తీసుకొని టెండర్లు పిలవనుంది.
సుమారు 446 కిలోమీటర్ల మేర ప్రతిపాదించిన ఈ రోడ్డు ఎలైన్మెంట్తో సరుకు రవాణ సులభతరంగా మారుతుందని ప్రభుత్వం చెబుతోంది. ఈ ప్రతిపాదిత గ్రీన్ఫీల్డ్ హైవే అమరావతి అవుటర్ రింగురోడ్డుకు కూడా కనెక్టివిటీ ఉంటుంది.
ప్రస్తుతం కోల్కతా-చెన్నై ఎన్హెచ్-16 నానాటికి పెరిగిపోతున్న వాహనాల రద్దీని తట్టుకోలేకపోతున్నది. ఈ క్రమంలో అమరావతికి ఖరగ్పూర్, కటక్, విశాఖపట్నంతో కనెక్టివిటీని పెంచేందుకు ఈ గ్రీన్ఫీల్డ్ హైవే ఎంతగానో ఉపయోగపడుతుందని పేర్కొంటూ కేంద్రానికి నివేదించనున్నారు.
ఈ గ్రీన్ ఫీల్డ్ హైవే ఎలైన్మెంట్ను నూజివీడు, ఏలూరు, పోలవరం, అడ్డతీగల, చింతపల్లె, పాడేరు, సుంకి, పార్వతీపురం మన్యం మీదుగా కటక్, ఖరగ్పూర్ వరకు ప్రతిపాదించారు. ఎలైన్మెంట్లో కొన్ని మార్పులు, సవరణలు చేసి కేంద్రానికి నివేదించనున్నారు.
కాగా, ప్రస్తుతం ఒంగోలు-కత్తిపూడి మధ్యన ఎన్హెచ్-16కి ప్రత్యామ్నాయంగా ఉన్న ఒంగోలు-కత్తిపూడి వయా చీరాల జాతీయ రహదారిని నాలుగు వరుసలకు విస్తరించేందుకు రాష్ట్ర ప్రభుత్వం కేంద్రానికి ప్రతిపాదనలను పంపించింది. ఇది కూడా లాజిస్టిక్స్ రవాణాకు ఊతమిస్తుంది.
సామాన్య ప్రజలకు మరియు రైతులకు కలిగే లాభం..
ఈ భారీ ప్రాజెక్టులు కేవలం పరిశ్రమలకే కాదు, సామాన్యులకు కూడా ఎంతో మేలు చేస్తాయి:
పారిశ్రామికాభివృద్ధి: హైవే వెంబడి కొత్త పరిశ్రమలు, గోడౌన్లు ఏర్పడతాయి, తద్వారా స్థానిక యువతకు ఉపాధి లభిస్తుంది.
వ్యవసాయ ఉత్పత్తులు: పాడేరు, చింతపల్లి వంటి ప్రాంతాల్లో పండే కాఫీ, పండ్లు మరియు గిరిజన ఉత్పత్తులను త్వరగా మార్కెట్కు చేరవేయవచ్చు.
రియల్ ఎస్టేట్: రాజధాని చుట్టుపక్కల ప్రాంతాల్లో భూముల విలువ పెరిగి, అభివృద్ధి వేగవంతం అవుతుంది.
అమరావతిని ఒక అంతర్జాతీయ స్థాయి నగరంగా మార్చాలంటే దానికి రోడ్డు కనెక్టివిటీ ప్రాణం వంటిది. ఉత్తర-దక్షిణ కనెక్టివిటీని పెంచే ఈ గ్రీన్ఫీల్డ్ హైవే ఏపీ ఆర్థిక వ్యవస్థను మలుపు తిప్పే ఒక గేమ్ ఛేంజర్ (Game Changer). కేంద్రం నుంచి ఆమోదం లభించి టెండర్లు పిలిస్తే, రాబోయే ఐదేళ్లలో ఏపీ రవాణా ముఖచిత్రం పూర్తిగా మారిపోవడం ఖాయం.
