అమరావతి రాజధాని పరిధిలోని వడ్డమాను గ్రామంలో మంత్రి నారాయణ పర్యటించారు. ఈ సందర్భంగా గ్రామస్తులు ఆయనకు ఘన స్వాగతం పలికారు. స్థానిక ఎమ్మెల్యే శ్రావణ్ కుమార్తో కలిసి మంత్రి గ్రామానికి వెళ్లే ప్రధాన రహదారిని ప్రారంభించారు. ఈ రోడ్డు నిర్మాణం గ్రామస్తులకు ఎంతో ఉపయోగపడనుందని వారు ఆనందం వ్యక్తం చేశారు.
రైతుల వినతికి స్పందించి కేవలం వారం రోజుల్లోనే రోడ్డు నిర్మాణాన్ని పూర్తి చేయించినట్లు మంత్రి నారాయణ తెలిపారు. గ్రామస్తులు అడిగిన వెంటనే పనులు ప్రారంభించి, రూ.98.7 లక్షల వ్యయంతో 1148 మీటర్ల పొడవైన రోడ్డును యుద్ధప్రాతిపదికన నిర్మించామని చెప్పారు. ప్రజల సమస్యలను త్వరితగతిన పరిష్కరించడమే ప్రభుత్వ లక్ష్యమని ఆయన స్పష్టం చేశారు.
అమరావతి రాజధానిని ప్రపంచంలోనే టాప్–5 రాజధానులలో ఒకటిగా అభివృద్ధి చేస్తామని మంత్రి నారాయణ ప్రకటించారు. ల్యాండ్ పూలింగ్ ద్వారా భూములు ఇచ్చిన రైతులకు ఎలాంటి ఇబ్బందులు లేకుండా చూసుకుంటామని, వారి హక్కులు, ప్రయోజనాలు పూర్తిగా కాపాడుతామని హామీ ఇచ్చారు. రాజధాని నిర్మాణం రైతుల సహకారంతోనే ముందుకు సాగుతుందని చెప్పారు.
రాజధాని పరిధిలోని 29 గ్రామాల్లో జనవరి నుంచి మౌలిక వసతుల పనులు ప్రారంభిస్తామని మంత్రి తెలిపారు. అన్ని గ్రామాల్లో రోడ్లు, అండర్గ్రౌండ్ డ్రైనేజీ వ్యవస్థ, వరద నీటి కాలువలు, వీధి లైట్లు ఏర్పాటు చేస్తామని వెల్లడించారు. ఈ పనులతో రాజధాని ప్రాంతంలో జీవన సౌకర్యాలు మరింత మెరుగుపడతాయని పేర్కొన్నారు.
ఇన్నర్ రింగ్ రోడ్, స్పోర్ట్స్ సిటీ, రైల్వే లైన్, రైల్వే ట్రాక్ వంటి కీలక ప్రాజెక్టులకు ల్యాండ్ పూలింగ్కే తొలి ప్రాధాన్యత ఇస్తామని మంత్రి నారాయణ స్పష్టం చేశారు. రైతులు స్వచ్ఛందంగా ముందుకు వస్తే ల్యాండ్ పూలింగ్ ద్వారానే భూములు సేకరిస్తామని, అది సాధ్యం కాకపోతేనే భూసేకరణపై నిర్ణయం తీసుకుంటామని తెలిపారు. రాజధాని అభివృద్ధి ప్రజల సమ్మతితోనే జరుగుతుందని ఆయన పేర్కొన్నారు.
