Malta TDP 44th Anniversary: మాల్టా తీరాన మిన్నంటిన టీడీపీ ఆవిర్భావ వేడుకలు.. సీఎం చంద్రబాబు విజన్‌పై ఎన్ఆర్ఐల ప్రశంసలు!

TDP 44th Anniversary: మధ్యధరా సముద్రం మధ్యలో ఉన్న ఒక అందమైన ద్వీప దేశం మాల్టా. యూరప్ ఖండంలో భాగమైన ఈ చిన్న దేశం తన చారిత్రక కట్టడాలు, అద్భుతమైన తీరప్రాంతం  ప్రశాంతమైన వాతావరణానికి ప్రపంచ ప్రసిద్ధి చెందింది. వైవిధ్యమైన సంస్కృతులకు నిలయమైన మాల్టాలో ఇటీవల కాలంలో తెలుగు వారి సంఖ్య గణనీయంగా పెరుగుతోంది. ఉపాధి, ఉన్నత చదువుల కోసం ఇక్కడికి వస్తున్న తెలుగు వారు తమ మూలాలను మర్చిపోకుండా, మన పండుగలను, రాజకీయ చైతన్యాన్ని అక్కడ కూడా చాటిచెబుతున్నారు.

ఈ నేపథ్యంలో ఎన్ఆర్ఐ-టిడిపి ఆధ్వర్యంలో మాల్టాలో తెలుగుదేశం పార్టీ 44వ ఆవిర్భావ దినోత్సవ వేడుకలను ఆదివారం అత్యంత వైభవంగా నిర్వహించారు. స్థానిక తెలుగు వారంతా ఒకచోట చేరి పార్టీ జెండాను ఎగురవేసి, కేక్ కట్ చేసి సంబరాలు చేసుకున్నారు. ఈ సందర్భంగా పార్టీ కార్యకర్తలు మాట్లాడుతూ, తెలుగుదేశం పార్టీ ఎప్పుడూ తన కేడర్‌కు, సామాన్య కార్యకర్తకు ఇచ్చే ప్రాధాన్యతను కొనియాడారు. క్రమశిక్షణ, సేవా దృక్పథమే ఈ పార్టీ మూలస్తంభాలని వారు ఈ వేదికగా గుర్తుచేశారు.

ముఖ్యంగా ఆంధ్రప్రదేశ్ ముఖ్యమంత్రి నారా చంద్రబాబు నాయుడు గారి అద్భుతమైన విజన్ గురించి గర్వంగా చర్చించుకున్నారు. చంద్రబాబు గారు కేవలం వర్తమానం గురించి కాకుండా, రాబోయే 20 ఏళ్ల భవిష్యత్తును ముందుగానే ఊహించగల ధీశాలి అని లత గారు అభివర్ణించారు.  గతంలో ఆయన వేసిన ఐటీ పునాదుల వల్లే నేడు ప్రపంచవ్యాప్తంగా తెలుగు వారు ఉన్నత స్థానాల్లో ఉన్నారని, ఇప్పుడు మళ్ళీ ఆయన నాయకత్వంలో ఆంధ్రప్రదేశ్ దేశంలోనే అత్యధిక టెక్నాలజీ కలిగిన రాష్ట్రంగా ఎదుగుతుందని  సత్యనారాయణ రాజు సాగి గారు ఆశాభావం వ్యక్తం చేశారు.

ఈ కార్యక్రమంలో ప్రముఖులు లత గారు, రవి సత్యనారాయణ రాజు సాగి గారు ముఖ్య పాత్ర  పోషించారు. వీరితో పాటు నరేష్ తలపనేని, అజర్, బ్రహ్మ చాగంటి, సుమంత్ పద్మల, గౌరవ్ జోషి  వారి కుటుంబ సభ్యులు, సుధీర్ రెడ్డి గారు, శ్రీనాథ్ మరియు ముళ్ళపూడి వంటి వారు చురుగ్గా పాల్గొన్నారు. ప్రతి ఒక్కరూ ఏపీ అభివృద్ధిలో తమ వంతు సహకారం అందిస్తామని, రాష్ట్రం మళ్ళీ పూర్వ వైభవం సంతరించుకోవాలని ఆకాంక్షించారు.

మాల్టా వంటి సుదూర ప్రాంతంలో ఉంటూ కూడా మాతృభూమి పట్ల, తమ అభిమాన నాయకుడి పట్ల చూపుతున్న ఈ ప్రేమ అందరినీ ఆకట్టుకుంది. "తెలుగుజాతి ఉన్నంతవరకు తెలుగుదేశం ఉంటుంది" అనే నినాదాలతో మాల్టా లో మారుమోగాయి. అందరికీ విందు భోజనం ఏర్పాటు చేయడంతో వేడుకలు ఘనంగా ముగిశాయి.