ఆస్ట్రేలియా ప్రధాన మంత్రి ఆంథోనీ అల్బనీస్ వ్యక్తిగత జీవితంలో కొత్త అధ్యాయం ప్రారంభమైంది. 62 ఏళ్ల వయసులో తన ప్రేయసి జోడీ హేడన్ను వివాహం చేసుకోవడం ద్వారా ఆయన అరుదైన రికార్డు సృష్టించారు. ప్రధాన మంత్రి హోదాలో ఉన్నప్పుడే పెళ్లి చేసుకున్న తొలి ఆస్ట్రేలియన్ నాయకుడిగా అల్బనీస్ చరిత్రలో నిలిచిపోయారు. రాజధాని కాన్బెర్రాలోని అధికారిక నివాసం ‘ది లాడ్జ్’ గార్డెన్లో శనివారం ఈ వివాహం సాదాసీదాగా, అత్యంత వ్యక్తిగతంగా జరగింది. కుటుంబ సభ్యులు, సన్నిహితులు మాత్రమే హాజరైన ఈ వేడుకలో వాతావరణం మాత్రం పూర్తిగా ఆప్యాయతతో నిండిపోయింది.
జోడీ హేడన్ తెల్లటి గౌనులో కాంతులీనగా కనిపించగా, అల్బనీస్ క్లాసిక్ బో-టైతో సాంప్రదాయిక శైలిలో మెరిశారు. వారి పెంపుడు కుక్క టోటో ప్రత్యేక ఆకర్షణగా నిలిచి రింగ్ బేరర్గా వ్యవహరించడం వేడుకకు భావోద్వేగ రంగు ఇచ్చింది. అతిథుల మధ్య నవ్వులు, కాగితాల వర్షం మధ్య నూతన దంపతులు చేతులు పట్టుకుని ముందుకు నడిచిన క్షణాలను అల్బనీస్ స్వయంగా సోషల్ మీడియాలో పంచుకోవడం ప్రపంచవ్యాప్తంగా మరింత చర్చనీయాంశమైంది.
హేడన్తో తన ప్రయాణం గత కొన్నేళ్లలో బలపడిందని, జీవితాంతం కలిసి నడవాలనే సంకల్పంతోనే ఈ నిర్ణయం తీసుకున్నానని అల్బనీస్ వెల్లడించారు. 2019లో తన మొదటి భార్యతో విడాకులు తీసుకున్న తర్వాత ఆయన జీవితం నిశ్శబ్దంగా కొనసాగినా, మెల్బోర్న్లో ఐదేళ్ల క్రితం జరిగిన ఒక వ్యాపార విందులో హేడన్ను కలుసుకోవడం వారి కథకు తొలి దశ అయింది. 2024 వాలెంటైన్స్ డే నాడు ప్రేమను వ్యక్తం చేయగా, హేడన్ అంగీకరించడంతో ఈ బంధం మరో మెట్టుకు ఎదిగింది. ఇప్పుడు వివాహం ద్వారా వారి జీవితాలు అధికారికంగా ఒకటయ్యాయి.
వివాహానంతరం మీడియాతో మాట్లాడుతూ, “మా ప్రేమకు, మా భవిష్యత్తు ప్రయాణానికి మద్దతుగా నిలిచిన మా కుటుంబ సభ్యులకు కృతజ్ఞతలు. ఈ రోజు మా జీవితంలో మరపురాని రోజు” అని నూతన దంపతులు పేర్కొన్నారు. తమ వివాహ శుభపరిణయానికి ప్రధాన మంత్రి నరేంద్ర మోదీ సహా అనేక ప్రపంచ నాయకుల నుంచి కూడా అభినందనలు అందాయి. ముఖ్యంగా మోదీ ఎక్స్ ప్లాట్ఫారమ్లో శుభాకాంక్షలు తెలియజేయడం భారత–ఆస్ట్రేలియా స్నేహబంధాన్ని మరోసారి ప్రతిబింబించింది.
ఇటీవలి ఎన్నికల్లో వరుస విజయాలతో ఆస్ట్రేలియన్ రాజకీయాల్లో తన పాదాన్ని మరింత బలపరుచుకున్న అల్బనీస్, వ్యక్తిగత జీవితంలోనూ సంతోషకరమైన కొత్త అధ్యాయం ఆరంభించారు. దేశీయ కార్యక్రమాలు ముగిసిన వెంటనే ఆయన ఐదు రోజుల హనీమూన్ను ఆస్ట్రేలియాలోనే గడపాలని నిర్ణయించుకున్నారు. రాజకీయ నాయకుడిగానూ, వ్యక్తిగత జీవితంలోనూ సమతుల్యతను కాపాడుతున్న అల్బనీస్ తాజా నిర్ణయం ప్రపంచవ్యాప్తంగా ప్రశంసలను అందుకుంటోంది.
