డోర్నకల్–పాపటపల్లి రైల్వే మార్గంలో మూడో లైన్ మరమ్మతు పనులు జరుగుతున్న నేపథ్యంలో రాబోయే వారం రోజుల పాటు రైళ్ల రాకపోకలకు అంతరాయం కలగనుంది. ఈ మరమ్మతు పనులు అక్టోబర్ 11 నుంచి 18 వరకు కొనసాగుతాయని దక్షిణ మధ్య రైల్వే అధికారులు తెలిపారు. ఫలితంగా పలు ముఖ్యమైన రైళ్లు రద్దు, పాక్షిక రద్దు మరియు రీషెడ్యూల్ అయ్యాయి. ఈ మార్పుల కారణంగా ప్రయాణికులు ముందుగానే తమ ప్రయాణ ప్రణాళికలను సవరించుకోవాలని అధికారులు సూచించారు.
రైల్వే ప్రకటన ప్రకారం మొత్తం 32 రైళ్లు పూర్తిగా రద్దయ్యాయి. వీటిలో విశాఖపట్నం–న్యూఢిల్లీ ఏపీ ఎక్స్‌ప్రెస్, స్వర్ణజయంతి ఎక్స్‌ప్రెస్, సికింద్రాబాద్–గుంటూరు ఇంటర్‌సిటీ, పూరి–ఓకా ద్వారకా ఎక్స్‌ప్రెస్ వంటి కీలక సర్వీసులు ఉన్నాయి. అదేవిధంగా, డోర్నకల్–కాజీపేట, విజయవాడ–డోర్నకల్ మధ్య నడిచే మెమో ప్యాసింజర్ రైళ్లు కూడా రద్దు అయ్యాయి. ఈ రైళ్లు ప్రతిరోజూ ప్రయాణించే వేలాది మంది ప్రయాణికులకు అసౌకర్యం కలిగించే అవకాశం ఉందని అధికారులు అంచనా వేస్తున్నారు.
రద్దుతో పాటు కొన్ని ముఖ్యమైన రైళ్ల షెడ్యూల్‌లలో మార్పులు చేశారు. ఆదిలాబాద్–తిరుపతి కృష్ణా ఎక్స్‌ప్రెస్ అక్టోబర్ 13, 16, 17 తేదీల్లో గంటన్నర ఆలస్యంగా బయలుదేరనుంది. అదేవిధంగా, విశాఖపట్నం–సికింద్రాబాద్ మధ్య నడిచే వందేభారత్ ఎక్స్‌ప్రెస్ సేవలు 15, 16, 18 తేదీల్లో గంటన్నర ఆలస్యంగా ప్రయాణిస్తాయని అధికారులు తెలిపారు. సికింద్రాబాద్–గుంటూరు గోల్కొండ ఎక్స్‌ప్రెస్ సర్వీసును ఈ నెల 14 నుంచి 18 వరకు కాజీపేట–గుంటూరు మధ్య పాక్షికంగా రద్దు చేశారు. ఈ రైలు కేవలం సికింద్రాబాద్–కాజీపేట వరకు మాత్రమే నడుస్తుందని రైల్వే అధికారులు వివరించారు.
ఇక, సికింద్రాబాద్–త్రివేండ్రం మధ్య నడిచే శబరి ఎక్స్‌ప్రెస్ (20629)లో కోచ్ మార్పు చేసినట్లు రైల్వే అధికారులు ప్రకటించారు. ఈ రైలులోని ఫస్ట్ ఏసీ కోచ్‌లో సాంకేతిక లోపం తలెత్తడంతో, దాని స్థానంలో ఒక సెకండ్ ఏసీ కోచ్‌ను అదనంగా జత చేశారు. నేటి నుంచి ఈ మార్పు అమల్లోకి వస్తుందని అధికారులు తెలిపారు. ప్రయాణికులు తాజా మార్పులను గమనించి, తమ ప్రయాణ సమయాలను ముందుగా ధృవీకరించుకోవాలని సూచించారు. రైల్వే సిబ్బంది ప్రయాణికులకు సౌకర్యం కల్పించేందుకు అన్ని ఏర్పాట్లు చేసినట్లు పేర్కొన్నారు.
