వాట్సాప్ ఖాతా బ్లాక్ చేయబడిన కేసులో సుప్రీంకోర్టు తాజాగా ఆసక్తికర వ్యాఖ్యలు చేసింది. కమ్యూనికేషన్ కోసం వాట్సాప్‌పై మాత్రమే ఆధారపడాల్సిన అవసరం లేదని, దేశీయంగా అభివృద్ధి చేసిన యాప్‌లను వాడాలని కోర్టు సూచించింది. ముఖ్యంగా జోహో కంపెనీ రూపొందించిన ‘అరట్టై’ యాప్‌ను ప్రస్తావిస్తూ, “మేక్ ఇన్ ఇండియా” ఉత్పత్తులను ప్రోత్సహించాల్సిన అవసరం ఉందని ధర్మాసనం గుర్తుచేసింది.
కేసు వివరాల్లోకి వెళితే, ఒక పాలీడయాగ్నస్టిక్ సెంటర్‌లో పనిచేస్తున్న వ్యక్తి తన వాట్సాప్ ఖాతాను ఎలాంటి కారణం చెప్పకుండా బ్లాక్ చేశారని ఆరోపించారు. దీనిని పునరుద్ధరించేలా ఆదేశాలు జారీ చేయాలని సుప్రీంకోర్టులో రిట్ పిటిషన్ దాఖలు చేశారు. పిటిషనర్ తరఫు న్యాయవాది, గత 10–12 ఏళ్లుగా తన క్లయింట్లతో కమ్యూనికేట్ చేయడానికి వాట్సాప్ వాడుతున్నారని పేర్కొన్నారు.
ధర్మాసనం స్పందిస్తూ, “వాట్సాప్ యాక్సెస్ కలిగి ఉండటం ఆర్టికల్ 32 కింద ప్రాథమిక హక్కుగా చెప్పబడదు. ఒకవేళ వాట్సాప్ లేకపోతే ఏంటి? కమ్యూనికేషన్ కోసం ఇతర యాప్‌లు అందుబాటులో ఉన్నాయి. కొత్తగా వచ్చిన స్వదేశీ యాప్ ‘అరట్టై’ వాడండి. మేక్ ఇన్ ఇండియా ఉత్పత్తులను ప్రోత్సహించండి” అని పేర్కొంది. అంతేకాక, ఈ పిటిషన్ హైకోర్టులో కూడా విచారణకు అర్హమైనది కాదని కోర్టు స్పష్టంగా తెలిపింది. దీంతో, పిటిషనర్ తన వ్యాజ్యాన్ని ఉపసంహరించుకున్నారు.
‘అరట్టై’ యాప్ జోహో కంపెనీ అభివృద్ధి చేసింది. తమిళంలో ‘అరట్టై’ అంటే ముచ్చట, సంభాషణ అని అర్థం. ఇప్పటికే కోటి మందికి పైగా వినియోగదారులను సంపాదించుకున్న ఈ యాప్, వాట్సాప్‌కు ప్రత్యామ్నాయంగా వేగంగా ప్రాచుర్యం పొందుతోంది. ఈ యాప్‌లో మెసేజ్‌లు, వాయిస్ మరియు వీడియో కాల్స్, గ్రూప్ మీటింగ్‌లు, ఫొటోలు, డాక్యుమెంట్ల షేరింగ్ వంటి ఫీచర్లు ఉన్నాయి. త్వరలోనే ఎండ్-టు-ఎండ్ ఎన్‌క్రిప్షన్ ఫీచర్ కూడా అందుబాటులోకి రానుందని జోహో వ్యవస్థాపకుడు శ్రీధర్ వెంబు తెలిపారు. దేశీయ యాప్‌ల ప్రాధాన్యత పెరుగుతూ, భద్రత, వినియోగ సౌకర్యం రెండింటినీ కలిపిన ‘అరట్టై’ యాప్ యువతలో ప్రత్యేక ఆదరణ పొందుతోంది.
