దర్శకుడు రామ్ గోపాల్ వర్మ తన తాజా సోషల్ మీడియా పోస్టుతో మెగా అభిమానులను ఉత్సాహపరిచారు. చిరంజీవి నటించిన తొలి చిత్రం ప్రాణం ఖరీదు విడుదలై 47 ఏళ్లు పూర్తయిన సందర్భంగా ఆయనకు పవన్ కల్యాణ్ హృదయపూర్వక శుభాకాంక్షలు తెలియజేశారు. ఈ సందర్భాన్ని గుర్తు చేసుకుంటూ పవన్ చేసిన పోస్ట్‌ను రామ్ గోపాల్ వర్మ రీషేర్ చేశారు. ఇందులో ఆయన, చిరంజీవి–పవన్ కల్యాణ్ కలిసి ఒక సినిమా చేయాలని ఆశాభావం వ్యక్తం చేశారు.
రామ్ గోపాల్ వర్మ రాసిన సందేశంలో, “మీరిద్దరూ కలిసి ఒక సినిమా చేస్తే అది ప్రపంచవ్యాప్తంగా ఉన్న తెలుగు ప్రేక్షకులందరికీ మెగా పవర్ జోష్ నింపుతుంది. ఆ చిత్రం ఈ శతాబ్దంలోనే మెగా పవర్ సినిమా అవుతుంది” అని పేర్కొన్నారు. ఈ వ్యాఖ్యలు కాసేపట్లోనే వైరల్ అవడంతో, నెటిజన్లలో కొత్త చర్చకు తెరతీశాయి.
మెగా అభిమానులు ఎప్పటినుంచో ఆశిస్తున్న కలల కాంబినేషన్ ఇదే. అన్నదమ్ములు ఇద్దరూ ఒకే తెరపై కనిపించాలి అనే కోరిక అనేక ఏళ్లుగా వినిపిస్తోంది. కానీ ఇప్పటి వరకు అది సాధ్యం కాలేదు. ఈ నేపథ్యంలో రామ్ గోపాల్ వర్మ చేసిన కామెంట్ మెగా అభిమానుల్లో ఆసక్తిని పెంచింది. ఒకవేళ చిరు–పవన్ మల్టీస్టారర్ నిజమైతే, తెలుగు సినిమా చరిత్రలో ఒక మైలురాయి అవుతుందని అభిమానులు భావిస్తున్నారు.
ప్రస్తుతం ఈ పోస్టు సోషల్ మీడియాలో వైరల్ అవుతోంది. అభిమానులు, సినీ ప్రేమికులు, నెటిజన్లు అందరూ తమ తమ అభిప్రాయాలను వ్యక్తం చేస్తున్నారు. “ఇలాంటి ప్రాజెక్ట్ వస్తే ఎవరు డైరెక్ట్ చేస్తే బాగుంటుంది?” అనే చర్చ ట్రెండ్ అవుతోంది. కొందరు కొరటాల శివ, సుకుమార్, బోయపాటి శ్రీను వంటి యాక్షన్ డైరెక్టర్లను సూచిస్తుండగా, మరికొందరు శంకర్, రాజమౌళి వంటి పెద్ద దర్శకులను కోరుతున్నారు.
చిరంజీవి తొలి సినిమా ప్రాణం ఖరీదు విడుదలై 47 ఏళ్లు పూర్తయిన సందర్భంగా పవన్ కల్యాణ్ సోషల్ మీడియాలో తన అన్నకు శుభాకాంక్షలు తెలిపారు. తనకు చిరంజీవిపై ఉన్న అపారమైన అభిమానాన్ని మరోసారి చాటుకున్నారు. “చిరంజీవి పుట్టుకతోనే యోధుడు. ఆయనకు రిటైర్మెంట్ అనే మాట ఉండదు” అంటూ పవన్ కల్యాణ్ రాసిన సందేశం మెగా అభిమానుల గుండెలను తాకింది. నాటి జ్ఞాపకాలను గుర్తు చేసుకుంటూ పవన్ చేసిన వ్యాఖ్యలు విపరీతమైన స్పందన తెచ్చుకున్నాయి.
తన అన్నపై పవన్ కల్యాణ్ చెప్పిన మాటలకు చిరంజీవి స్పందించారు. “నీ మాటలు నన్ను పాత రోజులకు తీసుకెళ్లాయి. ఆ జ్ఞాపకాలు మళ్లీ నా కళ్ల ముందుకు తెచ్చాయి” అని పేర్కొన్నారు. అన్నదమ్ముల ఈ అనుబంధం చూసి అభిమానులు ఆనందం వ్యక్తం చేస్తున్నారు.
1978లో ప్రాణం ఖరీదు సినిమాతో మొదలైన చిరంజీవి సినీ ప్రయాణం 47 ఏళ్లు పూర్తి చేసుకుంది. ఈ కాలంలో ఆయన ఎన్నో బ్లాక్‌బస్టర్ చిత్రాలు అందించి తెలుగు సినీ పరిశ్రమలో మెగాస్టార్‌గా స్థానం సంపాదించారు. ఇంకా కూడా ఆయన అద్భుతమైన ఫామ్‌లో కొనసాగుతూ యువతరానికి ప్రేరణగా నిలుస్తున్నారు. అన్నదమ్ములిద్దరూ ఒకే ఫ్రేమ్‌లో కనిపించే అవకాశంపై అభిమానులు ఉత్సాహంగా ఉన్నారు. సినీ వర్గాల్లో కూడా ఈ చర్చ వేడెక్కింది. రామ్ గోపాల్ వర్మ వ్యాఖ్య నిజమవుతుందనే ఆశను నింపింది.
