ఆంధ్రప్రదేశ్ మోటార్ వెహికల్ టాక్సేషన్ చట్టం–1963 ప్రకారం వాహనాలపై పన్ను ఎప్పుడు చెల్లించాలి, ఎప్పుడు మినహాయింపు వస్తుంది అన్న దానిపై సుప్రీం కోర్టు ఒక కీలక తీర్పు ఇచ్చింది. ఈ తీర్పు ప్రకారం, వాహనాలను ప్రభుత్వ రహదారులపై నడపనప్పుడు మోటార్ వాహన పన్ను చెల్లించాల్సిన అవసరం లేదని స్పష్టంగా పేర్కొంది. ప్రైవేట్ స్థలాల్లో మాత్రమే వాహనాలు నడిపితే పన్ను వర్తించదని ఈ తీర్పు చెబుతోంది.
ఈ కేసు రాష్ట్రీయ ఇస్పాత్ నిగమ్ లిమిటెడ్‌ (RINL) కు రవాణా సేవలు అందించే ఒక సంస్థ దాఖలు చేసింది. వారు తమ వాహనాలను కేవలం RINL ప్రైవేట్ ప్రాంగణంలోనే నడుపుతున్నామని, పబ్లిక్ రోడ్లను ఉపయోగించడం లేదని వాదించారు. అందువల్ల పన్ను మినహాయింపు కల్పించాలని కోరారు. ఈ వాదనలతో ఏపీ హైకోర్టు ఏకీభవించి, ఇప్పటికే చెల్లించిన రూ.22,71,700 పన్నును తిరిగి ఇవ్వాలని ఆదేశించింది.
హైకోర్టు ఇచ్చిన ఈ తీర్పుతో అసహనానికి గురైన రాష్ట్ర అధికారులు సుప్రీంకోర్టులో అప్పీల్‌ చేశారు. కానీ సుప్రీం కోర్టు కూడా హైకోర్టు తీర్పును సమర్థించింది. జస్టిస్ మనోజ్ మిశ్రా, జస్టిస్ ఉజ్జల్ భుయాన్‌ల ధర్మాసనం స్పష్టంగా పేర్కొన్నది ఏమిటంటే, వాహనాలు ప్రభుత్వ రహదారులు, జాతీయ రహదారులు వంటి పబ్లిక్ ప్రదేశాల్లో నడపబడినప్పుడు మాత్రమే పన్ను విధించాలి. ప్రైవేట్ స్థలాల్లో నడిచే వాహనాలపై పన్ను విధించడం సరికాదని తేల్చి చెప్పింది.
ఈ తీర్పులో భాగంగా, మోటార్ వెహికల్ టాక్సేషన్ చట్టంలోని నిబంధన 3లో “పబ్లిక్ ప్లేసెస్” అనే పదాన్ని ఎందుకు చేర్చారో కోర్టు స్పష్టం చేసింది. ఆ పదం చట్టంలో ఉండటానికి కారణం, ప్రభుత్వ రోడ్ల వినియోగానికి మాత్రమే పన్ను వర్తించాలి అన్న ఉద్దేశం. అందువల్ల, వాహనం ప్రభుత్వ స్థలాల్లో వినియోగించని కాలానికి పన్ను భారాన్ని మోపడం చట్ట విరుద్ధం అవుతుందని కోర్టు వ్యాఖ్యానించింది.
ఈ తీర్పు ఆంధ్రప్రదేశ్‌లో విస్తృతంగా చర్చనీయాంశంగా మారింది. ఇకపై వాహన యజమానులు తమ వాహనాలను పబ్లిక్ రోడ్లపై నడిపితేనే పన్ను చెల్లించాలి, లేనిపక్షంలో పన్ను మినహాయింపు పొందవచ్చు. ఈ తీర్పుతో ప్రభుత్వ రహదారులపై వాహన వినియోగం, ప్రైవేట్ ప్రాంగణాల్లో వినియోగం మధ్య స్పష్టమైనట్లు అర్థం అవుతుంది.
