ఉదయం పూట మన తెలుగు ఇళ్లలో రకరకాల టిఫిన్స్ లేనిదే రోజు మొదలవదు. ఇడ్లీ, దోశ, వడ, బోండా... ఇలా ఏ టిఫిన్ చేసినా, అందులోకి పల్లీ, టమాటా, లేదా కొబ్బరి చట్నీ ఉండాల్సిందే. అయితే, కొన్నిసార్లు ఆ చట్నీలు తయారు చేయడానికి అస్సలు టైమ్ ఉండదు. అప్పుడు ఏం చేయాలి? ఆఫీస్‌కి ఆలస్యం అవుతుందేమోనని టెన్షన్ పడాల్సిన అవసరం లేదు.
అలాంటి హడావిడి సమయాల్లో మనకు బాగా ఉపయోగపడేదే 'ఇడ్లీ పొడి' లేదా 'కారప్పొడి'! ఈ పొడిని ఒక్కసారి కాస్త ఎక్కువ మొత్తంలో తయారుచేసుకుంటే, సుమారు 3 నెలల పాటు నిల్వ ఉంటుంది. ఇది అన్ని టిఫిన్స్‌లోకి, ముఖ్యంగా వేడి వేడి ఇడ్లీల్లోకి నెయ్యి వేసుకుని తింటే.. ఆ రుచే వేరు! అతి తక్కువ పదార్థాలతో, ఎంతో రుచికరంగా ఈ ఇడ్లీ పొడిని ఎలా తయారు చేసుకోవాలో ఇప్పుడు చూసేద్దాం.
ఇడ్లీ పొడి తయారీకి కావాల్సిన పదార్థాలు (Ingredients)..
ఈ కారప్పొడికి కావలసిన పదార్థాలు చాలావరకు మన వంటింట్లో ఉండేవే. (పదార్థాలు ఒకే కప్పుతో కొలవండి, అప్పుడే రుచి పర్ఫెక్ట్‌గా వస్తుంది.)
మినప్పప్పు – అర కప్పు
శనగపప్పు – అర కప్పు
నువ్వులు – పావు కప్పు
జీలకర్ర – 1 టీస్పూన్
మిరియాలు – 1 టీస్పూన్
బ్యాడిగీ మిర్చి (రంగు కోసం) – 8
ఎండుమిర్చి (కారం కోసం) – 10
కరివేపాకు – గుప్పెడు
పుట్నాల పప్పు (వేపిన శనగపప్పు) – 2 టేబుల్ స్పూన్లు
ఇంగువ – పావు టీస్పూన్
వెల్లుల్లి రెబ్బలు – 10 (తొక్కు తీసింది)
ఉప్పు – సరిపడా
నూనె – 1 టీస్పూన్ (మిరపకాయలు వేయించడానికి)
రుచికరమైన ఇడ్లీ పొడి తయారీ విధానం (Step-by-step Process)…
ఈ పొడి తయారు చేయడంలో ముఖ్యమైన చిట్కా ఏంటంటే.. అన్ని పదార్థాలను తక్కువ మంట (Low Flame) మీద దోరగా వేయించుకోవడమే.
కరివేపాకును శుభ్రంగా కడిగి, నీరు అస్సలు లేకుండా ఫ్యాన్ గాలికి లేదా కొద్దిసేపు ఎండలో తడి పోయేలా ఆరబెట్టుకోవాలి. తడి ఉంటే పొడి త్వరగా పాడవుతుంది.
స్టవ్ ఆన్ చేసి పాన్ పెట్టి, ముందుగా మినప్పప్పు వేసి కలుపుతూ, గోల్డెన్ కలర్ వచ్చేవరకు లో ఫ్లేమ్‌లో వేయించి ప్లేట్‌లోకి తీసుకోండి. అదే పాన్‌లో శనగపప్పు వేసి దోరగా వేయించి పక్కన పెట్టుకోండి. తరువాత, నువ్వులు వేసి అవి చిటపటలాడే వరకు వేయించి తీసుకోండి.
చివరగా జీలకర్ర, మిరియాలు వేసి వాసన వచ్చే వరకు వేయించి పక్కన పెట్టండి. అదే పాన్‌లో నూనె వేసి వేడి చేయండి. కాగిన నూనెలో బ్యాడిగీ మిర్చి (ఇవి మంచి రంగునిస్తాయి), ఎండుమిర్చి వేసి అవి క్రిస్పీగా మారే వరకు ఫ్రై చేసి ప్లేట్‌లోకి తీసుకోండి.
చివరగా, కడిగి ఆరబెట్టుకున్న కరివేపాకు వేసి అది క్రిస్పీగా మారే వరకు వేయించండి. కరివేపాకు వేగిన వెంటనే స్టవ్ ఆఫ్ చేసి, వేయించిన పదార్థాలు అన్నీ పూర్తిగా చల్లారే వరకు పక్కన ఉంచాలి. పూర్తిగా చల్లారిన తర్వాత, ముందుగా మినప్పప్పు, శనగపప్పు, నువ్వులు, జీలకర్ర మిశ్రమం, ఎండుమిర్చి, కరివేపాకును మిక్సీ జార్‌లో వేయండి.
ఆపై అందులోకి పుట్నాల పప్పు, ఇంగువ, రుచికి సరిపడా ఉప్పు వేసి ఒకసారి గ్రైండ్ చేయండి. చివరగా వెల్లుల్లి రెబ్బలు వేసి, మరీ మెత్తగా కాకుండా బరకగా (కొంచెం పలుకుగా) ఉండేలా గ్రైండ్ చేసుకోవాలి. అప్పుడే పొడి రుచిగా ఉంటుంది.
గ్రైండ్ చేసిన ఈ పొడి వేడి తగ్గిన తర్వాత మాత్రమే, గాలి, తేమ లేని శుభ్రమైన డబ్బాలో స్టోర్ చేసుకుంటే సరి. నిదానంగా వేయించండి: పప్పులు మరియు మిరపకాయలను తక్కువ మంటపై దోరగా వేయించుకుంటేనే కారప్పొడి రుచిగా ఉండటమే కాకుండా ఎక్కువ రోజులు నిల్వ ఉంటుంది.
పూర్తిగా చల్లారనివ్వండి: పొడి ఎక్కువ రోజులు నిల్వ ఉండాలంటే, వేయించిన పదార్థాలన్నీ పూర్తిగా చల్లారిన తర్వాతనే గ్రైండ్ చేసుకోవాలి. అలాగే, గ్రైండ్ చేసుకున్న పొడిని కూడా పూర్తిగా చల్లారిన తర్వాతే డబ్బాలో వేసుకుని స్టోర్ చేసుకోవాలి.
ఎంతో టేస్టీగా ఉండే ఈ ఇడ్లీ పొడిని మీరు కూడా తయారు చేసుకుని, బిజీ రోజుల్లో చట్నీల టెన్షన్ లేకుండా ఎంజాయ్ చేయండి!
