భారత పోస్టల్ శాఖ ఆధునీకరణలో భాగంగా స్పీడ్ పోస్ట్ సేవల్లో కీలక మార్పులు చేపట్టింది. 1986 ఆగస్టు 1న ప్రారంభమైన ఈ సేవ దేశవ్యాప్తంగా వేగవంతమైన, నమ్మదగిన డెలివరీకి ప్రతీకగా నిలిచింది. ప్రైవేట్ కొరియర్ కంపెనీలకు పోటీగా నిలిచిన ఈ సేవను మరింత సౌలభ్యంగా మార్చేందుకు పోస్టల్ శాఖ కొత్త ఫీచర్లు జోడించి, టారిఫ్‌లలో సవరణలు చేసింది. ముఖ్యంగా 2012 అక్టోబర్ తరువాత ఇదే మొదటిసారి టారిఫ్ మార్పులు అమలులోకి వస్తున్నాయి. పెరుగుతున్న కార్యకలాపాల ఖర్చులు, ఆధునిక టెక్నాలజీలో పెట్టుబడులు పెట్టాల్సిన అవసరంతో ఈ మార్పులు చేపట్టినట్లు అధికారులు తెలిపారు. కొత్త రేట్లు మరియు ఫీచర్లు అక్టోబర్ 1, 2025 నుండి అమల్లోకి రానున్నాయి.
కొత్తగా ప్రవేశపెట్టిన ఫీచర్లలో ముఖ్యమైనది రిజిస్ట్రేషన్ సర్వీస్. ఇప్పటి వరకు సాధారణంగా డెలివరీ జరిగే వస్తువులు ఇప్పుడు రిజిస్ట్రేషన్ సౌకర్యంతో చిరునామాదారునికి లేదా ఆయన అధీకృత ప్రతినిధికి మాత్రమే చేరుతాయి. దీనికి ప్రతి వస్తువుపై రూ.5 ప్లస్ జీఎస్టీ వసూలు చేయనున్నారు. అదనంగా, OTP ఆధారిత డెలివరీ సౌకర్యం కూడా అందుబాటులోకి వస్తోంది. చిరునామాదారుడు OTPని ధృవీకరించిన తర్వాతే డెలివరీ జరుగుతుంది. దీని కోసం కూడా రూ.5 అదనపు ఛార్జీ వసూలు చేయనున్నారు. ఈ రెండు ఫీచర్లు వినియోగదారుల భద్రత, విశ్వసనీయతను మరింత పెంచుతాయని పోస్టల్ శాఖ భావిస్తోంది.
విద్యార్థులకు ప్రత్యేకంగా 10 శాతం టారిఫ్ తగ్గింపు అందించే నిర్ణయం తీసుకుంది. విద్యార్థుల ప్రయోజనాలను దృష్టిలో ఉంచుకుని తీసుకున్న ఈ చర్య వారికి పెద్ద ఉపశమనాన్ని అందించనుంది. అదనంగా, వినియోగదారులకు SMS ఆధారిత డెలివరీ నోటిఫికేషన్లు అందించనున్నారు. దీంతో డెలివరీ ప్రక్రియలో పారదర్శకత, సమయానుకూల సమాచారం వినియోగదారుల దాకా చేరుతుంది. అలాగే, సౌకర్యవంతమైన ఆన్‌లైన్ బుకింగ్ సేవలు మరియు రియల్ టైమ్ డెలివరీ అప్‌డేట్‌లు కూడా అందుబాటులోకి రానున్నాయి. దీంతో పోస్టల్ సేవలు మరింత ఆధునిక, వినియోగదారులకు సులభతరంగా మారనున్నాయి.
కొత్త టారిఫ్‌ల విషయానికి వస్తే, 50 గ్రాముల వరకు బరువున్న వస్తువులకు స్థానిక దూరానికి రూ.19, 200 కి.మీ లోపు దూరాలకు రూ.47 వసూలు చేస్తారు. 51 గ్రాముల నుండి 250 గ్రాముల వరకు వస్తువులకు స్థానికంగా రూ.24, 200 కి.మీ వరకు రూ.59, 201–500 కి.మీ మధ్య రూ.63, 501–1000 కి.మీ వరకు రూ.68, 1000 కి.మీ పైబడితే రూ.77 చెల్లించాలి. 251–500 గ్రాముల వస్తువులకు స్థానికంగా రూ.28, 200 కి.మీ వరకు రూ.70, 201–500 కి.మీ మధ్య రూ.75, 501–1000 కి.మీ వరకు రూ.82, 1001–2000 కి.మీ మధ్య రూ.86, అంతకంటే ఎక్కువ దూరాలకు రూ.93 వసూలు చేయనున్నారు. ఈ మార్పులు వినియోగదారులకు మరింత సమగ్రమైన, భద్రతా పరమైన సేవలు అందించడమే కాకుండా, పోస్టల్ శాఖ ఆర్థిక స్థితి బలపడటానికి కూడా దోహదపడతాయి.
