అమెరికాలో గురువారం రెండు విభిన్నమైన కానీ చర్చనీయాంశంగా మారిన పరిణామాలు చోటుచేసుకున్నాయి. ఒకవైపు ఆర్థిక రంగాన్ని కదిలించేలా ఫెడరల్ రిజర్వ్ కీలక వడ్డీ రేట్లను తగ్గిస్తుందని ప్రకటించగా, మరోవైపు రాజకీయ, ఆర్థిక చర్చలకు దారితీసేలా యూఎస్ క్యాపిటల్ భవనం ఎదుట మాజీ అధ్యక్షుడు డొనాల్డ్ ట్రంప్ భారీ బంగారు విగ్రహం వెలసింది. ఈ రెండు పరిణామాలు ఒకేరోజు వెలుగులోకి రావడంతో అంతర్జాతీయ మీడియా విస్తృతంగా చర్చించింది.
12 అడుగుల ఎత్తులో నిర్మించిన ట్రంప్ విగ్రహం అందరి దృష్టిని ఆకర్షించింది. ఇందులో ట్రంప్ తన చేతిలో బిట్‌కాయిన్‌ను పట్టుకుని ఉండగా, ఈ విగ్రహాన్ని ప్రత్యేకంగా క్రిప్టోకరెన్సీ ఇన్వెస్టర్లు ఏర్పాటు చేసినట్లు ఏబీసీ అనుబంధ సంస్థ WJLA వెల్లడించింది. నిర్వాహకుల ప్రకారం, ఈ విగ్రహం కేవలం ఒక ప్రతీక మాత్రమే కాకుండా డిజిటల్ కరెన్సీ భవిష్యత్తు, ప్రభుత్వ ద్రవ్య విధానం, ఆర్థిక వ్యవస్థలో ప్రభుత్వ జోక్యం వంటి అంశాలపై చర్చను ప్రోత్సహించేందుకే ఏర్పాటుచేశారు. ట్రంప్ గతంలో క్రిప్టోకరెన్సీకి మద్దతు పలికిన సందర్భాలు ఉన్నందున, ఆయన గౌరవార్థమే ఈ బంగారు విగ్రహాన్ని ఏర్పాటు చేసినట్లు చెప్పారు. ఈ విగ్రహం వెలుగులోకి రాగానే ఆ ప్రాంతంలో పెద్ద ఎత్తున జనసందోహం ఏర్పడింది.
ఇక ఆర్థిక రంగానికి సంబంధించిన మరో పరిణామంలో, అమెరికా సెంట్రల్ బ్యాంక్ అయిన ఫెడరల్ రిజర్వ్ వడ్డీ రేట్లపై కీలక నిర్ణయం తీసుకుంది. ఫెడరల్ ఫండ్ రేటును 25 బేసిస్ పాయింట్లు (0.25 శాతం) తగ్గించింది. దీంతో స్వల్పకాలిక వడ్డీ రేటు 4.3 శాతం నుంచి సుమారు 4.1 శాతానికి తగ్గింది. గతేడాది డిసెంబర్‌ తర్వాత ఫెడ్ వడ్డీ రేట్లు తగ్గించడం ఇదే తొలిసారి కావడంతో పెట్టుబడిదారుల దృష్టిని ఆకర్షించింది.
భవిష్యత్తులో వడ్డీ రేట్ల విషయంలో మరిన్ని కోతలు ఉండే అవకాశం ఉందని ఫెడ్ సంకేతాలు ఇచ్చింది. ఈ ఏడాదిలో మరో రెండుసార్లు, అలాగే 2026లో ఒకసారి వడ్డీ రేట్లు తగ్గించే అవకాశం ఉందని తెలిపింది. ఆర్థిక వృద్ధి, ద్రవ్యోల్బణం, పెట్టుబడులపై ఫెడ్ నిర్ణయాలు ఎలా ప్రభావితం చేస్తాయన్న అంశంపై ఇప్పటికే అమెరికా ఆర్థిక నిపుణులు విశ్లేషణలు ప్రారంభించారు. మరోవైపు ట్రంప్ విగ్రహం కారణంగా డిజిటల్ కరెన్సీ, ముఖ్యంగా బిట్‌కాయిన్ మార్కెట్ మళ్లీ చర్చల్లోకి రావడం విశేషం. ఈ రెండు పరిణామాలు ఒకేసారి చోటుచేసుకోవడంతో అమెరికా రాజకీయ–ఆర్థిక దిశలో కొత్త చర్చలకు నాంది పలికాయి.
