ప్రధాని నరేంద్ర మోదీ ఆగస్టు 15న ఎర్రకోట వేదికపై ప్రజలకు స్పష్టమైన పిలుపునిచ్చారు. ఆయన అన్నారు, హక్కుల కోసం పోరాటం మాత్రమే కాకుండా, మనకు దేశానికి కర్తవ్యం కూడా ఉంది. మనం రోజువారీ జీవితంలో ఉపయోగించే వస్తువుల్లో ‘మేడిన్ ఇండియా’ను ఎంచుకోవడం ద్వారా దేశ ఆర్థిక వ్యవస్థను బలోపేతం చేయవచ్చని తెలిపారు. ప్రతి భారతీయుడు తన విధిని గుర్తించి, దేశాన్ని ఆత్మనిర్భర, అభివృద్ధి చెందిన దేశంగా తీర్చిదిద్దడంలో భాగస్వామి కావాలని మోదీ పిలుపునిచ్చారు.
భారతీయ వస్తువులను కొనడం ద్వారా దేశంలో వాటికి డిమాండ్ పెరుగుతుంది. దీంతో కంపెనీలు ఉత్పత్తిని పెంచి, ఎక్కువ ఉద్యోగులను నియమిస్తాయి. దీని ఫలితంగా నిరుద్యోగ సమస్య తగ్గి, ప్రజల ఆర్థిక స్థితి బలోపేతం అవుతుంది. దేశంలోనే డబ్బు తిరుగుతూ, ఇతర వ్యాపారాలు మరియు పరిశ్రమలు అభివృద్ధి చెందుతాయి. అలాగే, దిగుమతులపై ఆధారాన్ని తగ్గించి, రూపాయి విలువ స్థిరంగా ఉండటానికి ఇది సహాయపడుతుంది.
ప్రధాన Made in India బ్రాండ్లలో నిత్యావసర వస్తువులు టాటా ఉప్పు, ఆశీర్వాద్, డాబర్, పతంజలి, గోద్రేజ్ కన్స్యూమర్ ప్రొడక్ట్స్, ఐటీసీ, ఇమామి, హమ్‌దార్డ్, అమూల్, నిర్మ, ఉజాలా ఉన్నాయి. ఆహారం & పానీయాల్లో అమూల్, పార్లే, బ్రిటానియా, హల్దిరామ్స్, MDH, సఫోలా, రూహ్ అఫ్జా ప్రధానంగా ఉన్నాయి. దుస్తులు & టెక్స్‌టైల్స్‌లో రేమండ్, అరవింద్, ఫ్యాబ్ ఇండియా, మాన్యవర్, వాన్ హ్యుసెన్, సబ్యసాచి ఉన్నాయి.
ఎలక్ట్రానిక్స్ & గృహ ఉపకరణాల్లో హావెల్స్, బజాజ్ ఎలక్ట్రికల్స్, వోల్టాస్, BPL, గోద్రేజ్ అప్లియెన్సెస్, డిక్సన్ టెక్నాలజీస్ ఉన్నాయి. మొబైళ్లు, ల్యాప్‌టాప్‌లు & గ్యాడ్జెట్స్‌లో హెచ్‌సిఎల్, మైక్రోమాక్స్, లావా, ఇంటెక్స్, బోట్, నాయిస్ ఉన్నాయి. ఆటోమొబైల్స్‌లో టాటా మోటార్స్, మహీంద్రా, అశోక్ లేలాండ్, బజాజ్ ఆటో, హీరో మోటోకార్ప్, రాయల్ ఎన్‌ఫీల్డ్, ఔషధాలు & హెల్త్ కేర్‌లో సన్ ఫార్మా, సిప్లా, డాక్టర్ రెడ్డీస్, జైడస్, ల్యూపిన్, భారత్ బయోటెక్, సీరమ్ ఇన్‌స్టిట్యూట్ ఉన్నాయి. బిల్డింగ్ & హోమ్ మెటీరియల్స్, సాఫ్ట్‌వేర్ & IT సేవల్లోనూ భారతీయ కంపెనీలు అధికంగా ఉన్నాయి. ప్రధాని మోదీ సూచించిన విధంగా, మనం ‘మేడిన్ ఇండియా’ వస్తువులను కొనడం ద్వారా కేవలం వ్యక్తిగత ప్రయోజనాలు మాత్రమే కాకుండా, దేశ భవిష్యత్తును బలోపేతం చేయడం ఒక రకమైన దేశభక్తి అని చెప్పవచ్చు.
