ఆంధ్రప్రదేశ్‌లో కూటమి ప్రభుత్వం ఎన్నికల హామీలను నెరవేర్చే దిశగా పలు సంక్షేమ కార్యక్రమాలను ప్రారంభిస్తోంది. అందులో భాగంగా మహిళలకు ఉచిత బస్సు ప్రయాణ సౌకర్యం కల్పించే స్త్రీ శక్తి పథకం ను తాజాగా అమల్లోకి తెచ్చింది. ఈ పథకం విజయవంతంగా నడుస్తోంది. దీంతో మహిళలు బస్సుల్లో ప్రయాణించడం ఎక్కువ అవుతుండటంతో ఆటో డ్రైవర్లకు ప్రయాణికులు తగ్గిపోయారు. ఈ కారణంగా వారి ఆదాయం తగ్గిపోతుందని ప్రభుత్వం గమనించింది.
దీన్ని దృష్టిలో పెట్టుకుని ఆటో డ్రైవర్ల కోసం కొత్తగా మరో పథకాన్ని ప్రారంభించింది. ఈ పథకం ప్రకారం ప్రతి ఆటో డ్రైవర్‌కు ఏటా రూ.15,000 ఆర్థిక సహాయం అందజేయనున్నారు. అయితే ఈ మొత్తం చాలదనే అభిప్రాయం కొందరిలో వ్యక్తమవుతోంది. ఇదే సమయంలో సీఎం చంద్రబాబు ఆటో డ్రైవర్లకు మరిన్ని అవకాశాలు కల్పించేందుకు మరో ముఖ్య నిర్ణయం తీసుకున్నారు.
ఆటో డ్రైవర్లకు గిరాకీ పెంచే దిశగా టెక్నాలజీ సాయం తీసుకోవాలని సీఎం సూచించారు. ఈ నేపథ్యంలో ప్రభుత్వ ఆధ్వర్యంలో ఓ కొత్త మొబైల్ యాప్ రూపొందించనున్నారు. ఇది ఓలా ఉబర్ తరహాలో పనిచేస్తుంది. ఈ యాప్ ద్వారా ప్రయాణికులు ఆటోలు, మ్యాక్సీ క్యాబ్‌లు బుక్ చేసుకోవచ్చు. ఈ యాప్ ఉపయోగించడం వలన ఆటో డ్రైవర్లకు మరిన్ని బుకింగ్స్ వస్తాయి. దీంతో వారి ఆదాయం పెరుగుతుందని ప్రభుత్వం ఆశిస్తోంది.
ప్రభుత్వ వర్గాల సమాచారం ప్రకారం, ఈ యాప్‌లో రిజిస్ట్రేషన్ తప్పనిసరి కాకుండా ఐచ్ఛికం ఉంచనున్నారు. అంటే ఎవరు ఇష్టపడతారో వారు మాత్రమే రిజిస్టర్ చేసుకోవచ్చు. బలవంతంగా ఎవరినీ యాప్‌లో చేర్చరని అధికారులు స్పష్టం చేశారు.
ఈ యాప్‌ను ప్రభుత్వం నిర్వహించనుండటంతో నిర్వహణ ఖర్చులు తప్పవు. కాల్ సెంటర్ ఏర్పాటు, టెక్నికల్ సపోర్ట్, సర్వర్ నిర్వహణ వంటి ఖర్చులు ప్రభుత్వంపై పడతాయి. అందుకే, యాప్ వినియోగానికి కొంత సర్వీస్ ఫీజు లేదా కనీస ఛార్జీ విధించాలని కొన్ని ప్రతిపాదనలు వస్తున్నాయి. కానీ ఈ నిర్ణయం ఆటో డ్రైవర్లకు భారమవుతుందనే అభిప్రాయం కూడా వినిపిస్తోంది.
అందువల్ల ప్రభుత్వం ఈ యాప్‌ను పూర్తిగా ఉచితంగాఅందించాలనే ఆలోచనలో ఉంది. ఉచిత రిజిస్ట్రేషన్‌తో పాటు ప్రయాణికులు కూడా ఎలాంటి అదనపు ఛార్జీలు లేకుండా బుకింగ్స్ చేసుకునే విధంగా యాప్ రూపకల్పన చేస్తున్నారు.
ఈ యాప్ అమలులోకి వస్తే ఆటో డ్రైవర్లకు గిరాకీ తిరిగి పెరగొచ్చు. ఒకవైపు ఆర్థిక సాయం అందిస్తూనే మరోవైపు టెక్నాలజీ ఆధారంగా వారి ఆదాయాన్ని పెంచే మార్గం సృష్టించడం ద్వారా ప్రభుత్వం సమతౌల్యం సాధించాలని చూస్తోంది.
ఈ ప్రాజెక్ట్ విజయవంతమైతే, రాష్ట్రంలోని వేలాది ఆటో డ్రైవర్లకు స్థిరమైన ఉపాధి, మంచి ఆదాయం లభించవచ్చు. అలాగే ప్రయాణికులకు కూడా సులభంగా ఆటోలు దొరికే అవకాశం ఉంటుంది. ఈ యాప్ సురక్షితంగాసులభంగా అందరికీ ఉపయోగపడేలా రూపొందించడానికి అధికారులు కసరత్తు చేస్తున్నారు.
