AP Govt Schemes 2026: ఏపీ నేతన్నలకు శుభవార్త.. నేటి నుంచే ఉచిత విద్యుత్ పథకం అమలు!

AP Govt Schemes 2026: ఆంధ్రప్రదేశ్ రాష్ట్రంలోని చేనేత కార్మికులకు కూటమి ప్రభుత్వం తీపి కబురు అందించింది. ఎన్నికల హామీల్లో భాగంగా ఇచ్చిన మాటను నిలబెట్టుకుంటూ, నేతన్నల సంక్షేమం కోసం 'ఉచిత విద్యుత్ పథకాన్ని' బుధవారం (ఏప్రిల్ 1) నుంచి అధికారికంగా ప్రారంభించింది. ఈ పథకం ద్వారా రాష్ట్రవ్యాప్తంగా సుమారు లక్ష మంది చేనేత, పవర్‌లూమ్ కార్మికులకు నేరుగా లబ్ధి చేకూరనుంది. చేనేత వృత్తిపై ఆధారపడి జీవిస్తున్న కుటుంబాల్లో వెలుగులు నింపడమే లక్ష్యంగా ప్రభుత్వం ఈ కీలక నిర్ణయం తీసుకుంది.

యూనిట్ల వారీగా రాయితీ వివరాలు

ప్రభుత్వం విడుదల చేసిన తాజా మార్గదర్శకాల ప్రకారం.. చేనేత మగ్గాల (Handlooms) మీద ఆధారపడే కుటుంబాలకు నెలకు 200 యూనిట్ల వరకు ఉచిత విద్యుత్‌ను అందిస్తారు. అలాగే, మర మగ్గాల (Power Looms) ద్వారా ఉపాధి పొందుతున్న వారికి నెలకు 500 యూనిట్ల వరకు కరెంటును ఉచితంగా సరఫరా చేయనున్నారు. ఈ రాయితీ వల్ల కార్మికులపై కరెంటు బిల్లుల భారం గణనీయంగా తగ్గుతుంది. ప్రతి చేనేత కార్మికుడికి ఏడాదికి దాదాపు రూ. 8,640 వరకు, అలాగే పవర్‌లూమ్ కార్మికులకు రూ. 21,600 వరకు ఆదా అవుతుందని అధికారులు అంచనా వేస్తున్నారు.

ఆర్థిక భారాన్ని తగ్గిస్తూ.. ఆత్మగౌరవాన్ని పెంచుతూ..

ఈ పథకం అమలు కోసం రాష్ట్ర ప్రభుత్వం ఏటా సుమారు రూ. 150 కోట్ల అదనపు భారాన్ని భరించనుంది. "చేనేత కార్మికులు ఆర్థికంగా నిలదొక్కుకుని, గౌరవప్రదమైన జీవితం గడపాలన్నదే మా ప్రభుత్వ ఉద్దేశ్యం" అని మంత్రి సవిత స్పష్టం చేశారు. కేవలం విద్యుత్ రాయితీ మాత్రమే కాకుండా, నేతన్నలకు నెలకు రూ. 4,000 చొప్పున పింఛనును కూడా ప్రభుత్వం అందిస్తోంది. ముడిసరుకు కొనుగోలుపై సబ్సిడీ ఇవ్వడంతో పాటు, ఆధునిక యంత్రాల కొనుగోలుకు 90 శాతం వరకు రాయితీ కల్పిస్తున్నట్లు ఆమె పేర్కొన్నారు.

క్లస్టర్ల ఏర్పాటుతో కొత్త ఊపు

చేనేత రంగాన్ని ఆధునికీకరించేందుకు ప్రభుత్వం భారీ ప్రణాళికలు రూపొందిస్తోంది. దీనిలో భాగంగా శ్రీసత్యసాయి జిల్లా ధర్మవరంలో సుమారు రూ. 38.30 కోట్లతో భారీ హ్యాండ్‌లూమ్ క్లస్టర్‌ను ఏర్పాటు చేయబోతున్నారు. వీటితో పాటు మంగళగిరిలో రూ. 22.35 కోట్లు, పిఠాపురంలో రూ. 12 కోట్లతో ప్రత్యేక ప్రాజెక్టులు చేపట్టనున్నారు. చేనేత ఉత్పత్తులకు మంచి మార్కెటింగ్ కల్పించేందుకు అమెజాన్, ఫ్లిప్‌కార్ట్ వంటి ఈ-కామర్స్ సైట్లతో ఒప్పందాలు చేసుకుని, నేరుగా వినియోగదారులకు వస్త్రాలను విక్రయించే వెసులుబాటు కల్పిస్తున్నారు.

త్వరలో 'నేతన్న భరోసా' అమలు

కేవలం విద్యుత్ రాయితీకే పరిమితం కాకుండా, రాబోయే రోజుల్లో 'నేతన్న భరోసా' పథకాన్ని కూడా పూర్తిస్థాయిలో అమలు చేస్తామని ప్రభుత్వం ప్రకటించింది. ఆప్కో (APCO) ద్వారా అమ్మకాలను పెంచడం, ఎగ్జిబిషన్లలో 40 నుండి 50 శాతం వరకు డిస్కౌంట్లు ఇవ్వడం వంటి చర్యల ద్వారా చేనేత వస్త్రాలకు పూర్వవైభవం తీసుకురావాలని ప్రభుత్వం భావిస్తోంది. ఉచిత విద్యుత్ పథకం నేటి నుంచి అమల్లోకి రావడంతో రాష్ట్రవ్యాప్తంగా ఉన్న నేతన్నలు హర్షం వ్యక్తం చేస్తున్నారు.