మంచి ఆరోగ్యం కోసం సరిపడా నీరు తాగడం ఎంతో ముఖ్యం అని అందరికీ తెలిసిందే. మన శరీరంలో 70% వరకు నీరు ఉండటంతో, శరీరంలోని ప్రతి చర్య కూడా నీటి సమతుల్యంపై ఆధారపడి ఉంటుంది. అయితే నీరు మితంగా తాగడం ఎంత ముఖ్యమో, అతిగా తాగడం అంతే ప్రమాదకరం అని వైద్యులు హెచ్చరిస్తున్నారు. సాధారణంగా రోజుకు 2 నుండి 3 లీటర్ల నీరు తాగడం ఆరోగ్యానికి అనుకూలం, కానీ దీనిని మించేలా ఎక్కువ నీరు తీసుకుంటే శరీరం ఆ నీటిని నిర్వహించలేకపోయి అనేక రకాల ఆరోగ్య సమస్యలు ఎదురవుతాయి.
శరీరంలో నీరు ఎక్కువైతే మొదట ప్రభావం చూపేది లవణాల స్థాయిలపైనే. సోడియం, పోటాషియం వంటి ముఖ్యమైన లవణాలు మూత్రం ద్వారా అధికంగా బయటకు వెళ్లిపోవడంతో శరీరం బలహీనపడుతుంది. అలసట, శక్తి కోల్పోవడం, ఒళ్లు నిస్సత్తువగా మారడం వంటి లక్షణాలు కనిపిస్తాయి. అంతేకాకుండా, నీరు అతిగా తాగడం వల్ల రక్తంలోని లవణాల సమతుల్యం క్రమం తప్పిపోయి మెదడులో ఒత్తిడి పెరుగుతుంది. ఇది తీవ్రమైన తలనొప్పి, తల తిరగడం, వాంతుల భావన వంటి సమస్యలకు దారితీస్తుంది.
చాలా సందర్భాల్లో మెదడుపై ఒత్తిడి ఎక్కువైతే అది ప్రాణాంతకంగా మారే అవకాశమూ ఉంది. అదేవిధంగా, కిడ్నీల పనితీరుపై కూడా ఈ ప్రభావం స్పష్టంగా కనిపిస్తుంది. కిడ్నీలు రోజులో ఒక నిర్ణీత మోతాదులోనే నీటిని వడపోత చేయగల్గుతాయి. ఆ పరిమితిని మించేలా నీరు తాగితే కిడ్నీలు అదనపు ఒత్తిడిని తట్టుకోలేక నెమ్మదిగా బలహీనమవుతాయి, దీనివల్ల దీర్ఘకాలిక రీనల్ సమస్యలు రావచ్చు. తరచూ మూత్రం రావడం, శరీరంలో నీరు నిల్వ కావడం, చేతులు కాళ్లు ఉబ్బడం వంటి లక్షణాలు కూడా కనిపిస్తాయి. మరొక ముఖ్యమైన సమస్య పోటాషియం స్థాయిలు తగ్గిపోవడం. పోటాషియం మన గుండె స్పందన, కండరాల కదలికలకు అత్యంత కీలకం.
ఇది తగ్గిపోతే రక్త ప్రసరణ బలహీనమై గుండె స్పందన లోపాలు, కండరాల నొప్పులు, ఒక్కసారిగా బలహీనపడటం వంటి సమస్యలు కలుగుతాయి. ఏ వ్యక్తికైనా ఇవి ప్రమాదకరమే కానీ ముఖ్యంగా గుండె సంబంధిత సమస్యలు ఉన్నవారు, కిడ్నీ రోగులు, గర్భిణీలు, వృద్ధులు, రక్తపోటు మందులు తీసుకునేవారు ఎక్కువగా ప్రభావితమవుతారు. శరీరం ఇస్తున్న సంకేతాలను గమనించడం చాలా అవసరం. ఉదాహరణకు, మూత్రం పూర్తిగా తెల్లగా, నీటి లాగా కనిపిస్తే అది నీరు అతిగా తాగుతున్న సంకేతం.
శరీరం దాహం లేకున్నా బలవంతంగా నీరు తాగడం కూడా మంచిది కాదు. శరీరం దాహం ద్వారా మనకు నీటి అవసరం చెప్పే సహజ వ్యవస్థను ఏర్పరచింది. దాన్ని పట్టించుకోవడం ఆరోగ్యానికి చాలా ముఖ్యం. నీటిని ఒకేసారి ఎక్కువగా తాగే బదులు, రోజంతా కొద్దికొద్దిగా తాగితే శరీరం దానిని సరిగ్గా అంగీకరించగలదు. వాతావరణం, శరీర శ్రమ, రోజూ తీసుకునే ఆహారం ఆధారంగా నీటి మోతాదును నియంత్రించాలి. నీరు తాగడం ఆరోగ్యానికి మంచిదన్నా, మితిమీరడం మాత్రం శరీరానికి ప్రమాదకరం అనే విషయం ఎప్పటికీ మరిచిపోకూడదు. కాబట్టి శరీరానికి అవసరమైనంత మాత్రమే నీరు తాగడం, ఆరోగ్య నిపుణులు సూచించిన మోతాదులోనే తీసుకోవడం ద్వారా మంచిది.
