IFFI 2025 ముగింపు వేడుక గోవాలో సినీ తారల సందడి, అంతర్జాతీయ అతిథుల హాజరు, పురస్కారాలు అన్నీ కలిపి వేడుకను మరింత శోభాయమానం చేశాయి. అయితే మొత్తం కార్యక్రమానికి హైలైట్గా నిలిచింది భారత సినీ దిగ్గజం రజనీకాంత్కు ప్రదానం చేసిన లైఫ్టైమ్ అచీవ్మెంట్ అవార్డు. సినిమా రంగంలో అయిదు దశాబ్దాల ప్రయాణాన్ని గుర్తించి, గోవా సీఎం ప్రమోద్ సావంత్ ఈ అవార్డును రజనీకి అందించగా, సభలో క్షణం పాటు చప్పట్ల శబ్దం ఆగలేదు. తాను నటుడిగా పుట్టడం తన అదృష్టమని, మరో జన్మ వచ్చినా ఇదే మార్గాన్ని ఎంచుకుంటానని రజనీకాంత్ చెప్పిన మాటలు అభిమానులను, సహచరులను కదిలించాయి.
వేడుకలో బాలీవుడ్ నటులు రణ్వీర్ సింగ్, దనుష్, నవాజుద్దీన్ సిద్ధిఖీ, దర్శకులు రమేష్ సిప్పీ, మధుర్ బండార్కర్, శేఖర్ కపూర్ తదితరులు పాల్గొన్నారు. ఈ సందర్భంగా ఏడాది పొడవునా మరణించిన కళాకారులను స్మరించేందుకు ప్రత్యేక ఆడియో–విజువల్ నివాళి సమర్పించబడింది. ధర్మేంద్ర, కమిని కౌశల్, శ్యామ్ బెనెగల్ వంటి ప్రముఖులను ఈ క్రమంలో గుర్తుచేసుకున్నారు.
ఈ ఏడాది బెస్ట్ ఫిల్మ్గా వియత్నాం దర్శకురాలు ఆష్ మేయ్ఫైర్ తెరకెక్కించిన స్కిన్ ఆఫ్ యూత్
( Skin of Youth) ఎంపికైంది. ట్రాన్స్జెండర్ వ్యక్తి, కేజ్ ఫైటర్ మధ్య ఉన్న భావోద్వేగ సంబంధాన్ని నాజూకుగా చూపించిన ఈ చిత్రానికి అంతర్జాతీయ జ్యూరీ ప్రశంసలు లభించాయి. బెస్ట్ డైరెక్టర్గా మరాఠీ సినిమా గోంధాల్ (Gondhal) దర్శకుడు సంతోష్ దవాఖర్ నిలిచారు. కొలంబియా నటుడు ఉబెయిమార్ రియాస్ తన ఏ పోయెట్ (A Poet) చిత్రంలోని పాత్రకు గాను బెస్ట్ యాక్టర్ అవార్డు అందుకున్నారు. స్లోవేనియా నటి జారా ఒస్తాన్ లిటిల్ ట్రబుల్స్ గర్ల్స్ (Little Trouble Girls) చిత్రానికి బెస్ట్ యాక్ట్రెస్ అవార్డు పొందారు. నైజీరియా చిత్రం మై ఫాదర్ షాడో (My Father’s Shadow) ప్రత్యేక జ్యూరీ అవార్డును అందుకుంది.
ఉత్సవం ఎదుగుతున్న తీరు ఎంతో సంతోషమని యూనియన్ సమాచార, ప్రసార సహాయ మంత్రి మురుగన్ పేర్కొన్నారు. యువ దర్శకులకు అవకాశాలు పెరుగుతున్నాయనీ, ఈ ఏడాది వేవ్స్ బజార్ పరంగా వెయ్యి కోట్ల వ్యాపారం జరగడం భారత సినిమా ప్రభావం పెరుగుతున్న సంకేతమని చెప్పారు. మహిళా దర్శకుల చిత్రాలు 50 స్క్రీనింగ్స్ దక్కించుకోవడం కూడా ఈ ఏడాది ప్రత్యేకతగా నిలిచిందని తెలిపారు.
కర్ణాటకకు చెందిన సంప్రదాయ కళారూపం యక్షగాన ప్రదర్శన వేడుకలో ప్రేక్షకులను అలరించింది. నటుడు రిషభ్ శెట్టి, తన నటనా ప్రయాణం యక్షగానంతోనే ప్రారంభమైందని గుర్తుచేసుకుంటూ, కాంతారాలాంటి పాతికైన కథలకు యక్షగానమే ప్రేరణ అని చెప్పడం గమనార్హం.
రణ్వీర్ సింగ్ ఈ వేదికపై తన కొత్త సినిమా ధురంధర్ (Dhurandhar) నుంచి పాటను విడుదల చేస్తూ, భారత సినిమా ప్రపంచవ్యాప్తంగా ప్రభావం చూపించే దశలో ఉందని పేర్కొన్నారు. కాంతారా 2లో రిషభ్ శెట్టి నటనను ప్రశంసిస్తూ, భవిష్యత్తులో ప్రయోగాత్మక కథలతో సినిమా మరింత ముందుకు వెళుతుందని అభిప్రాయపడ్డారు.
అంతర్జాతీయ జాతీయ సినిమాల సంగమంగా నిలిచిన ఈ ఏడాది IFFI—సాంకేతికత, సృజనాత్మకత, కథ చెబుతున్న కొత్త తరాన్ని ప్రోత్సహించే వేదికగా మరింత బలపడింది. 56వ IFFI మరపురాని వేడుకగా ముగియగా తదుపరి సంవత్సరం పట్ల సినీ ప్రపంచం మరింత ఆశతో ఎదురుచూస్తోంది.
