ఆంధ్రప్రదేశ్ ప్రభుత్వం వచ్చే విద్యా సంవత్సరానికి ముందుగానే ‘సర్వేపల్లి రాధాకృష్ణన్ విద్యార్థి మిత్ర కిట్లు’ పంపిణీపై పెద్ద ప్రణాళికను సిద్ధం చేసింది. ప్రభుత్వ, ఎయిడెడ్ పాఠశాలల్లో చదివే విద్యార్థులందరికీ జూన్ 12న కిట్లు అందేలా షెడ్యూల్ను ఖచ్చితంగా అమలు చేయాలని నిర్ణయించింది. కిట్ల పంపిణీ ఆలస్యం కాకుండా ఉండేందుకు నవంబర్ నుంచే ప్రభుత్వ యంత్రాంగం చర్యలు ప్రారంభించింది.
ఈ విద్యార్థి మిత్ర కిట్లలో పాఠ్యపుస్తకాలు, రెండు జతల యూనిఫాములు, బూట్లు, రెండు జతల సాక్సులు, బెల్ట్, నోట్బుక్లు వంటి విద్యార్థులకు అవసరమైన వస్తువులు ఉంటాయి. ఈ కిట్లు నాణ్యతతో కూడినవిగా ఉండాలని ప్రభుత్వం స్పష్టమైన ఆదేశాలు జారీ చేసింది. దీనిలో భాగంగా సమగ్ర శిక్షా అభియాన్ ప్రాజెక్టు డైరెక్టర్కు టైంలైన్ ఇచ్చి, ప్రతి అంశాన్ని సమయానికి పూర్తి చేయాలని సూచించింది.
ప్రభుత్వం ఖరారు చేసిన టైమ్టేబుల్ ప్రకారం — నవంబరులో అనుమతులు, కమిటీలు ఏర్పాటు చేయాలి. డిసెంబరు మొదటి వారంలో టెండర్ డాక్యుమెంట్ సిద్ధం చేసి, రెండో వారంలో టెండర్లను పిలవాలి. తరువాత జనవరి చివరి వారంలో టెండర్లను ఖరారు చేయాలని ఆదేశించారు. ఫిబ్రవరిలో మూడు దశల్లో కిట్ల నమూనాల నాణ్యతను పరిశీలించే ప్రక్రియ పూర్తవుతుంది.
ఫిబ్రవరి తరువాత మే నెలలో కిట్ల సరఫరా ప్రక్రియ ప్రారంభమవుతుంది. ముందుగా జిల్లాస్థాయిలోని స్టాక్ పాయింట్లకు సామాగ్రిని చేరవేసి, ఆపై మండల స్టాక్ పాయింట్లకు పంపిస్తారు. మే నెల నాలుగో వారంలో మండల కేంద్రాల్లో కిట్ల తయారీని పూర్తిచేసేందుకు అధికారులు పనిచేస్తారు. దీని ద్వారా పాఠశాల ప్రారంభానికి ముందే కిట్లు సిద్ధంగా ఉండేలా చూస్తున్నారు.
చివరి దశలో, జూన్ తొలి వారంలో మండలాల నుంచి పాఠశాలలకు కిట్లను సరఫరా చేసి, జూన్ 12న విద్యార్థులందరికీ కిట్లను అందజేయడం ప్రభుత్వ లక్ష్యం. విద్యార్థుల విద్యా సంవత్సరాన్ని ఎలాంటి ఇబ్బందులు లేకుండా ప్రారంభించేందుకు, అవసరమైన అన్ని వస్తువులు ఈ కిట్లలో సమగ్రంగా ఉండేలా ప్రత్యేక శ్రద్ధ తీసుకుంటోంది. ఈసారి కిట్ల పంపిణీ పూర్తిగా సమయపాలనతో, పారదర్శకంగా జరగాలని ప్రభుత్వం స్పష్టం చేసింది.
