అంతర్జాతీయ ఎయిర్పోర్ట్ లేకుండా ఏ ప్రాంతం కూడా వేగంగా అభివృద్ధి చెందదని, ముఖ్యంగా అమరావతి లాంటి రాజధాని ప్రాంతం ప్రపంచస్థాయి గుర్తింపు పొందాలంటే అంతర్జాతీయ విమానాశ్రయం తప్పనిసరి అని ఆంధ్రప్రదేశ్ రాష్ట్ర మంత్రి నారాయణ స్పష్టం చేశారు. శుక్రవారం మీడియాతో ఆయన మాట్లాడారు. అమరావతిలో అభివృద్ధి పనులు వేగవంతంగా జరుగుతున్నాయని, ముఖ్యంగా రెండో దశ ల్యాండ్ పూలింగ్ కార్యక్రమానికి సంబంధించిన అన్ని ఏర్పాట్లు పూర్తి చేశామని తెలిపారు.
గతంలో ల్యాండ్ పూలింగ్కు భూములు ఇచ్చిన రైతులకు ప్రభుత్వం ఇచ్చిన అన్ని ప్రయోజనాలు, బెనిఫిట్స్ ఈ సారి కూడా యథావిధిగా వర్తిస్తాయని మంత్రి స్పష్టం చేశారు. రైతులు ఏ మాత్రం ఆందోళన చెందాల్సిన అవసరం లేదని, ప్రభుత్వం రైతుల నమ్మకాన్ని నిలబెట్టుకుంటుందని చెప్పారు. అమరావతి అభివృద్ధి కోసం ప్రభుత్వము తీసుకుంటున్న చర్యల పట్ల ప్రజలు పూర్తిగా విశ్వాసం ఉంచాలని కోరారు.
అమరావతి మండలంలోని గ్రామాల్లో మొత్తం 7,542 ఎకరాలు, అలాగే తుళ్లూరు మండలంలోని గ్రామాల్లో 9,97.57 ఎకరాల భూమిని రెండో దశ ల్యాండ్ పూలింగ్ కింద తీసుకోనున్నట్లు ప్రకటించారు. ఈ ప్రక్రియ పూర్తిగా పారదర్శకంగా జరుగుతుందని, గ్రామాల్లో అధికారులు సమావేశాలు నిర్వహించి రైతులకు పూర్తి వివరాలు చెబుతున్నారని తెలిపారు. గ్రామస్థులతో నేరుగా మాట్లాడి వారి అభిప్రాయాలను తెలుసుకుంటున్నామని, ఎలాంటి బలవంతం జరగదని స్పష్టం చేశారు.
అంతర్జాతీయ ఎయిర్పోర్ట్ ఏర్పాటుతో అమరావతి నిజంగా ప్రపంచంలో గుర్తింపు పొందిన నగరంగా మారుతుందని మంత్రి నారాయణ అన్నారు. ప్రపంచం నలుమూలల నుంచి పెట్టుబడిదారులు, పరిశ్రమలు, టెక్నాలజీ కంపెనీలు రావాలంటే ఎయిర్ కనెక్టివిటీ అత్యంత ముఖ్యమని పేర్కొన్నారు. ఇతర రాష్టాలు అంతర్జాతీయ విమానాశ్రయాలు ఏర్పాటు చేసుకుని పెట్టుబడులు రాబడుతున్న ఉదాహరణలు మన ముందే ఉన్నాయని గుర్తు చేశారు.
అమరావతిని భారతదేశంలోనే ప్రముఖ అడ్మినిస్ట్రేటివ్, టెక్నాలజీ, ఎడ్యుకేషన్ హబ్గా తీర్చిదిద్దడం ప్రభుత్వ ప్రధాన లక్ష్యమని చెప్పారు. 2028 నాటికి అభివృద్ధి పనులను పూర్తి చేయాలని ప్రభుత్వం కట్టుబడి ఉందని పేర్కొన్నారు. అమరావతి అభివృద్ధి ఏపీలోని కోట్లాది మంది ప్రజల కల అని, ఆ కలను సాకారం చేసేందుకు ప్రభుత్వం అన్ని ప్రయత్నాలు చేస్తుందని ఆయన హామీ ఇచ్చారు.
రైతులు భూములు ఇచ్చి చేసిన మహత్తర త్యాగం వృథా కాకూడదని, అమరావతిని అంతర్జాతీయ స్థాయి నగరంగా తీర్చిదిద్దడమే రైతులకు నిజమైన గౌరవమని మంత్రి తెలిపారు. ప్రజలు, రైతులు, ప్రభుత్వం కలిసి పనిచేస్తే అమరావతి నిర్మాణం వేగంగా పూర్తవుతుందని నమ్ముతున్నానన్నారు.
