ఆదాయ పన్ను శాఖ విదేశాల్లో ఉన్న ఆస్తులను తమ ఐటీ రిటర్నుల్లో వెల్లడించని వారికి ప్రత్యేక హెచ్చరికలు పంపడానికి సిద్ధమైంది. 2025–26 ఆర్థిక సంవత్సరానికి వ్యక్తిగతంగా రిటర్నులు దాఖలు చేసిన వారిలో, విదేశీ ఆస్తులను చూపని 25 వేల మందిని అధికారులు గుర్తించారు. ఈ వివరాలు సేకరించిన తర్వాత, వారందరికీ త్వరలోనే ప్రత్యేక అలర్ట్లు పంపనున్నట్టు శాఖ ప్రకటించింది.
ఈ నెల నవంబర్ 28 నుంచి ఎంపిక చేసిన పన్ను చెల్లింపుదారులకు SMS మరియు ఈ-మెయిల్ ద్వారా నోటీసులు పంపబడతాయి. నోటీసు వచ్చినవారు తమ ఐటీఆర్ను పరిశీలించి, విదేశాల్లో ఉన్న ఆస్తులను చట్టపరంగా వెల్లడించాలనుకుంటే, డిసెంబర్ 31లోగా సవరించిన రిటర్న్ (Revised ITR) దాఖలు చేయాలని సూచించింది. గడువు లోపు సవరించని పక్షంలో, చట్టం ప్రకారం చర్యలు తప్పవని స్పష్టం చేసింది.
ఈ చర్యల కోసం ఆదాయ పన్ను శాఖ పెద్ద పెద్ద కంపెనీలతో కూడా సంప్రదింపులు జరిపింది. వారి ఉద్యోగుల్లో ఎవరికైనా విదేశీ ఆస్తులు ఉండి వాటిని ప్రకటించకపోతే, వారిని కూడా ఈ జాబితాలో చేర్చింది. ఇలా వివిధ వనరుల నుంచి సమాచారం సేకరించి, తప్పుచేసిన వారిని స్పష్టంగా గుర్తించినట్లు అధికారులు తెలిపారు.
గత ఆర్థిక సంవత్సరం 2024–25లో మొత్తం 24,678 మంది తమ ఐటీ రిటర్నులను సరిదిద్దుకొని మళ్లీ సమర్పించారు. ఈ సవరించిన రిటర్నులలో వెల్లడించిన విదేశీ ఆస్తుల మొత్తం విలువ ₹29,208 కోట్లు. దీనితో ప్రభుత్వం విదేశీ ఆస్తుల పర్యవేక్షణను మరింత కఠినం చేస్తోంది.
విదేశీ ఆస్తులను గడువు లోపు ప్రకటించకుండా దాచిపెట్టినట్లయితే, నల్లధన నిరోధక చట్టం ప్రకారం భారీ శిక్షలు ఎదుర్కోవాల్సి ఉంటుంది. ఇందులో ₹10 లక్షల జరిమానా, 30% పన్ను, అలాగే చెల్లించాల్సిన పన్నుపై 300% వరకు అదనపు జరిమానా విధించబడవచ్చు. అందువల్ల ఈ జాబితాలో ఉన్నవారు గడువు ముందు తప్పనిసరిగా తమ రిటర్నులను సవరించుకోవాలని అధికారులు సూచిస్తున్నారు.
