కో పైలట్ ను ఒమన్ బ్యాన్ చేసింది: UAE ఎలా రిక్రూట్ చేసింది? ఇన్వెస్టిగేషన్ అప్ డేట్స్ లో సంచలనాలు!
Flydubai Hijack Incident: ఫ్లై దుబాయ్ విమానంలో చోటుచేసుకున్న కాక్‌పిట్ అలజడి ఘటన వెనుక తీవ్రమైన అంతర్జాతీయ భద్రతా లోపాలు బయటపడ్డాయి. ఉగ్ర భావజాలం కారణంగా ఒమాన్ ఎయిర్ చేత నిషేధానికి గురైన కో-పైలట్ హమామ్ అల్ హమామి.. పూర్తిస్థాయి బ్యాక్‌గ్రౌండ్ వెరిఫికేషన్ లేకుండానే ఫ్లై దుబాయ్ కాక్పిట్లోకి ఎలా ప్రవేశించాడన్న అంశంపై దర్యాప్తు ముమ్మరమైంది. సిరియా లింకులు, సోషల్ మీడియా ఆధారాలు, ఏవియేషన్ నిబంధనల ఉల్లంఘనలపై ఇజ్రాయెల్ సహా అంతర్జాతీయ ఏజెన్సీలు విచారణ జరుపుతున్నాయి.
సిరియాలో గడిపిన కాలంలోనే తీవ్రవాద భావజాలం.. సోషల్ మీడియాలో అల్ ఖైదా ప్రచార వీడియోలు!
బ్యాక్‌గ్రౌండ్ వెరిఫికేషన్ లేకుండానే ఉద్యోగమా?.. ఫ్లై దుబాయ్ నియామకాలపై పెను అనుమానాలు!
దీని వెనుక ఎవరున్నా భారీ మూల్యం తప్పదు.. ఇజ్రాయెల్ ప్రధాని నెతన్యాహు తీవ్ర హెచ్చరిక!
UAE: ఫ్లై దుబాయ్ విమానంలో చోటుచేసుకున్న భద్రతా వైఫల్య ఘటన అంతర్జాతీయ విమానయాన రంగాన్ని తీవ్ర దిగ్భ్రాంతికి గురిచేస్తోంది. ది వాల్ స్ట్రీట్ జర్నల్, సీఎన్‌ఎన్ కథనాల ప్రకారం.. కాక్‌పిట్‌లో కూర్చుని తీవ్ర అలజడి సృష్టించిన ఒమానీ కో-పైలట్ హమామ్ అల్ హమామికి రాడికల్, తీవ్రవాద భావజాలాలు ఉన్నాయన్న కారణంతో ఒమాన్ ప్రభుత్వం ముందే అతనిపై విమానాలు నడపకుండా ఆంక్షలు విధించింది. ఒక దేశంలో భద్రతా ముప్పుగా గుర్తించి ఫ్లైయింగ్ విధుల నుంచి తొలగించిన వ్యక్తి, మరో అంతర్జాతీయ విమానయాన సంస్థ కాక్పిట్లోకి ఎలా ప్రవేశించాడన్నది ప్రపంచవ్యాప్తంగా తీవ్ర ప్రశ్నలను లేవనెత్తుతోంది.
ఒమాన్ ఎయిర్ బ్యాన్ – అనుమానాస్పద నేపథ్యం
ఒమాన్-సిరియా సంతతికి చెందిన 29 ఏళ్ల హమామ్ అల్ హమామి ఒమాన్ ఎయిర్‌లో సుదీర్ఘకాలం పనిచేసినట్లు రికార్డులు వెల్లడిస్తున్నాయి. అయితే కో-పైలట్ శిక్షణ సమయంలో అతని వద్ద తీవ్రవాదానికి సంబంధించిన అనుమానాస్పద సమాచారం, మెటీరియల్స్ బయటపడటంతో అతన్ని ఫ్లైయింగ్ విధుల నుంచి తప్పించి అడ్మినిస్ట్రేటివ్ పనులకే పరిమితం చేశారు. ఆ తర్వాత అతను ఒమాన్ ఎయిర్‌ను వీడి మొరాకోకు చెందిన రాయల్ ఎయిర్ మరోక్‌లో చేరడం, ఆపై తాజాగా ఫ్లై దుబాయ్‌లో ఫస్ట్ ఆఫీసర్‌గా నియమితుడు కావడం గమనార్హం.
సిరియా లింకులు – తీవ్రవాద ప్రచారం
విచారణ సంస్థల సమాచారం ప్రకారం హమామ్ గతంలో సిరియాలో ఎక్కువ కాలం గడపడం వల్లనే ఐసిస్, అల్ ఖైదా వంటి తీవ్రవాద భావజాలాలకు ఎక్కువగా ప్రభావితమైనట్లు అనుమానిస్తున్నారు. అతని సోషల్ మీడియా ఖాతాలను పరిశీలించగా ఎయిర్‌క్రాఫ్ట్ ఫుటేజీలతో పాటు మాజీ అల్ ఖైదా నేతల ఫోటోలు, రెచ్చగొట్టే పోస్టులు ఉన్నట్లు గుర్తించారు. కాక్‌పిట్ ఘటన జరిగిన కొద్ది గంటల తర్వాత కూడా అతని ప్రొఫైల్స్ నుంచి పోస్టులు రావడంతో, ఈ వ్యవహారం వెనుక ఇతర వ్యక్తులు లేదా నిర్దిష్ట నెట్‌వర్క్ సహకారం ఉండి ఉండవచ్చని దర్యాప్తు బృందాలు భావిస్తున్నాయి.
ఫ్లై దుబాయ్ నియామకాలపై వెల్లువెత్తుతున్న ప్రశ్నలు
బోయింగ్ 737 వంటి ప్రయాణికుల విమానాన్ని నడిపే బాధ్యతను అప్పగించే ముందు అంతర్జాతీయ విమానయాన సంస్థలు అత్యంత కఠినమైన బ్యాక్‌గ్రౌండ్ వెరిఫికేషన్ ప్రక్రియను నిర్వహిస్తాయి. అతని గత రికార్డులను ఫ్లై దుబాయ్ ఎందుకు పూర్తిగా పరిశీలించలేకపోయింది, ఒమాన్ ఎయిర్ జారీ చేసిన భద్రతా హెచ్చరికలు ఫ్లై దుబాయ్‌కి ఎందుకు చేరలేదు అన్నది ప్రధాన మిస్టరీగా మారింది. ఏవియేషన్ నిబంధనలను ఉద్దేశపూర్వకంగా పక్కన పెట్టి అతన్ని నియమించారా లేక సమాచార మార్పిడి లోపమా అన్న కోణంలో ఐదు ప్రధాన కారణాలను విచారణ అధికారులు పరిశీలిస్తున్నారు.
ఇజ్రాయెల్ భద్రతా నిబంధనల ఉల్లంఘన
ఇజ్రాయెల్‌తో అధికారిక దౌత్య సంబంధాలు లేని దేశాల పైలట్లను టెల్ అవీవ్‌కు వెళ్లే విమానాలలో అనుమతించరాదన్న నిబంధనలు ఉన్నప్పటికీ, ఈ నిబంధనలు క్షేత్రస్థాయిలో ఉల్లంఘనకు గురయ్యాయి. విమానంలో ప్రయాణించిన డాక్టర్ షోటా ముసేవ్ అనే ప్రత్యక్ష సాక్షి మాట్లాడుతూ, నిందితుడిని ప్రయాణికులు నిలువరించిన సమయంలో అతను తీవ్ర అసహనంతో వ్యవహరించినట్లు తెలిపారు. ఈ ఘటనపై స్పందించిన ఇజ్రాయెల్ ప్రధాని బెంజమిన్ నెతన్యాహు.. దీని వెనుక ఉద్దేశపూర్వక కుట్ర ఉంటే తీవ్ర పరిణామాలు ఉంటాయని, భారీ మూల్యం చెల్లించుకోవాల్సి వస్తుందని తీవ్రంగా హెచ్చరించారు.
అంతర్జాతీయ ఏవియేషన్‌లో ‘ఇన్‌సైడ్ థ్రెట్’ కలకలం
విమానయాన రంగంలో కాక్‌పిట్ యాక్సెస్ కలిగి ఉండే సిబ్బంది ద్వారా తలెత్తే అంతర్గత ముప్పును (ఇన్‌సైడ్ థ్రెట్) ఎదుర్కోవడం ఎయిర్‌లైన్స్ భద్రతా వ్యవస్థకు సవాలుగా మారింది. విమానం గాలిలోకి ఎగరడానికి ముందే గ్రౌండ్ లెవెల్‌లో తీసుకున్న తప్పుడు నిర్ణయాలు, నిర్లక్ష్యమే వందలాది మంది ప్రయాణికుల ప్రాణాలను ప్రమాదంలోకి నెట్టే పరిస్థితికి దారితీశాయి. ప్రస్తుతం యూఏఈ దర్యాప్తు సంస్థలతో పాటు అంతర్జాతీయ ఇంటెలిజెన్స్ ఏజెన్సీలు నిందితుడి కాల్ రికార్డులు, ఆర్థిక లావాదేవీలు, గత ప్రయాణాలపై సమగ్ర విచారణ జరుపుతున్నాయి.
