Oppo F33 5G: భారత స్మార్ట్ఫోన్ మార్కెట్లో తనకంటూ ఒక ప్రత్యేక గుర్తింపు తెచ్చుకున్న ఒప్పో త్వరలో మరో శక్తివంతమైన సిరీస్ను లాంచ్ చేసేందుకు సిద్ధమైంది. 'ఒప్పో F33 5G' పేరుతో రాబోతున్న ఈ సిరీస్ గురించి గత కొన్ని రోజులుగా సోషల్ మీడియాలో భారీ చర్చ నడుస్తోంది. ముఖ్యంగా ఈ ఫోన్లలో ఇచ్చే బ్యాటరీ సామర్థ్యం వింటే ఎవరైనా షాక్ అవ్వాల్సిందే. ఏకంగా 7,000mAh భారీ బ్యాటరీని ఈ ఫోన్లలో అమర్చబోతున్నట్లు కంపెనీ ఇప్పటికే హింట్ ఇచ్చింది. ఏప్రిల్ 15వ తేదీన ఈ కొత్త స్మార్ట్ఫోన్లు భారత మార్కెట్లోకి అడుగుపెట్టనున్నాయి.
ఈ సిరీస్లో భాగంగా 'ఒప్పో F33 5G', 'ఒప్పో F33 Pro 5G' అనే రెండు మోడల్స్ అందుబాటులోకి రానున్నాయి. వీటి ధరలు రూ. 25,000 నుండి రూ. 35,000 మధ్యలో ఉండే అవకాశం ఉంది. మధ్యతరగతి వినియోగదారులను ఆకర్షించడమే లక్ష్యంగా ఒప్పో ఈ ఫోన్లను డిజైన్ చేసినట్లు తెలుస్తోంది. ప్రస్తుతం ఉన్న పోటీ ప్రపంచంలో, తక్కువ ధరలో ఎక్కువ ఫీచర్లు ఇచ్చేందుకు కంపెనీ గట్టి ప్రయత్నమే చేస్తోంది. ముఖ్యంగా యువతను ఆకట్టుకునేలా ఈ ఫోన్ల డిజైన్ కలర్ ఆప్షన్లు ఉండబోతున్నాయి.
ఇక ఈ ఫోన్ల ప్రత్యేకత విషయానికి వస్తే, వీటి మన్నిక గురించి గట్టిగా చెప్పుకోవాలి. ఈ స్మార్ట్ఫోన్లు IP69K సర్టిఫికేషన్తో వస్తున్నాయి. అంటే వీటిపై దుమ్ము పడినా, నీళ్లలో మునిగినా ఏమీ కాదని కంపెనీ ధీమా వ్యక్తం చేస్తోంది. విపరీతమైన ఎండ ఉన్నా లేదా గడ్డకట్టే చలి ఉన్నా ఈ ఫోన్లు తట్టుకోగలవట. ఫోన్ చేతిలో నుంచి కింద పడినా స్క్రీన్ పగలకుండా ఉండేలా 'మిలిటరీ గ్రేడ్' పరీక్షలు నిర్వహించినట్లు ఒప్పో ప్రతినిధులు వెల్లడించారు. ఫోన్ అంచులు మెటల్ ఫ్రేమ్తో స్ట్రాంగ్గా ఉంటాయని సమాచారం.
కెమెరాల విషయానికి వస్తే, ఫోటోగ్రఫీ ప్రియులకు ఒప్పో ఎప్పుడూ నిరాశ పరచదు. ఈ F33 ప్రో మోడల్లో 50 మెగాపిక్సెల్ మెయిన్ కెమెరా ఉండబోతోంది. సెల్ఫీల కోసం కూడా 50 మెగాపిక్సెల్ వైడ్ యాంగిల్ కెమెరాను ఇవ్వడం విశేషం. దీనివల్ల ఎక్కువ మంది కలిసి గ్రూప్ సెల్ఫీలు తీసుకునేటప్పుడు అందరూ స్పష్టంగా కనిపిస్తారు. ఇక ఇందులోని AI ఫీచర్లు తక్కువ వెలుతురులో కూడా అద్భుతమైన ఫోటోలను తీయడానికి సహాయపడతాయి. వీడియోలు తీసే వారికి డ్యూయల్ వ్యూ వీడియో ఆప్షన్ కూడా ఉంది.
ఈ ఫోన్ల పర్ఫార్మెన్స్ అదిరిపోతుందని టెక్ వర్గాలు చెబుతున్నాయి. మీడియాటెక్ 6360 మాక్స్ చిప్సెట్తో పాటు ఆండ్రాయిడ్ 16 ఆధారిత కలర్ ఓఎస్ 16 (ColorOS 16) పై ఇవి నడుస్తాయి. 80 వాట్ల ఫాస్ట్ ఛార్జింగ్ సపోర్ట్ ఉండటం వల్ల, 7,000mAh బ్యాటరీని కూడా చాలా త్వరగా ఛార్జ్ చేసుకోవచ్చు. ఒక్కసారి ఫుల్ ఛార్జ్ చేస్తే కనీసం రెండు రోజుల పాటు నిరంతరాయంగా వాడుకోవచ్చని కంపెనీ చెబుతోంది. మొత్తం మీద, తక్కువ ధరలో ప్రీమియం ఫీచర్లు కోరుకునే వారికి ఈ ఒప్పో F33 సిరీస్ ఒక మంచి ఆప్షన్ కానుంది.
