Jio: 84 రోజుల వ్యాలిడిటీతో జియో కొత్త 4జీ ప్లాన్.. ఉచితంగా గూగుల్ AI ప్రో!

జియో వినియోగదారులకు గుడ్ న్యూస్.. రెండు బడ్జెట్ ప్లాన్లలో అదిరే బెనిఫిట్స్..

5జీ లేకపోయినా అదిరే ఆఫర్లు.. జియో 4జీ ప్లాన్లపై వినియోగదారుల ఆసక్తి..

తక్కువ ధరలో ఎక్కువ ప్రయోజనాలు అందించే ప్రీపెయిడ్ ప్లాన్ల కోసం చూస్తున్న వినియోగదారులకు రిలయన్స్ జియో రెండు ఆకర్షణీయమైన ఎంపికలను అందిస్తోంది. రూ.889, రూ.666 ప్రీపెయిడ్ ప్లాన్లు 5జీ సేవలను కలిగి లేకపోయినా, హైస్పీడ్ 4జీ డేటాతో పాటు దీర్ఘకాల వ్యాలిడిటీ, అపరిమిత కాలింగ్, అదనపు డిజిటల్ సబ్స్క్రిప్షన్లను అందిస్తున్నాయి.

రూ.889 ప్లాన్లో ఏమేం ఉన్నాయి?
జియో రూ.889 ప్రీపెయిడ్ ప్లాన్ 84 రోజుల వ్యాలిడిటీతో అందుబాటులో ఉంది. ఈ ప్లాన్లో వినియోగదారులకు ప్రతిరోజూ 1.5 జీబీ హైస్పీడ్ 4జీ డేటా లభిస్తుంది. అలాగే రోజుకు 100 ఎస్ఎంఎస్లు, అన్ని నెట్వర్క్లకు అపరిమిత వాయిస్ కాలింగ్ సౌకర్యం కూడా ఉంటుంది.

ఈ ప్లాన్లో ప్రత్యేకంగా జియో సావన్ ప్రో సబ్స్క్రిప్షన్ను ఉచితంగా అందిస్తున్నారు. అంతేకాకుండా, 18 నెలల పాటు గూగుల్ AI ప్రో ప్లాన్ కూడా ఉచితంగా లభిస్తుంది. ఇందులో జెమినై ప్రో సేవలను వినియోగించే అవకాశం ఉంటుంది. కంపెనీ వివరాల ప్రకారం, ఈ ప్రయోజనం విలువ సుమారు రూ.35,100 వరకు ఉంటుంది. అయితే రోజువారీ 1.5 జీబీ డేటా పూర్తయిన తర్వాత ఇంటర్నెట్ వేగం 64 Kbpsకు తగ్గుతుంది.

రూ.666 ప్లాన్ కూడా మంచి ఎంపికే 
జియో సావన్ ప్రో అవసరం లేని వారికి రూ.666 ప్రీపెయిడ్ ప్లాన్ మరో ప్రత్యామ్నాయంగా ఉంటుంది. ఈ ప్లాన్ 70 రోజుల వ్యాలిడిటీతో వస్తుంది. ఇందులో కూడా రోజుకు 1.5 జీబీ 4జీ డేటా, అపరిమిత వాయిస్ కాలింగ్, రోజుకు 100 ఎస్ఎంఎస్లు అందుబాటులో ఉంటాయి. ఈ ప్లాన్లో కూడా 18 నెలల పాటు గూగుల్ AI ప్రో సబ్స్క్రిప్షన్ను ఉచితంగా అందిస్తున్నారు. అయితే రూ.889 ప్లాన్తో పోలిస్తే వ్యాలిడిటీ 14 రోజులు తక్కువగా ఉంటుంది.

ఏ ప్లాన్ ఎవరికి? 
ఎక్కువ రోజుల వ్యాలిడిటీతో పాటు జియో సావన్ ప్రో సబ్స్క్రిప్షన్ కూడా కావాలనుకునే వారికి రూ.889 ప్లాన్ అనుకూలంగా ఉంటుంది. కేవలం రోజువారీ డేటా, కాలింగ్ వంటి ప్రాథమిక అవసరాలకే పరిమితం కావాలనుకునే వారు తక్కువ ధరలో రూ.666 ప్లాన్ను ఎంచుకోవచ్చు.

ఈ రెండు ప్లాన్లలోనూ 5జీ సేవలు లేకపోయినా, 4జీ నెట్వర్క్లో స్థిరమైన డేటా సేవలు, అపరిమిత కాలింగ్, గూగుల్ AI ప్రో వంటి అదనపు ప్రయోజనాలు వినియోగదారులకు మంచి విలువను అందిస్తున్నాయి. తమ అవసరాలు, బడ్జెట్కు అనుగుణంగా ఈ రెండు ప్లాన్లలో ఏదైనా ఒకదాన్ని ఎంచుకోవచ్చు.