Agentic phone: స్మార్ట్‌ఫోన్ హిస్టరీలోనే బిగ్ చేంజ్.. మొదటి ఏజెంటిక్ మొబైల్‌ను లాంచ్ చేసిన చైనా.! ఇందులో అంత స్పెషల్‌ ఏముంది?

• ఏఐ అసిస్టెంట్ స్వయంగా పనులు పూర్తి చేస్తుందన్న సంస్థ..
  
  
• Gadgets: స్టెప్ఫన్ నుంచి ‘స్టెప్ఎక్స్ నియో’ ఫోన్ ఆవిష్కరణ..

Agentic phone: చైనాకు చెందిన ప్రముఖ ఆర్టిఫీషియల్ ఇంటెలిజెన్స్ (ఏఐ) స్టార్టప్ సంస్థ స్టెప్ఫన్ టెక్నాలజీ ప్రపంచంలోనే సరికొత్త విప్లవానికి తెరలేపుతూ ప్రపంచంలోనే తొలి ఏజెంటిక్ స్మార్ట్ఫోన్గా ‘స్టెప్ఎక్స్ నియో’ (StepX Neo)ను అధికారికంగా ఆవిష్కరించింది. మొబైల్ రంగంలో సరికొత్త సాంకేతిక యుగాన్ని పరిచయం చేస్తూ యూజర్ తరఫున స్వయంగా పలు రోజువారీ డిజిటల్ పనులను పూర్తి చేయగల అధునాతన ఏఐ అసిస్టెంట్ను ఈ ఫోన్లో అందుబాటులోకి తీసుకొచ్చినట్లు సంస్థ సగర్వంగా ప్రకటించింది.

సాధారణ ఫోన్లలో లాగా వినియోగదారులు ప్రతి చిన్న అవసరానికి ఒక్కో యాప్లోకి విడివిడిగా వెళ్లి పనులు చేయాల్సిన అవసరం లేకుండా, కేవలం ఒకే ఒక్క వాయిస్ లేదా టెక్స్ట్ ఆదేశంతో అనేక యాప్లను ఏకకాలంలో సమన్వయం చేసుకుంటూ పనులను వేగంగా పూర్తి చేసేలా ఈ వినూత్న ఫోన్ను రూపొందించినట్లు వెల్లడించింది.

ఈ స్మార్ట్ఫోన్లో ‘స్టెప్ అమూ’ (Step Amu) పేరుతో ఒక ప్రత్యేకమైన, స్వతంత్ర ఏఐ అసిస్టెంట్ను అమర్చడం విశేషం. ఇది మార్కెట్లో లభించే సాధారణ ఏఐ చాట్బాట్ల తరహాలో కాకుండా నేరుగా ఫోన్ ఆపరేటింగ్ సిస్టమ్లోనే అంతర్భాగంగా ఉండి పనిచేస్తుంది. వినియోగదారులు తమ సహజ భాషలో ఇచ్చే ఆదేశాలను ఖచ్చితంగా అర్థం చేసుకొని, ఫోన్లోని వివిధ యాప్ల మధ్య సమర్థవంతమైన సమన్వయం కుదురుస్తూ అత్యంత క్లిష్టమైన పనులను సైతం క్షణాల్లో పూర్తి చేస్తుంది.

ఉదాహరణకు ఒక నిర్దిష్ట ప్రాంతానికి ప్రయాణం ప్లాన్ చేయమని ఈ అసిస్టెంట్కు చెబితే.. అది స్వయంగా విమాన టికెట్లు వెతకడం, బడ్జెట్కు సరిపోయే హోటళ్లను సూచించడం, యాప్ల ద్వారా బుకింగ్లు పూర్తి చేయడం మరియు ప్రయాణ వివరాలను క్యాలెండర్లో సేవ్ చేయడం వంటి పనులన్నింటినీ మానవ ప్రమేయం లేకుండా తానే స్వయంగా నిర్వహించగలదని కంపెనీ స్పష్టం చేసింది.

అంతేకాకుండా అంతర్జాతీయ ప్రయాణికులకు ఎంతగానో ఉపయోగపడేలా ఈ ఫోన్లో 32 విభిన్న భాషలు మరియు వివిధ ప్రాంతీయ మాండలికాల్లో ప్రత్యక్ష అనువాదం (రియల్-టైమ్ ట్రాన్స్లేషన్) చేసే అద్భుతమైన సదుపాయాన్ని కూడా కల్పించారు. ముఖాముఖి ప్రత్యక్ష సంభాషణలు, ఫోన్ కాల్స్, సందేశాలు మాత్రమే కాకుండా కెమెరాతో స్కాన్ చేసిన టెక్స్ట్ను కూడా ఇది తక్షణమే కావలసిన భాషలోకి అనువదించగలదని సంస్థ పేర్కొంది.

కేవలం అనువాదానికే పరిమితం కాకుండా వినియోగదారులు వెళ్ళే ప్రదేశాలలోని స్థానిక రవాణా వివరాలు, సమీప పర్యాటక ప్రాంతాలు, ఆఫ్లైన్లో సేవ్ చేసిన ప్రయాణ ప్రణాళికలు, ఫ్లైట్ చెక్-ఇన్ రిమైండర్లు, వీసా సమాచారం మరియు ఎయిర్పోర్ట్ కస్టమ్స్ పత్రాలకు సంబంధించిన సమగ్ర సాయాన్ని కూడా ఈ ఏఐ అసిస్టెంట్ ఎప్పటికప్పుడు అందిస్తుందని వెల్లడించింది.

సాంకేతికంగా ఈ స్మార్ట్ఫోన్ స్టెప్ఫన్ సంస్థ ప్రత్యేకంగా రూపొందించిన 'స్టెప్ ఏఓఎస్' (Step AOS) ఆపరేటింగ్ సిస్టమ్పై రన్ అవుతుంది. వినియోగదారుల డేటా భద్రతకు పెద్దపీట వేస్తూ ఫోన్లోనే నేరుగా ఏఐ ప్రాసెసింగ్ జరిగేలా ఒక శక్తివంతమైన ప్రత్యేక ఫౌండేషన్ మోడల్ను పరికరంలోనే అభివృద్ధి చేసినట్లు కంపెనీ వివరించింది.

దాంతోపాటు చైనాలోని అత్యంత ప్రాచుర్యం పొందిన సేవలైన సీట్రిప్, అలీపే, డిడీ, మీటువాన్, డబ్ల్యూపీఎస్ ఆఫీస్, క్యాప్కట్ వంటి ప్రముఖ డిజిటల్ ప్లాట్ఫారమ్లతో సంస్థ వ్యూహాత్మక భాగస్వామ్యం కుదుర్చుకుందని, దీనివల్ల ఈ ఫోన్ ఏఐ అసిస్టెంట్ మరింత సమర్థవంతంగా థర్డ్ పార్టీ యాప్స్ సేవలను కూడా వినియోగదారుల ఆదేశాలకు అనుగుణంగా స్వయంగా నిర్వహించగలదని స్టెప్ఫన్ ప్రతినిధులు ధీమా వ్యక్తం చేశారు.