Ram Charan: 'పెద్ది' చిత్రానికి మద్రాస్ హైకోర్టు బిగ్ రిలీఫ్: ఆన్లైన్ పైరసీపై ముందస్తు నిషేధ ఉత్తర్వులు!
Ram Charan: రామ్ చరణ్ హీరోగా వచ్చే నెలలో విడుదలవుతున్న 'పెద్ది' చిత్రం ఆన్లైన్ పైరసీకి అడ్డుకట్ట వేయడానికి మద్రాస్ హైకోర్టు కీలక ఉత్తర్వులు జారీ చేసింది. ఇంటర్నెట్లో ఈ చిత్రాన్ని చట్టవిరుద్ధంగా అప్లోడ్ చేయకూడదని, కాపీ చేయకూడదని, ప్రసారం చేయకూడదని, విడుదల చేయకూడదంటూ కోర్టు పైర…
- సినిమా అనధికారికంగా లీక్ అయితే నిర్మాతలకు నష్టం వాటిల్లుతుందన్న హైకోర్టు..
- Cinema: యాంటీ పైరసీ ఇంజంక్షన్ జారీ చేసిన మద్రాస్ హైకోర్టు..
Ram Charan: మెగా పవర్స్టార్ రామ్ చరణ్ హీరోగా, ఉప్పెన ఫేమ్ బుచ్చిబాబు సానా దర్శకత్వంలో అత్యంత ప్రతిష్టాత్మకంగా తెరకెక్కిన క్రీడా నేపథ్య యాక్షన్ డ్రామా 'పెద్ది' (Peddi) చిత్రం వచ్చే నెల జూన్ 4వ తేదీన ప్రపంచవ్యాప్తంగా భారీ ఎత్తున విడుదలవుతున్న నేపథ్యంలో, ఈ సినిమా ఆన్లైన్ పైరసీ బారిన పడకుండా అడ్డుకట్ట వేయడానికి మద్రాస్ హైకోర్టు అత్యంత కీలకమైన ఉత్తర్వులు జారీ చేసింది. విడుదలకు ముందే ఇంటర్నెట్లో ఈ బిగ్ బడ్జెట్ చిత్రాన్ని చట్టవిరుద్ధంగా, అనధికారికంగా ఎలాంటి డిజిటల్ ప్లాట్ఫారమ్లలో అప్లోడ్ చేయకూడదని, కాపీ చేయకూడదని, ప్రసారం చేయకూడదని లేదా విడుదల చేయకూడదంటూ న్యాయస్థానం స్పష్టమైన పైరసీ నిరోధక ఉత్తర్వులను (Anti-Piracy Injunction) జారీ చేసింది. సినిమా విడుదలకు ముందే కాపీరైట్ హక్కుల రక్షణకు సంబంధించి చిత్ర నిర్మాణ సంస్థ 'వృద్ధి సినిమాస్' దాఖలు చేసిన అత్యవసర పిటిషన్పై హైకోర్టు వెకేషన్ బెంచ్ న్యాయమూర్తి జస్టిస్ వి. లక్ష్మీనారాయణన్ సుదీర్ఘంగా విచారణ జరిపారు. చిత్ర నిర్మాతలు పడిన కష్టాన్ని, పెట్టిన భారీ పెట్టుబడిని పరిగణనలోకి తీసుకున్న న్యాయస్థానం.. ఒకవేళ ఈ సినిమా గనుక అనధికారికంగా ఇంటర్నెట్ లేదా సోషల్ మీడియా ద్వారా లీక్ అయితే నిర్మాతలకు కోలుకోలేని విధంగా భారీ నష్టం మరియు తీవ్రమైన పక్షపాతం వాటిల్లుతుందని స్పష్టం చేస్తూ, ఈ సినిమాకు పూర్తి రక్షణ కల్పిస్తూ 'అశోక్ కుమార్ ఆర్డర్' (యాంటీ పైరసీ ఇంజంక్షన్) జారీ చేస్తున్నట్లు ప్రకటించింది.
సినిమా పరిశ్రమను సుదీర్ఘ కాలంగా వేధిస్తున్న పైరసీ భూతానికి అడ్డుకట్ట వేసే ఈ 'యాంటీ పైరసీ ఇంజంక్షన్' లేదా డైనమిక్ ఇంజంక్షన్ అనేది కాపీరైట్ హక్కుదారులు తమ సినిమా లేదా వెబ్ సిరీస్ కంటెంట్లు అక్రమంగా దొంగిలించబడకుండా, వివిధ పైరసీ వెబ్సైట్లలో ప్రసారం కాకుండా న్యాయస్థానాల ద్వారా ముందస్తుగా పొందే ఒక అత్యున్నత చట్టపరమైన రక్షణ ఉత్తర్వు. సాధారణంగా పైరసీదారులు ఒక వెబ్సైట్ను అధికారులు బ్లాక్ చేసిన వెంటనే, కేవలం డొమైన్ పేరు మార్చి సరికొత్త యూఆర్ఎల్ (URL) లేదా ప్రాక్సీ లింక్లతో అదే సినిమా కంటెంట్ను మళ్లీ ఇంటర్నెట్ లోకి తెస్తుంటారు. ఇలాంటి అక్రమ చర్యలను సమూలంగా నిరోధించడానికి కోర్టులు జారీ చేసే ఈ ప్రత్యేక 'డైనమిక్ ఇంజంక్షన్' ఉత్తర్వుల ద్వారా, పైరసీదారులు సృష్టించే ఎలాంటి కొత్త సైట్లనైనా ఇంటర్నెట్ సర్వీస్ ప్రొవైడర్లు (ISPs) ఆటోమేటిక్గా, తక్షణమే బ్లాక్ చేయడానికి పూర్తి చట్టపరమైన అధికారాలు లభిస్తాయి. జూన్ మొదటి వారంలో థియేటర్లలోకి రాబోతున్న 'పెద్ది' చిత్ర బృందం ఇలాంటి ముందస్తు న్యాయపరమైన జాగ్రత్తలు తీసుకోవడంపై చిత్ర పరిశ్రమ వర్గాలు మరియు సినీ విశ్లేషకులు హర్షం వ్యక్తం చేస్తున్నారు.
Be the first to react
