అంగవైకల్యం ఉన్న విద్యార్థులు ఉన్నత విద్యను కొనసాగించాలంటే ఎదురయ్యే పెద్ద అడ్డంకి ఆర్థిక సమస్యలే. ప్రతిభ, ఆసక్తి ఉన్నా సరైన ఆర్థిక మద్దతు లేకపోవడంతో చాలామంది విద్యార్థులు తమ చదువును మధ్యలోనే ఆపేయాల్సిన పరిస్థితులు దేశవ్యాప్తంగా కనిపిస్తున్నాయి. ఇలాంటి నేపథ్యంలో ఆ విద్యార్థులకు ఒక ఆశాకిరణంగా నిలుస్తోంది ఆధార్ కౌశల్ స్కాలర్షిప్ ప్రోగ్రామ్ 2025–26. ఈ స్కాలర్షిప్ ద్వారా భౌతిక వైకల్యం ఉన్న అండర్గ్రాడ్యుయేట్ విద్యార్థులకు ఆర్థిక సహాయం అందించి, వారు ఆత్మవిశ్వాసంతో చదువును కొనసాగించేలా చేయడమే ప్రధాన లక్ష్యంగా పెట్టుకున్నారు.
ఆధార్ కౌశల్ స్కాలర్షిప్ అనేది ప్రత్యేకంగా ఫిజికల్ డిసెబిలిటీ ఉన్న విద్యార్థుల కోసం రూపొందించిన విద్యా సహాయ పథకం. భారతదేశం అంతటా జనరల్ డిగ్రీలు గానీ, ప్రొఫెషనల్ అండర్గ్రాడ్యుయేట్ కోర్సులు గానీ చదువుతున్న విద్యార్థులు ఈ స్కాలర్షిప్కు దరఖాస్తు చేసుకోవచ్చు. విద్యార్థి ఏ సంవత్సరం చదువుతున్నాడన్నది అడ్డంకి కాదు. చదువులో సమాన అవకాశాలు కల్పించడం, వెనుకబడిన వర్గాలకు మద్దతుగా నిలవడం ఈ పథకం వెనుక ఉన్న ముఖ్య ఉద్దేశం.
ఈ స్కాలర్షిప్ను అందిస్తున్నది ఆధార్ హౌసింగ్ ఫైనాన్స్ లిమిటెడ్ తక్కువ ఆదాయ వర్గాలకు గృహ రుణాలు అందించే సంస్థగా పేరుగాంచిన ఈ కంపెనీ, సామాజిక బాధ్యతలో భాగంగా విద్య, సాధికారత రంగాల్లో కూడా అనేక కార్యక్రమాలు చేపడుతోంది. అందులో భాగంగానే ఆధార్ కౌశల్ స్కాలర్షిప్ను ప్రారంభించింది. విద్యే అభివృద్ధికి మార్గమని నమ్మే ఈ సంస్థ, ఆర్థిక ఇబ్బందులతో వెనుకబడుతున్న విద్యార్థులను ముందుకు తీసుకెళ్లేందుకు ఈ సహాయాన్ని అందిస్తోంది.
ఈ స్కాలర్షిప్కు దరఖాస్తు చేసుకునే విద్యార్థులు కొన్ని అర్హతలను తప్పనిసరిగా కలిగి ఉండాలి. దరఖాస్తుదారుడు భారత పౌరుడై ఉండాలి. ప్రభుత్వ గుర్తింపు పొందిన భౌతిక వైకల్య సర్టిఫికెట్ ఉండాలి. ప్రస్తుతం జనరల్ లేదా ప్రొఫెషనల్ అండర్గ్రాడ్యుయేట్ కోర్సులో చదువుతూ ఉండాలి. గత విద్యా సంవత్సరంలో కనీసం 60 శాతం మార్కులు సాధించి ఉండాలి. కుటుంబ వార్షిక ఆదాయం రూ.3 లక్షల లోపు ఉండాలి. టియర్–2, టియర్–3 పట్టణాలు లేదా చిన్న పట్టణాల నుంచి వచ్చే విద్యార్థులకు ఈ స్కాలర్షిప్లో ప్రత్యేక ప్రాధాన్యం ఇవ్వనున్నారు.
ఈ పథకం కింద ఎంపికైన విద్యార్థులకు రూ.10,000 నుంచి రూ.50,000 వరకు ఆర్థిక సహాయం అందించబడుతుంది. ఈ మొత్తం విద్యార్థి చదువుతున్న కాలేజీ ఫీజులు, ట్యూషన్ ఖర్చులు, పరీక్ష ఫీజులు వంటి విద్యా అవసరాల ఆధారంగా నిర్ణయిస్తారు. చదువు ఖర్చుల భారంతో ఇబ్బంది పడుతున్న కుటుంబాలకు ఇది పెద్ద ఊరటగా నిలుస్తోంది. విద్యార్థులు ఆర్థిక ఆందోళనల నుంచి బయటపడి పూర్తిగా చదువుపై దృష్టి పెట్టేందుకు ఈ సహాయం ఉపయోగపడుతుంది.
ఈ స్కాలర్షిప్కు దరఖాస్తు చేసుకునే చివరి తేదీ 13 జనవరి 2026. గడువు ముగిసిన తర్వాత దరఖాస్తులను స్వీకరించరు కాబట్టి అర్హులైన విద్యార్థులు ఆలస్యం చేయకుండా వెంటనే అప్లై చేయాలని సూచిస్తున్నారు. దరఖాస్తు ప్రక్రియ పూర్తిగా ఆన్లైన్లో జరుగుతుంది. Buddy4Study వెబ్సైట్లో లాగిన్ అయి “Aadhar Kaushal Scholarship Program 2025–26” అప్లికేషన్ ఫారమ్ను పూర్తి చేయాలి. అవసరమైన వివరాలు నమోదు చేసి, ఆధార్ కార్డు, మార్క్ షీట్లు, ఆదాయ ధృవీకరణ పత్రం, వైకల్య సర్టిఫికెట్ వంటి డాక్యుమెంట్లను అప్లోడ్ చేయాలి.
ఆధార్ కౌశల్ స్కాలర్షిప్ భౌతిక వైకల్యం ఉన్న విద్యార్థులకు చదువులో కొనసాగేందుకు ఆర్థిక భరోసా ఇచ్చే మంచి అవకాశం. సరైన సహాయం లభిస్తే ఈ విద్యార్థులు కూడా సమాజంలో ఉన్నత స్థానాలకు ఎదగగలరనే నమ్మకాన్ని ఈ పథకం బలపరుస్తోంది. మీరు అర్హులైతే లేదా మీకు తెలిసిన అర్హత ఉన్న విద్యార్థులు ఉంటే, ఈ అవకాశాన్ని తప్పకుండా ఉపయోగించుకోవాలని విద్యా నిపుణులు సూచిస్తున్నారు.
