నటి అనసూయ (anasuya) భరద్వాజ్ మరోసారి తన సోషల్ మీడియా పోస్టులతో విస్తృత చర్చకు దారి తీస్తున్నారు. ఇటీవల హీరోయిన్ రాశీకి సంబంధించిన వివాదంలో తన తప్పును అంగీకరిస్తూ క్షమాపణలు చెప్పిన అనసూయ, ఆ వెంటనే ఇన్స్టాగ్రామ్లో చేసిన ఓ ఆసక్తికర పోస్ట్ ఇప్పుడు హాట్ టాపిక్గా మారింది. “హీరోయిన్ అనేది తెరపై కనిపించే పాత్ర మాత్రమే కాదు. సత్యం మాట్లాడే ధైర్యం, సొంత దారిలో నడిచే శక్తి, సరైనదానికి నిలబడే గుండె – ఇవే నిజమైన హీరోయిన్ లక్షణాలు. మిగతావాళ్లు కేవలం నటులే” అంటూ ఆమె చేసిన వ్యాఖ్యలు నెటిజన్లలో కొత్త చర్చకు తెరలేపాయి. ఈ మాటలతో అనసూయ ఎవరిని ఉద్దేశించి మాట్లాడారో అనే ప్రశ్న సోషల్ మీడియాలో హల్చల్ చేస్తోంది.
ఈ వ్యవహారం మొత్తం ఇటీవల మొదలైన మహిళల వస్త్రధారణపై జరిగిన వివాదంతో ముడిపడి ఉంది. నటుడు శివాజీ చేసిన వ్యాఖ్యలు అప్పట్లో తీవ్ర చర్చనీయాంశంగా మారిన విషయం తెలిసిందే. వాటిపై స్పందిస్తూ హీరోయిన్ రాశీ ఓ వీడియో విడుదల చేశారు. గతంలో ఓ టీవీ కార్యక్రమంలో అనసూయ తనను కించపరిచేలా మాట్లాడారంటూ రాశీ ఆ వీడియోలో ఆవేదన వ్యక్తం చేశారు. ఆ వ్యాఖ్యలు తనను ఎంతగా బాధించాయో, అప్పట్లో తాను ఎంత ఒంటరిగా ఫీలయ్యానో రాశీ చెప్పుకొచ్చారు. ఈ వీడియో వెలువడిన తర్వాత అనసూయపై సోషల్ మీడియాలో విమర్శల వెల్లువెత్తింది.
ఈ క్రమంలోనే అనసూయ స్పందిస్తూ ఒక నోట్ విడుదల చేశారు. అప్పటి పరిస్థితుల్లో తాను సరైన విధంగా స్పందించలేకపోయానని, రాశీని నిలదీయాల్సిన ధైర్యం తనకు అప్పుడు లేదని ఆమె అంగీకరించారు. కాలక్రమంలో తనలో మార్పు వచ్చిందని, ఇప్పుడు మహిళల భద్రత, గౌరవం వంటి అంశాలపై గట్టిగా మాట్లాడుతున్నానని అనసూయ పేర్కొన్నారు. తన గత మాటలు ఇప్పుడు తనకే బాధ కలిగిస్తున్నాయని, వాటిని ఆధారంగా చేసుకుని తనపై ద్వేషపూరిత ప్రచారం జరుగుతోందని ఆమె ఆవేదన వ్యక్తం చేశారు. “వెనక్కి వెళ్లి ఆ రోజు జరిగినదాన్ని సరిదిద్దలేను. కానీ నా తప్పును అంగీకరిస్తూ బాధ్యతగా క్షమాపణ చెబుతున్నాను” అంటూ అనసూయ స్పష్టంగా చెప్పడం గమనార్హం.
ఈ క్షమాపణల అనంతరం ఆమె చేసిన తాజా పోస్ట్కు మరింత ప్రాధాన్యం ఏర్పడింది. నిజమైన హీరోయిన్ అంటే ఎవరు? గ్లామర్, ఫేమ్ కంటే విలువలు, ధైర్యం, నిజాయితీ ముఖ్యమా? అనే అంశాలపై ఆమె మాటలు పరోక్షంగా ప్రశ్నలు లేవనెత్తుతున్నాయనే అభిప్రాయం వ్యక్తమవుతోంది. గతంలో శివాజీ వ్యాఖ్యలకు గట్టిగా కౌంటర్ ఇచ్చిన అనసూయ, ఇప్పుడు ఈ పోస్ట్ ద్వారా మరోసారి తన అభిప్రాయాలను స్పష్టంగా వ్యక్తం చేసిందని అభిమానులు అంటున్నారు.
సోషల్ మీడియాలో అనసూయకు మద్దతుగా “నిజమైన హీరోయిన్ నిర్వచనం ఇదే”, “తప్పును అంగీకరించడం గొప్ప విషయం” అంటూ కామెంట్లు వస్తున్నాయి. మరోవైపు కొందరు మాత్రం ఈ పోస్ట్ కూడా ఇన్డైరెక్ట్గా వివాదాలకు దారి తీస్తోందని విమర్శిస్తున్నారు. ఏది ఏమైనా, అనసూయ చేసిన ఈ పోస్ట్ ఆమె వ్యక్తిత్వాన్ని, ఆమె తీసుకున్న మార్పు మార్గాన్ని ప్రతిబింబిస్తోందని చెప్పొచ్చు. తెరపై పాత్రలకే కాకుండా నిజ జీవితంలో కూడా ధైర్యంగా నిలబడే మహిళలే నిజమైన హీరోయిన్లు అన్న సందేశాన్ని ఆమె ఈ సందర్భంగా బలంగా వినిపించినట్టుగా కనిపిస్తోంది.
