- హిందీలో ఓకే.. తెలుగులో నో!: ధురంధర్ 2 ప్రీమియర్ల విషయంలో ఊహించని పరిణామం..
- 3 గంటల 49 నిమిషాల నిడివి.. భారీ అంచనాలు: కానీ ప్రీమియర్ షోలకు తప్పని సాంకేతిక అడ్డంకి..
Dhurandhar 2: రణవీర్ సింగ్ ప్రధాన పాత్రలో నటించిన అత్యంత భారీ అంచనాల చిత్రం ‘ధురంధర్: ది రివెంజ్’ తెలుగు రాష్ట్రాల్లోని ప్రేక్షకులకు ఊహించని షాక్ ఇచ్చింది. ఎంతో ఆసక్తిగా ఎదురుచూస్తున్న ఈ సినిమా పెయిడ్ ప్రీమియర్ షోలు చివరి నిమిషంలో రద్దు కావడంతో అభిమానులు తీవ్ర నిరాశకు గురయ్యారు. బుధవారం సాయంత్రం ప్రదర్శించాల్సిన తెలుగు వెర్షన్ షోలను పలు థియేటర్ల యాజమాన్యాలు సాంకేతిక కారణాల దృష్ట్యా రద్దు చేస్తున్నట్లు ప్రకటించాయి. ఇప్పటికే ఆన్లైన్ ద్వారా టికెట్లు బుక్ చేసుకున్న వారికి మెసేజ్ల ద్వారా సమాచారం అందిస్తూ, వారి డబ్బులను వాపసు (రీఫండ్) చేసే ప్రక్రియను ప్రారంభించాయి. సోషల్ మీడియాలో చాలామంది తమకు అందిన రీఫండ్ సందేశాలను స్క్రీన్ షాట్ల రూపంలో పంచుకుంటూ తమ అసహనాన్ని వ్యక్తం చేస్తున్నారు.
గతేడాది విడుదలైన ‘ధురంధర్’ మొదటి భాగం బాక్సాఫీస్ వద్ద సృష్టించిన ప్రభంజనం కారణంగా, ఈ సీక్వెల్ ‘ధురంధర్ 2’పై అంచనాలు తారాస్థాయిలో ఉన్నాయి. 2025లో అత్యధిక వసూళ్లు సాధించిన చిత్రంగా రికార్డు సృష్టించిన ఈ సినిమాను, మొదటి భాగంలా కేవలం హిందీకే పరిమితం చేయకుండా ఈసారి పాన్ ఇండియా స్థాయిలో తెలుగు, తమిళ, కన్నడ, మలయాళ భాషల్లోనూ విడుదల చేస్తున్నారు. ప్రపంచవ్యాప్తంగా రేపు భారీ ఎత్తున విడుదల కానున్న ఈ చిత్రం కోసం ఒకరోజు ముందుగానే ఇవాళ ప్రత్యేక ప్రీమియర్లను ప్లాన్ చేశారు. అయితే, కంటెంట్ డెలివరీలో ఏర్పడిన ఊహించని ఆలస్యం మరియు కొన్ని సాంకేతిక చిక్కుల వల్ల తెలుగు మరియు తమిళ వెర్షన్ల ప్రీమియర్లను రద్దు చేయాల్సి వచ్చినట్లు చిత్ర వర్గాల నుంచి సమాచారం అందుతోంది.
మరోవైపు, హిందీ వెర్షన్ ప్రీమియర్ షోలు మాత్రం దేశవ్యాప్తంగా యథాతథంగా ప్రదర్శితమవుతున్నాయి. తెలుగు ప్రేక్షకులు ఆందోళన చెందాల్సిన అవసరం లేదని, రేపటి నుండి హిందీతో పాటు తెలుగులోనూ రెగ్యులర్ షోలు అన్ని థియేటర్లలో అందుబాటులోకి వస్తాయని పంపిణీదారులు స్పష్టం చేశారు. ఆదిత్య ధర్ దర్శకత్వం వహించిన ఈ చిత్రం సుమారు 3 గంటల 49 నిమిషాల భారీ నిడివితో వస్తుండటం గమనార్హం. రణవీర్ సింగ్తో పాటు ఆర్. మాధవన్, సంజయ్ దత్, అర్జున్ రాంపాల్ వంటి దిగ్గజ నటులు కీలక పాత్రల్లో కనిపిస్తుండటంతో ఈ రివెంజ్ డ్రామా థియేటర్లలో ఏ స్థాయి విజయాన్ని అందుకుంటుందోనని సినీ ప్రియులు ఉత్కంఠగా ఎదురుచూస్తున్నారు.
