తెలుగు సినీ పరిశ్రమను చివరి కొన్ని సంవత్సరాలుగా తీవ్రంగా వేధించిన పైరసీ నెట్వర్క్ iBOMMAకు సంబంధించిన కీలక విషయాలు తాజాగా వెలుగుచూశాయి. కేవలం ఒక పైరసీ వెబ్‌సైట్ నిర్వాహకుడిగా మొదలైన ఇమ్మడి రవి, చాలా తక్కువ కాలంలోనే కోట్ల రూపాయలను సంపాదించారు, ఫ్రాన్స్‌ నుంచి భారత్‌కు వచ్చిన వెంటనే సీసీఎస్ పోలీసులు రవిని అరెస్ట్ చేసి, అతడి అకౌంట్లలోని రూ.3 కోట్ల మొత్తాన్ని ఫ్రీజ్ చేశారు. కానీ అతడికి ఈ స్థాయి ఆదాయం ఎలా వచ్చింది? కేవలం పైరసీతోనే కాదు, బెట్టింగ్ యాప్స్‌తో ఉన్న నెట్వర్క్ ద్వారా కూడా భారీగా డబ్బు సంపాదించినట్లు దర్యాప్తు అధికారులు వెల్లడిస్తున్నారు.
iBOMMA సైట్ ద్వారా సంగీతం, సినిమాలు, వెబ్‌సిరీస్ లాంటి కంటెంట్‌ను పైరసీ చేసి విడుదల చేయడం మాత్రమే కాకుండా, యూజర్లు సైట్‌ను ఓపెన్ చేసినపుడు కనిపించే గ్యాంబ్లింగ్, బెట్టింగ్ ప్రకటనల ద్వారా కూడా పెద్ద ఎత్తున ఆదాయం వచ్చేది. ప్రత్యేకించి 1XBet వంటి అంతర్జాతీయ బెట్టింగ్ యాప్స్‌ను ప్రమోట్ చేసినందుకు అతనికి పెద్ద మొత్తంలో చెల్లింపులు జరిగాయని అంచనా. దీనివల్ల ఆ యాప్స్‌కు లక్షలాది మంది యూజర్లు రీడైరక్ట్ అవుతారని, ఆ డేటా ద్వారా మళ్లీ రవికి కమిషన్ వస్తుందని అధికారులు చెబుతున్నారు. అంతేకాక, యూజర్ల మొబైల్, ఈమెయిల్, బ్రౌజింగ్ సమాచారాన్ని రహస్యంగా బెట్టింగ్ కంపెనీలకు విక్రయించిన సంఘటనలు కూడా విచారణలో బయటపడుతున్నాయి.
ఇవి అన్నీ బయటకు రావడంతో సినీ దర్శకుడు ఎస్‌.ఎస్‌.రాజమౌళి పైరసీపై తీవ్ర ఆగ్రహం వ్యక్తం చేశారు. ‘సినిమాలను పైరసీ చేసే వాళ్లు చేసేది సంఘ సేవ కాదే,’ అని రాజమౌళి స్పష్టం చేశారు. ప్రజల వ్యక్తిగత డేటాను నేరగాళ్లకు అమ్మడం ద్వారా మాత్రమే ఈ సైట్లు సంపాదిస్తున్నాయని ఆయన హెచ్చరించారు. ‘iBOMMA రవి అరెస్ట్ సినిమా సీన్ లానే ఉంది. విలన్ ఎన్ని ఛాలెంజ్‌లు చేసినా హీరో చివరికి పట్టుకుని జైలుకు పంపుతాడు. పైరసీ సైట్ల వల్ల మా పరిశ్రమకంటే ప్రజలకే ఎక్కువ నష్టం జరుగుతోంది. పైరసీ చూసి ప్రాణాల మీదకు తెచ్చుకోవద్దు,’ అని రాజమౌళి ప్రజలకు సూచించారు.
ఇక iBOMMA క్లోజ్ అయిన తర్వాత ఇప్పుడు నెట్టింట ట్రెండింగ్ ప్రశ్న MovieRulz ఎప్పుడు? ప్రస్తుతం తమిళ్ రాకర్స్, మూవీరుlz, ఫిల్మీజిల్లా వంటి ఇతర పైరసీ సైట్లపైనా చర్యలు తీసుకోవాలని సినీ అభిమానులు, నిర్మాతలు పెద్ద ఎత్తున సోషల్ మీడియాలో డిమాండ్ చేస్తున్నారు. ఇటీవల ప్రభుత్వాలు అంతర్జాతీయ సైబర్ నెట్వర్క్‌ల సహకారంతో పైరసీ గ్యాంగ్‌లను ట్రాక్ చేసే చర్యలను వేగవంతం చేశాయి. పైరసీ సైట్లు కేవలం సినిమా పరిశ్రమకు మాత్రమే కాకుండా, దేశవ్యాప్తంగా యూజర్ల డేటా భద్రతకు కూడా తీవ్రమైన ప్రమాదమని నిపుణులు హెచ్చరిస్తున్నారు.
ఈ పరిణామాలతో పైరసీపై యుద్ధం భారీ స్థాయికి చేరుకుంది. ఇండస్ట్రీ, పోలీస్ విభాగాలు, టెక్నికల్ టీమ్ కలిసి పైరసీ నెట్‌వర్క్‌ను పూర్తిగా అణచివేయడానికి పెద్ద ఎత్తున చర్యల్ని ప్రారంభించాయి. iBOMMAతో మొదలైన ఈ దాడులు మరికొన్ని సైట్లపై కూడా కొనసాగనున్నాయి.
