అమెరికా అధ్యక్షుడు డొనాల్డ్ ట్రంప్ తీసుకున్న తాజా వ్యాఖ్యలు ప్రపంచ రాజకీయాలను మరోసారి కుదిపేశాయి. రష్యా–ఉక్రెయిన్ యుద్ధం ముగియకపోవడం పట్ల అసహనం వ్యక్తం చేసిన ఆయన, మాస్కోపై ఆర్థిక ఒత్తిడి పెంచడానికి ముందు ఎన్నడూ వినిపించని రీతిలో కఠిన చర్యలు చేపట్టేందుకు సిద్ధమయ్యారు. ముఖ్యంగా రష్యాతో ఇప్పటికీ వాణిజ్య సంబంధాలు కొనసాగిస్తున్న దేశాలపై 500 శాతం వరకు టారిఫ్లు విధించే బిల్లుకు మద్దతు ఇస్తున్నానని ప్రకటించారు.
ట్రంప్ నిర్ణయం బయటకు వచ్చిన వెంటనే అంతర్జాతీయ వేదికలపై చర్చలు వేగంగా మారాయి. ట్రంప్ వ్యాఖ్యల ప్రకారం రష్యా నుంచి చమురు, వనరులు, ముడిసరుకులు కొనుగోలు చేస్తున్న దేశాలు మాస్కోకు ఆర్థిక బలం ఇస్తున్నాయని ఆయన ఆరోపిస్తున్నారు. ఈ బలం కారణంగానే రష్యా యుద్ధాన్ని దీర్ఘకాలంగా కొనసాగించగలుగుతోందని, కాబట్టి ఆర్థికంగా మాస్కోను బలహీనపరచడానికి ఇలాంటి కఠిన వాణిజ్య ఆంక్షలు తప్పనిసరిగానని ఆయన అభిప్రాయం.
ఈ నేపథ్యంలో వచ్చే బిల్లు అమలులోకి వస్తే, రష్యాతో వ్యాపారం చేస్తున్న అనేక దేశాల ఆర్థిక వ్యవస్థలు గణనీయమైన ఒత్తిడికి గురయ్యే అవకాశం ఉందని నిపుణులు చెబుతున్నారు.
ప్రత్యేకంగా భారతదేశం, చైనా వంటి పెద్ద ఎకనామీల పేర్లు ఆయన వ్యాఖ్యలతో ముడిపడటం గమనార్హం. భారత్ రష్యా నుంచి చమురు దిగుమతులు పెంచిన నేపథ్యంలో, ఇలాంటి భారీ సుంకాలు అమలైతే ఇంధన ధరలు పెరగడం, పరిశ్రమల ఖర్చులు అధికమవడం, వినియోగదారులపై ధరల భారంగా మారే అవకాశం ఉందని విశ్లేషకులు అంచనా వేస్తున్నారు. అంతేకాక, రష్యా నుంచి ముడిసరుకు దిగుమతి తీసుకునే చిన్న, మధ్యతరహా కంపెనీలకు ఇది పెద్ద సవాలుగా మారవచ్చు.
అమెరికా తీసుకోబోతున్న ఈ చర్యలు వాణిజ్య పరిపాలనలో కొత్త ఉద్రిక్తతలకు దారితీయొచ్చు. ప్రపంచ వాణిజ్య సంస్థ నిబంధనలకు అనుగుణమా? అంతర్జాతీయ మైత్రి సంబంధాలపై దీని ప్రభావం ఎలా ఉంటుంది? అనే ప్రశ్నలు కూడా తలెత్తుతున్నాయి. రష్యాను ఒంటరిచేయడమే లక్ష్యంగా ఉన్న ట్రంప్ ప్రణాళికలు ప్రపంచ మార్కెట్లలో ఇంధన ధరలను తిరిగి అస్థిరంగా మార్చే ప్రమాదంలో ఉన్నాయని ఆర్థికవేత్తలు హెచ్చరిస్తున్నారు.
అమెరికా అంతర్గత రాజకీయాల్లో కూడా ఈ ప్రతిపాదన చర్చనీయాంశమైంది. ట్రంప్ అనుచరులు దీన్ని ధైర్యవంతమైన నిర్ణయమన్నారు. కానీ మరోవైపు ఇది ప్రపంచ వాణిజ్యాన్ని కుదిపేసే ప్రమాదం ఉందని విమర్శలు వినిపిస్తున్నాయి. ప్రత్యేకంగా భారత–అమెరికా సంబంధాల్లో కూడా దీని ప్రభావం ఎలా ఉంటుందన్న అనుమానాలు తెరపైకి వచ్చాయి.
ట్రంప్ నిర్ణయం నిజంగా అమలులోకి వస్తుందా? లేక ఇది కేవలం రాజకీయ ఒత్తిడి పెంచే ప్రయత్నమా? అనేది రాబోయే వారాల్లో స్పష్టమవుతుంది. కానీ ఒక్క విషయం మాత్రం ఖాయం ఈ ప్రకటనతో అంతర్జాతీయ వేదికలపై అమెరికా, రష్యా, ఆసియా దేశాల సంబంధాలు మరోసారి హాట్ టాపిక్ అయ్యాయి.
