కృష్ణాలో జల విలాసం! మదిలో అదిరిపోయే క్రూజ్ పడవ విహారం!

Krishna: ఆంధ్రప్రదేశ్ పర్యాటక ముఖచిత్రంలో ప్రత్యేక స్థానం కలిగిన విజయవాడ నగరానికి మరో అంతర్జాతీయ స్థాయి ఆకర్షణ చేరనుంది. కృష్ణా నదిలో కేవలం పడవ ప్రయాణమే కాకుండా, నదిపై తేలియాడుతూ హోటల్ సౌకర్యాలు, వినోదం, ప్రత్యేక వేడుకలు జరుపుకునేలా అత్యాధునిక లగ్జరీ హౌస్ బోట్, పార్టీ మరియు డిన్నర్ క్రూజ్‌లను ప్రవేశపెట్టేందుకు సన్నాహాలు ముమ్మరమయ్యాయి. ఒక ప్రముఖ ప్రైవేట్ సంస్థ సమర్పించిన ప్రతిపాదనలకు రాష్ట్ర ప్రభుత్వం అధికారికంగా అనుమతులు మంజూరు చేసింది.

రూ.30 కోట్ల పెట్టుబడి – శరవేగంగా నిర్మాణ పనులు

ఈ ప్రాజెక్టు కోసం సదరు సంస్థ సుమారు రూ.30 కోట్ల మేర పెట్టుబడి పెడుతోంది. బోట్ల తయారీ, ఇంటీరియర్ డిజైనింగ్ పనులు ఇప్పటికే ప్రారంభమయ్యాయి. మరో నాలుగు నుంచి ఐదు నెలల్లో ఈ బోట్లు పూర్తిగా రూపుదిద్దుకుని పర్యాటకులకు అందుబాటులోకి రానున్నాయి. విజయవాడలో కృష్ణా నదిపై ఇప్పటికే ఒక కేరళ తరహా హౌస్‌బోట్ అందుబాటులో ఉండగా, ఇప్పుడు రానున్న ఈ రెండు భారీ నయా బోట్లతో బెజవాడ పర్యాటక రంగం మరింత కళకళలాడుతుందని పర్యాటక శాఖ అధికారులు భావిస్తున్నారు.

లగ్జరీ హౌస్‌బోట్ ప్రత్యేకతలు – కేరళ, కశ్మీర్ తరహా బస

కృష్ణా నదిలో ప్రవేశపెట్టనున్న లగ్జరీ బోటులో సకల సౌకర్యాలు సమకూర్చుతున్నారు. ఇందులో ఐదు అధునాతన పడక గదులు (బెడ్‌రూమ్స్) ఉంటాయి. వీటితో పాటు పర్యాటకులు రుచికరమైన భోజనం చేసేందుకు వీలుగా విశాలమైన సెంట్రలైజ్డ్ ఏసీ హాల్‌ను డిజైన్ చేస్తున్నారు. ప్రస్తుతం కేరళ బ్యాక్‌వాటర్స్, కశ్మీర్ దాల్ లేక్‌లలో ఉండే లగ్జరీ హౌస్ బోట్ల తరహాలోనే, కుటుంబ సభ్యులతో కలిసి కృష్ణా నదిలో ప్రయాణిస్తూ రాత్రి వేళల్లో నది మధ్యలోనే బస చేసే వెసులుబాటు దీని ద్వారా కలుగుతుంది.

పార్టీ & డిన్నర్ క్రూజ్ – 200 మందితో గ్రాండ్ సెలబ్రేషన్స్

లగ్జరీ హౌస్ బోటు కంటే భారీ పరిమాణంలో పార్టీ మరియు డిన్నర్ క్రూజ్‌ను నిర్మిస్తున్నారు. లండన్ థేమ్స్ నది, గోవా తీరాల్లో నడిచే విలాసవంతమైన క్రూజ్‌ల తరహాలో దీనిని తీర్చిదిద్దుతున్నారు. ఈ క్రూజ్‌లో ఒకేసారి 200 మంది కూర్చుని పార్టీలు, డిన్నర్ చేసుకునే విధంగా డబుల్ డెక్కర్ ఏసీ డెక్‌లు ఉంటాయి. పుట్టినరోజు వేడుకలు, వివాహ వార్షికోత్సవాలు, కుటుంబ కలయికలు, కార్పొరేట్ సంస్థల వార్షిక సమావేశాలు (కార్పొరేట్ మీటింగ్స్) నిర్వహించుకోవడానికి ఈ క్రూజ్ అద్భుతమైన వేదికగా నిలవనుంది.

తేలియాడే హోటల్ సౌకర్యాలు – ఇప్పటికే ఆదరణKrishna River Cruise

విజయవాడ కృష్ణా నదిలో ప్రస్తుతం నడుస్తున్న చిన్నపాటి హౌస్ బోట్‌కు స్థానిక పర్యాటకుల నుంచి మంచి స్పందన వస్తోంది. లివింగ్ ఏరియా, హోటల్ తరహా రూమ్‌లతో తేలియాడే వసతిగా దీనిని వాడుకుంటున్నారు. చిన్నపాటి ప్రైవేట్ పార్టీలు, విహారాలకు ఇది వేదికవుతుండగా, కొత్తగా రానున్న భారీ క్రూజ్, పెద్ద ఎత్తున ఈవెంట్లు నిర్వహించుకునే వారికి తిరుగులేని ప్రత్యామ్నాయంగా మారనుంది.

భవానీ ఐలాండ్, పవిత్ర సంగమంతో టూరిజం ప్యాకేజీలు

విజయవాడలో ఇప్పటికే ఉన్న ప్రసిద్ధ భవానీ ఐలాండ్, పవిత్ర సంగమం వంటి ప్రాంతాలను ఈ హౌస్‌బోట్లు, పార్టీ క్రూజ్‌లతో అనుసంధానించాలని ప్రణాళికలు రచిస్తున్నారు. భోజనం, నదీ విహారం, రాత్రి బస, ఆధ్యాత్మిక దర్శనాలు మరియు సాంస్కృతిక వినోదాలను కలిపి ఒక సమగ్ర టూరిజం ప్యాకేజీగా రూపొందించడం ద్వారా దేశ, విదేశీ పర్యాటకులను ఆకర్షించేందుకు విస్తృత అవకాశాలు ఏర్పడనున్నాయి.