చరిత్ర సృష్టించిన సామాన్యులు! ఏపీ మున్సిపల్ చైర్మన్లుగా టాక్సీ డ్రైవర్, నర్సు, మేస్త్రీ భార్య!

• ఏలేశ్వరం చైర్‌పర్సన్‌గా కాంట్రాక్ట్ ల్యాబ్ టెక్నీషియన్ భార్య యార్లగడ్డ అక్షిత!

• గొల్లప్రోలు (కాకినాడ జిల్లా) మున్సిపల్ పీఠంపై సెల్ ఫోన్ రిపేరర్ భార్య ఎస్. శ్రీలత!

• కొండపల్లి చైర్‌పర్సన్‌గా ఇంజినీరింగ్ గ్రాడ్యుయేట్ కన్యగంటి అమూల్య విజయం!

Politics: సాధారణంగా ఎన్నికలు అంటేనే కోట్లాది రూపాయల ధనప్రవాహం, మద్యం, కండబలం మరియు రాజకీయ వారసత్వాల ఆధిపత్యం కనిపిస్తుంది. కానీ ఆంధ్రప్రదేశ్ నూతన స్థానిక సంస్థల ఎన్నికల్లో ఈ సంప్రదాయానికి పూర్తి భిన్నమైన ప్రజాస్వామ్య దృశ్యం ఆవిష్కృతమైంది. డబ్బు బలం గానీ, పెద్ద రాజకీయ నేపథ్యం గానీ లేని సాధారణ కార్మికులు, నిరుపేద ఉద్యోగులు, దినసరి కూలీలు, టైల్స్ మేస్త్రీల భార్యలు మున్సిపల్ చైర్మన్ పీఠాలపై ఆశీనులయ్యారు. కష్టపడే నిజమైన కేడర్‌కు టికెట్లు కేటాయించాలన్న ఆలోచనతో ఎన్డీయే కూటమి (టీడీపీ-జనసేన-బీజేపీ) సామాన్యులను బరిలోకి దించగా, ప్రజలు వారిని అక్కున చేర్చుకుని గెలిపించారు.

పుట్టపర్తిలో టాక్సీ డ్రైవర్ ప్రస్థానం

శ్రీ సత్యసాయి జిల్లా పుట్టపర్తి మున్సిపల్ చైర్మన్‌గా గెలిచిన మేకల ఈశ్వర్ ప్రస్థానం ప్రతి ఒక్కరినీ స్ఫూర్తికి గురిచేస్తోంది. సొంతంగా టాక్సీ నడుపుకుంటూ కుటుంబాన్ని పోషించుకునే ఆయన, పార్టీ ఆవిర్భావం నుంచి జనసేన కోసం నిరంతరం కష్టపడ్డారు. ఎన్నికల ఖర్చులకు కూడా చిల్లిగవ్వ లేని పరిస్థితుల్లో ఉన్న ఆయనకు స్థానిక ప్రజలు, మిత్రులే చందాలు వేసుకుని ఆర్థికంగా సాయం చేశారు. మరికొంత అప్పు చేసి ప్రచారం నిర్వహించిన ఈశ్వర్, ప్రత్యర్థుల ధనబలాన్ని తుత్తునియలు చేస్తూ పుట్టపర్తి చైర్మన్ పీఠాన్ని అధిరోహించారు.

నర్సు, ల్యాబ్ టెక్నీషియన్ భార్యలకు రాజ్యాధికారం

తూర్పు గోదావరి జిల్లా ఏలేశ్వరం నగర పంచాయతీ చైర్‌పర్సన్‌గా గెలిచిన యార్లగడ్డ అక్షితది అత్యంత సాధారణ మధ్యతరగతి కుటుంబం. ఆమె భర్త ప్రభుత్వ ఆసుపత్రిలో కాంట్రాక్ట్ ల్యాబ్ టెక్నీషియన్‌గా విధులు నిర్వహిస్తున్నారు. పార్టీ పట్ల ఆమె చూపిన నిబద్ధతను గుర్తించి టీడీపీ టికెట్ ఇవ్వడంతో భారీ మెజారిటీతో విజయం సాధించారు. ఇక నిడదవోలులో ఓ ప్రైవేట్ ఆసుపత్రిలో నర్సుగా పనిచేస్తూ, టైల్స్ మేస్త్రీ భార్య అయిన మురాల జ్యోతి ఎస్సీ మహిళా రిజర్వేషన్‌లో ఊహించని విధంగా మున్సిపల్ చైర్‌పర్సన్‌గా ఎన్నికై ఆసుపత్రి యాజమాన్యాన్ని సైతం ఆశ్చర్యపరిచారు.

సేవా దృక్పథానికి దక్కిన పట్టం

కాకినాడ జిల్లాలో చిన్న సెల్ ఫోన్ రిపేర్ షాపు నడుపుకుంటూ, ఊరిలో ఎన్నో సేవా కార్యక్రమాలు చేసిన ప్రసాద్ భార్య ఎస్. శ్రీలతకు బీసీ మహిళా కోటాలో జనసేన అవకాశం కల్పించగా ఆమె చైర్‌పర్సన్‌గా గెలిచారు. ఎన్టీఆర్ జిల్లా కొండపల్లిలో బీటెక్ పూర్తి చేసిన సాధారణ గృహిణి కన్యగంటి అమూల్య చైర్‌పర్సన్ అయ్యారు. వైఎస్సార్ కడప జిల్లా ఎర్రగుంట్లలో నెలకు రూ. 20,000 జీతంతో ప్రైవేట్ కంపెనీలో పనిచేసే సాధారణ ఉద్యోగి భార్య మధులతను బీజేపీ అభ్యర్థిగా నిలబెట్టి గెలిపించుకుంది. పార్టీ కోసం కష్టపడ్డ కార్యకర్తలకు ఇచ్చిన అసలైన గుర్తింపుగా ఇది నిలిచింది.

వైద్య రంగానికి దక్కిన గౌరవం – ప్రజల నమ్మకం

రాజకీయ కుటుంబాల ఆధిపత్యాన్ని పక్కనపెట్టి చదువుకు, నిజాయితీతో కూడిన వృత్తికి పట్టం కట్టడంలో భాగంగా పలు మున్సిపాలిటీల్లో సేవా దృక్పథం కలిగిన వైద్యులకు చైర్మన్ పదవులు లభించాయి. నంద్యాల మున్సిపల్ చైర్మన్‌గా నామమాత్రపు ఫీజుతో చిన్నారులకు చికిత్స అందించే ప్రముఖ పీడియాట్రిషియన్ డాక్టర్ బాబన్ విజయం సాధించగా, పశ్చిమ గోదావరి జిల్లా ఆకివీడు నగర పంచాయతీ చైర్‌పర్సన్‌గా అతి తక్కువ ఖర్చుకే పేదలకు వైద్యం అందించే డాక్టర్ షేక్ నీలోఫర్ గెలుపొందారు. ఈ ఫలితాలు సామాన్యులు కూడా ప్రజాస్వామ్యంలో రాజ్యాధికారాన్ని చేపట్టగలరని యావత్ దేశానికి చాటిచెప్పాయి.