స్థానిక సమరంలో కూటమి చారిత్రక విజయంతో బాధ్యత పెరిగింది - చంద్రబాబు !

• 7 జిల్లాల్లో వైసీపీకి ఒక్క జడ్పీటీసీ కూడా దక్కలేదు: సున్నాకే పరిమితమైన ఫ్యాన్ పార్టీ!

• నాయకత్వంలో మహిళా విప్లవం: టీడీపీ గెలిచిన 70 పదవుల్లో 42 మంది మహిళలే (60 శాతం)!

• సామాజిక న్యాయానికి పెద్దపీట: 62.9 శాతం పదవులు బీసీ, ఎస్సీ, ఎస్టీ, మైనారిటీలకే కేటాయింపు!

Andhrapradesh: ఆంధ్రప్రదేశ్‌లో ఇటీవల నిర్వహించిన పట్టణ, గ్రామీణ స్థానిక సంస్థల ఎన్నికల్లో ఎన్డీయే కూటమి (తెలుగుదేశం, జనసేన, బీజేపీ) అపూర్వమైన ప్రజామోదాన్ని పొందింది. 2024 సార్వత్రిక ఎన్నికల ఫలితాలతో పోలిస్తే స్థానిక సంస్థల ఎన్నికల నాటికి కూటమి బలం మరింత పుంజుకుంది. రాజధాని అమరావతిలో ఏర్పాటు చేసిన మీడియా సమావేశంలో ముఖ్యమంత్రి నారా చంద్రబాబు నాయుడు స్థానిక సంస్థల ఎన్నికల సమగ్ర ఫలితాలు, ఓట్ల శాతాలు మరియు సామాజిక ప్రాతినిధ్య గణాంకాలను స్వయంగా వెల్లడించారు.

ఓట్ల శాతంలో భారీ పెరుగుదల – విస్తరించిన తేడా

2024 అసెంబ్లీ ఎన్నికల్లో కూటమికి 55.3 శాతం ఓట్లు రాగా, తాజా స్థానిక సంస్థల ఎన్నికల్లో ఏకంగా 58.9 శాతం ఓట్లను కూటమి సొంతం చేసుకుంది. అంటే గత ఎన్నికల కంటే కూటమి ఓటు బ్యాంకు 3.6 శాతం పెరిగింది. మరోవైపు ప్రధాన ప్రతిపక్షమైన వైఎస్సార్ కాంగ్రెస్ పార్టీకి 2024లో వచ్చిన 39.81 శాతం నుంచి 33.56 శాతానికి ఓట్లు పడిపోయాయి. అంటే ఒక్కసారిగా 6.25 శాతం ఓట్లను వైసీపీ కోల్పోయింది. ఫలితంగా కూటమికి, వైసీపీకి మధ్య ఓట్ల వ్యత్యాసం ఏకంగా 25.34 శాతానికి చేరింది.

పట్టణ, గ్రామీణ పోరులో ఎన్డీయే తిరుగులేని స్ట్రైక్ రేట్

పట్టణ స్థానిక సంస్థల్లో కూటమి 59.9 శాతం ఓట్ల వాటాతో 94 శాతం స్ట్రైక్ రేట్ నమోదు చేయగా, వైసీపీ 34.3 శాతానికే పరిమితమైంది. గ్రామీణ పరిషత్ జడ్పీటీసీ ఎన్నికల్లో కూటమి 57.6 శాతం ఓట్లతో 87.5 శాతం స్ట్రైక్ రేట్ సాధించగా, వైసీపీ 39.7 శాతాన్ని మాత్రమే దక్కించుకుంది. ఓట్ల శాతంలో పట్టణాల్లో 25.60 శాతం, పల్లెల్లో 17.9 శాతం మేర కూటమి వైసీపీ కంటే స్పష్టమైన మెజారిటీ ఆధిక్యాన్ని ప్రదర్శించింది.

పట్టణ సంస్థల్లో కూటమి ఏకపక్ష విజయం

రాష్ట్రవ్యాప్తంగా ఎన్నికలు జరిగిన 100 పట్టణ స్థానిక సంస్థలలో ఏకంగా 94 స్థానాల్లో మేయర్, చైర్‌పర్సన్ పీఠాలను కూటమి కైవసం చేసుకుంది. మొత్తం 13 కార్పొరేషన్లలో 12 మేయర్ పదవులను గెలుచుకోగా, 87 మున్సిపాలిటీలు/నగర పంచాయతీల్లో 82 చైర్మన్ పదవులను దక్కించుకుంది. ఇందులో తెలుగుదేశం పార్టీ 70, జనసేన 20, భారతీయ జనతా పార్టీ 4 స్థానాల్లో విజయం సాధించాయి. వైసీపీ 100 స్థానాలకు గాను కేవలం 4 స్థానాలకే పరిమితమైంది.

82 శాతం వార్డుల్లో క్లీన్ స్వీప్ – కుదేలైన ప్రతిపక్షం

మొత్తం 3,941 వార్డుల్లో కూటమి అభ్యర్థులు ఏకంగా 3,233 వార్డులను (82 శాతం) గెలుచుకుని రికార్డు సృష్టించారు. 100 పట్టణ స్థానిక సంస్థల్లో 95 చోట్ల కూటమికే సంపూర్ణ కౌన్సిల్ మెజారిటీ లభించింది. ఏకంగా 16 పట్టణాల్లోని ప్రతి ఒక్క వార్డునూ కూటమి క్లీన్ స్వీప్ చేయగా, 22 పట్టణాల్లో వైసీపీ ఒక్క వార్డును కూడా గెలవలేక పూర్తిగా ఖాతా తెరవకుండా తుడిచిపెట్టుకుపోయింది. వైసీపీ రాష్ట్రవ్యాప్తంగా కేవలం 558 వార్డులకే (14.2%) పరిమితమైంది.

పులివెందుల, కడపలో ఫ్యాక్షన్ రాజకీయాలకు చరమగీతం

వైసీపీకి కంచుకోటగా భావించే వైఎస్సార్ కడప జిల్లాలో ఆ పార్టీ రాజకీయ ఉనికికే గండిపడింది. పులివెందుల మున్సిపాలిటీలో కూటమి 13,875 ఓట్ల భారీ మెజారిటీతో చైర్‌పర్సన్ స్థానాన్ని గెలుచుకోవడమే కాకుండా, 40 వార్డుల్లో 37 వార్డులను కైవసం చేసుకుంది. కడప కార్పొరేషన్‌లో 65,588 ఓట్ల మెజారిటీతో 66 వార్డుల్లో 64 స్థానాలను గెలుచుకుంది. జిల్లాలోని మొత్తం 9 పట్టణ స్థానిక సంస్థలనూ కూటమి దక్కించుకోగా, జిల్లాలోని 345 వార్డుల్లో వైసీపీ కేవలం 9 వార్డులకే పరిమితమైంది.

పోస్టల్ బ్యాలెట్లలో ఉద్యోగుల సంపూర్ణ మద్దతు

ప్రభుత్వ ఉద్యోగులు, ఉపాధ్యాయులు సైతం కూటమి పాలన పట్ల పూర్తి విశ్వాసాన్ని వ్యక్తం చేశారు. పట్టణ స్థానిక సంస్థల ఎన్నికల్లో ఎన్డీయే కూటమికి 65.7 శాతం పోస్టల్ బ్యాలెట్ ఓట్లు పోలవగా, వైసీపీకి కేవలం 27.42 శాతం మాత్రమే వచ్చాయి. అదేవిధంగా పరిషత్ ఎన్నికల్లో కూటమికి 62.83 శాతం పోస్టల్ ఓట్లు రాగా, వైసీపీ 31.46 శాతం ఓట్లను మాత్రమే పొందగలిగింది. ఇది ఉద్యోగ వర్గాల్లో ప్రభుత్వంపై ఉన్న అచంచల విశ్వాసానికి నిదర్శనమని సీఎం పేర్కొన్నారు.

పరిషత్ ఎన్నికల్లో జడ్పీటీసీ, ఎంపీటీసీల సునామీ

గ్రామీణ ప్రాంతాల్లో సైతం కూటమి విజయదుందుభి మోగించింది. మొత్తం 659 జడ్పీటీసీ స్థానాలకు గాను 575 స్థానాలను కూటమి గెలుచుకుంది. రాష్ట్రంలోని మొత్తం 28 జిల్లాల్లో 27 జిల్లాల్లో కూటమే ఏకపక్ష ఆధిక్యాన్ని ప్రదర్శించింది. ఇక 9,818 ఎంపీటీసీ స్థానాల్లో కూటమి ఏకంగా 7,803 స్థానాలను కైవసం చేసుకోవడంతో రాష్ట్రవ్యాప్తంగా 90 శాతానికి పైగా మండల పరిషత్ అధ్యక్ష (ఎంపీపీ) పదవులను కూటమి కైవసం చేసుకోనుంది.

ఏడు జిల్లాల్లో సున్నాకు పడిపోయిన వైసీపీ

జడ్పీటీసీ ఎన్నికల్లో వైఎస్సార్సీపీ ఘోర పరాజయాన్ని మూటగట్టుకుంది. రాష్ట్రంలోని 7 జిల్లాల్లో ఆ పార్టీ ఒక్క జడ్పీటీసీ స్థానాన్ని కూడా గెలుచుకోలేక సున్నాకే పరిమితమైంది. అనకాపల్లి, డాక్టర్ బీఆర్ అంబేద్కర్ కోనసీమ, కాకినాడ, మార్కాపురం, పల్నాడు, పశ్చిమ గోదావరి, విశాఖపట్నం జిల్లాల్లో వైసీపీకి ఒక్కటంటే ఒక్క జడ్పీటీసీ కూడా దక్కలేదు. కేవలం అల్లూరి సీతారామరాజు జిల్లాలో మాత్రమే వైసీపీ కూటమి కంటే ఎక్కువ సీట్లను పొందగలిగింది.

నారీశక్తికి పట్టం – 60 శాతం మహిళా నాయకత్వం

పట్టణ స్థానిక సంస్థల్లో మహిళలకు రికార్డు స్థాయిలో నాయకత్వ అవకాశాలు కల్పించారు. టీడీపీ గెలిచిన 70 మేయర్, చైర్‌పర్సన్ పదవుల్లో ఏకంగా 42 స్థానాలు (60 శాతం) మహిళలకే దక్కాయి. టీడీపీ గెలిచిన 10 నగర పాలక సంస్థల మేయర్లలో 8 మంది మహిళలే కావడం విశేషం. విశాఖపట్నం, విజయనగరం, మచిలీపట్నం, గుంటూరు, ఒంగోలు, కడప, కర్నూలు, చిత్తూరు నగరాలకు మహిళలే మేయర్లుగా వ్యవహరిస్తూ నారీశక్తికి సరికొత్త నిర్వచనం చెప్పారు.

సామాజిక న్యాయంలో విప్లవాత్మక మార్పులు

టీడీపీ గెలిచిన 70 మున్సిపల్ పదవుల్లో 44 పదవులను (62.9 శాతం) బీసీ, ఎస్సీ, ఎస్టీ, మైనారిటీ వర్గాలకే కేటాయించారు. ఇందులో బీసీలకు 25 పదవులు (35.7%), ఎస్సీలకు 9, ముస్లిం మైనారిటీలకు 9 (వీరిలో ఆరుగురు మహిళలు), ఎస్టీలకు 1 పదవి లభించాయి. మొత్తం 27 విభిన్న సామాజిక వర్గాలకు చెందిన నేతలకు పట్టణ నాయకత్వ బాధ్యతలు అప్పగించి క్షేత్రస్థాయిలో నిజమైన సామాజిక విప్లవాన్ని ఆవిష్కరించారు.

విద్యావంతులు, యువతకు ప్రాధాన్యం

టీడీపీ తరఫున ఎన్నికైన నాయకుల్లో 78.6 శాతం మంది (55 మంది) డిగ్రీ, పీజీలు పూర్తి చేసిన విద్యావంతులు ఉన్నారు. 10 మంది మేయర్ల సగటు వయస్సు కేవలం 39 సంవత్సరాలు. రాజంపేటలో 26 ఏళ్ల డాక్టర్ దొంతం గాయత్రి, మచిలీపట్నంలో 29 ఏళ్ల షేక్ అబ్దుల్ అబీదా, విజయనగరంలో 31 ఏళ్ల అవనాపు భార్గవి, విశాఖలో 32 ఏళ్ల డాక్టర్ ముక్కా శ్రావణి మేయర్లుగా ఎన్నికయ్యారు. ఉన్నత ఉద్యోగులతో పాటు రోజువారీ కూలీలు, సాధారణ ఆర్థిక నేపథ్యం ఉన్నవారికి బాధ్యతలు అప్పగించి రాబోయే 30 ఏళ్లకు సరిపడే నాయకత్వాన్ని తీర్చిదిద్దామని సీఎం తెలిపారు.

అభివృద్ధి పనులకు ప్రజల అద్భుత తీర్పు

ప్రజల ఆకాంక్షలకు అనుగుణంగా మార్కాపురం జిల్లాను ఏర్పాటు చేసి, వెలిగొండ ప్రాజెక్టు తొలిదశ ద్వారా తాగునీరు అందించడం వల్లే అక్కడ 21కి 21 జడ్పీటీసీలను కూటమి గెలుచుకుందని చంద్రబాబు గుర్తుచేశారు. అలాగే పోలవరం ఎడమ కాల్వ ద్వారా అనకాపల్లికి గోదావరి నీరు చేర్చడంతో అక్కడ 24కి 24 జడ్పీటీసీలను గెలిపించారని, భోగాపురం ఎయిర్‌పోర్టు, పారిశ్రామిక ప్రగతితో విశాఖ నగరంలో మేయర్ స్థానానికి 2.47 లక్షల ఓట్ల మెజారిటీ ఇచ్చారని పేర్కొన్నారు.

ఎన్నికల అడ్డంకులకు సుప్రీంకోర్టు చెక్

స్థానిక ఎన్నికలను అడ్డుకునేందుకు వైసీపీ చేసిన అన్ని కుట్రలనూ న్యాయస్థానాలు తిప్పికొట్టాయని సీఎం మండిపడ్డారు. బీసీ రిజర్వేషన్లు, సర్ ప్రక్రియ, డీలిమిటేషన్లపై అడ్డంకులు సృష్టించేందుకు ప్రయత్నిస్తే దేశ అత్యున్నత న్యాయస్థానం సుప్రీంకోర్టు వారి ట్రాప్‌లో పడబోమని స్పష్టం చేసిందని గుర్తుచేశారు. ప్రజలకు మంచి పాలన అందించకుండా వ్యవస్థలను నిర్వీర్యం చేయడమే వైసీపీ పనిగా పెట్టుకుందని ఆయన విమర్శించారు.

రాతియుగపు రౌడీ రాజకీయాలకు స్వస్తి

గొడ్డలి పార్టీ నేరాలను, హింసను నమ్ముకుని ఎన్నికల వేళ తీవ్రవాదుల తరహాలో హిట్ అండ్ రన్ రాజకీయాలు చేసిందని చంద్రబాబు ఆగ్రహం వ్యక్తం చేశారు. రక్త తర్పణాలు, రౌడీయిజాన్ని ప్రజలు ఎన్నడూ ఆమోదించరని, తుపాన్లు వచ్చినప్పుడు ప్రజల కష్టాలను పట్టించుకోకుండా రాజకీయ డ్రామాలు చేసిన వారికి ఓటర్లు గట్టి గుణపాఠం చెప్పారని అన్నారు. ప్రతీ పౌరుడికి రక్షణ, భద్రత కల్పిస్తూ రాష్ట్రాన్ని ప్రగతిపథంలో ముందుకు తీసుకెళ్తామని ఆయన స్పష్టం చేశారు.