Gannavaram Airport: అమరావతి–గన్నవరం విమానాశ్రయానికి కొత్త షార్ట్కట్ రహదారి.. ఏపీ ప్రభుత్వ కీలక నిర్ణయం!

₹37.7 కోట్లతో గన్నవరం ఎయిర్పోర్టుకు ప్రత్యామ్నాయ మార్గం.. ప్రయాణ సమయం తగ్గింపు..

వెస్ట్ బైపాస్ ద్వారా గన్నవరం ఎయిర్పోర్టుకు వేగవంతమైన అనుసంధానం..

రాజధాని అమరావతి నుంచి గన్నవరం (విజయవాడ) అంతర్జాతీయ విమానాశ్రయానికి ప్రయాణాన్ని మరింత వేగవంతం చేసేందుకు ఆంధ్రప్రదేశ్ ప్రభుత్వం కీలక నిర్ణయం తీసుకోనుంది. ప్రస్తుతం నగర ట్రాఫిక్ కారణంగా ప్రయాణికులు ఎదుర్కొంటున్న ఇబ్బందులను తగ్గించేందుకు వెస్ట్ బైపాస్ మీదుగా కొత్త షార్ట్ కట్ రహదారి నిర్మాణానికి ప్రభుత్వం ప్రాధాన్యం ఇవ్వనున్నది. ఈ ప్రతిపాదనను ఇటీవల గన్నవరం విమానాశ్రయంలో జరిగిన ఎయిర్పోర్ట్ అడ్వైజరీ కమిటీ సమావేశంలో పరిశీలించారు.

కొత్త షార్ట్ కట్ తో ప్రయాణ దూరం ఎంత తగ్గనుంది?
ప్రస్తుతం బీబీగూడెం జంక్షన్ నుంచి చిన్న ఆవుటుపల్లి మీదుగా గన్నవరం విమానాశ్రయానికి వెళ్లాల్సి వస్తోంది. ఈ మార్గం దాదాపు 8.8 కిలోమీటర్ల దూరం ఉంటుంది. కొత్త ప్రణాళిక ప్రకారం బీబీగూడెం జంక్షన్ నుంచి కోనయ్య చెరువు వైపు రహదారిని మళ్లించడం ద్వారా ప్రయాణ దూరం 4.8 కిలోమీటర్లు తగ్గి కేవలం 4 కిలోమీటర్లకే పరిమితం కానుంది. దీంతో రాజధాని ప్రాంతం నుంచి విమానాశ్రయానికి చేరుకునే సమయం కూడా గణనీయంగా తగ్గనుంది.

ట్రాఫిక్ సమస్యలు తగ్గనున్నాయా?
కొత్త షార్ట్కట్ రహదారి అందుబాటులోకి వస్తే విమానాశ్రయానికి వెళ్లే వాహనాలు నగర ట్రాఫిక్లో చిక్కుకోకుండా నేరుగా చేరుకునే అవకాశం ఉంటుంది. దీంతో ప్రయాణ సమయం తగ్గడంతో పాటు ట్రాఫిక్ రద్దీ కూడా గణనీయంగా తగ్గే అవకాశం ఉందని అధికారులు భావిస్తున్నారు.

ప్రభుత్వం ఆమోదించిన  ప్రాజెక్టు వ్యయం ఎంత?
ఈ షార్ట్కట్ రహదారి నిర్మాణానికి మొత్తం రూ.37.7 కోట్ల వ్యయాన్ని ప్రభుత్వం అంచనా వేసింది. ఇందులో రూ.10.7 కోట్లు రహదారి నిర్మాణానికి, రూ.27 కోట్లు భూసేకరణతో పాటు ప్రభావిత కుటుంబాల పునరావాసం కోసం కేటాయించనున్నారు. ప్రాజెక్టు వ్యయంలో ఎక్కువ భాగం భూసేకరణ, పునరావాసానికే వినియోగించనుండటం విశేషం.

రాజధానికి గన్నవరం ఎయిర్పోర్టు ఎలా కీలకం కానుంది?
శాశ్వత అమరావతి అంతర్జాతీయ విమానాశ్రయం నిర్మాణం పూర్తవ్వడానికి ఇంకా 5 నుంచి 10 సంవత్సరాల సమయం పట్టే అవకాశం ఉండటంతో, అప్పటి వరకు గన్నవరం విమానాశ్రయమే రాజధాని ప్రాంతానికి ప్రధాన విమాన కేంద్రంగా సేవలు అందించనుంది. అందుకే రహదారి అనుసంధానాన్ని మెరుగుపరచడంతో పాటు విమానాశ్రయ సామర్థ్యాన్ని కూడా ప్రభుత్వం భారీగా పెంచుతోంది.

కొత్త టెర్మినల్ ప్రారంభం ఎప్పుడు? 
గన్నవరం విమానాశ్రయంలో ప్రస్తుతం భారీ టెర్మినల్ భవనం, అంతర్జాతీయ ప్రమాణాలతో కూడిన సదుపాయాల అభివృద్ధి పనులు వేగంగా సాగుతున్నాయి. కొత్త టెర్మినల్ అందుబాటులోకి వస్తే ప్రస్తుతం ఉన్న ప్రయాణికుల సామర్థ్యం నాలుగు రెట్లు పెరుగుతుందని అధికారులు చెబుతున్నారు. ఈ ఆధునిక టెర్మినల్ను రాబోయే దసరా నాటికి ప్రారంభించాలనే లక్ష్యంతో ప్రభుత్వం పనులను వేగవంతం చేసింది.

రాజధాని అవసరాలకు ప్రభుత్వ ప్రణాళిక ఏమిటి?
స్థానిక ఎమ్మెల్యే వెంకటరావు పాల్గొన్న ఎయిర్పోర్ట్ అడ్వైజరీ కమిటీ సమావేశంలో ఈ ప్రాజెక్టు వ్యయం, భూసేకరణ, రహదారి నిర్మాణం తదితర అంశాలపై సవివరంగా చర్చించారు. రాజధాని ప్రాంత అభివృద్ధిని దృష్టిలో ఉంచుకుని గన్నవరం విమానాశ్రయాన్ని అంతర్జాతీయ ప్రమాణాలతో అభివృద్ధి చేయడంతో పాటు, వేగవంతమైన రహదారి అనుసంధానం కల్పించడం ద్వారా వచ్చే దశాబ్దం పాటు అమరావతి అవసరాలను సమర్థంగా తీర్చాలన్నదే ప్రభుత్వ లక్ష్యంగా ఉంది. 

దీనికి సంబందించిన రూట్ మ్యాప్ వివరాలను ఈ వీడియో లో వీక్షించండి. వీడియో కోసం ఇక్కడ క్లిక్ చేయండి