AP Industries: పరిశ్రమల్లో పచ్చని సంకల్పం.. 14 రోజుల్లో 43,300 మొక్కలు నాటిన పారిశ్రామిక వర్గాలు!

పవన్ కల్యాణ్ గ్రీన్ ప్లాన్.. 26 పరిశ్రమల్లో 33 శాతం గ్రీన్ కవర్ లక్ష్యం పూర్తి..

పరిశ్రమల్లో 33 శాతం పచ్చదనం.. పవన్ కల్యాణ్ ఆదేశాలతో ప్రత్యేక కార్యాచరణ..

అమరావతి: పారిశ్రామిక అభివృద్ధితో పాటు పర్యావరణ పరిరక్షణకు సమాన ప్రాధాన్యం ఇవ్వాలన్న రాష్ట్ర ఉప ముఖ్యమంత్రి, అటవీ, పర్యావరణ శాఖల మంత్రి పవన్ కల్యాణ్ ఆదేశాలు ఆచరణలోకి వస్తున్నాయి. పరిశ్రమల పరిధిలో 33 శాతం గ్రీన్ కవర్ ఉండేలా రూపొందించిన ప్రత్యేక కార్యాచరణలో భాగంగా తొలి దశలో గణనీయమైన ఫలితాలు సాధించారు.

కాలుష్య నియంత్రణ మండలి (PCB) ఆధ్వర్యంలో చేపట్టిన ప్రత్యేక డ్రైవ్‌లో 26 జిల్లాల్లో 26 పరిశ్రమలను ఎంపిక చేశారు. కేవలం 14 రోజుల్లోనే ఆయా పరిశ్రమలు నిర్దేశించిన గ్రీన్ కవర్ లక్ష్యాన్ని చేరుకున్నాయి.

జూలై 28న ప్రారంభమైన ప్రత్యేక గ్రీన్ కవర్ డ్రైవ్ ఆగస్టు 11న ముగిసింది. ఈ 14 రోజుల వ్యవధిలో ఎంపిక చేసిన 26 పరిశ్రమలు కలిపి 129 ఎకరాల విస్తీర్ణంలో 43,300 మొక్కలు నాటాయి.

పరిశ్రమలు ఉన్న ప్రాంతాల వాతావరణ పరిస్థితులు, నేల స్వభావాన్ని పరిగణనలోకి తీసుకుని మొక్కలను ఎంపిక చేశారు. స్థానికంగా అనుకూలించే దేశీయ జాతులతో పాటు పండ్ల మొక్కలు, సుందరీకరణకు ఉపయోగపడే మొక్కలకు ప్రాధాన్యం ఇచ్చారు. వేప, కానుగ, రావి, నేరేడు వంటి మొక్కలను పెద్ద సంఖ్యలో నాటినట్లు అధికారులు తెలిపారు.

ప్రతి పరిశ్రమ తన పరిధిలోని భూభాగంలో 33 శాతం పచ్చదనం ఉండేలా చర్యలు తీసుకోవాలన్న నిబంధనను పకడ్బందీగా అమలు చేయాలని ప్రభుత్వం నిర్ణయించింది.

పరిశ్రమల ఉత్పత్తి, పెట్టుబడులు, ఉపాధి కల్పనతో పాటు పర్యావరణ సమతుల్యతను కాపాడటం కూడా పారిశ్రామిక అభివృద్ధిలో కీలక భాగమని ప్రభుత్వం స్పష్టం చేస్తోంది. ఈ ఆలోచనను కార్యరూపంలోకి తీసుకురావడంలో భాగంగానే జిల్లాకు ఒక పరిశ్రమ చొప్పున తొలి దశలో ఎంపిక చేసి ప్రత్యేక డ్రైవ్ నిర్వహించారు.

భారీ పరిశ్రమల నుంచి వెలువడే వాయు కాలుష్యాన్ని తగ్గించడంలో గ్రీన్ కవర్ కీలక పాత్ర పోషిస్తుంది. పెద్ద సంఖ్యలో చెట్లు పెంచడం ద్వారా కాలుష్య ప్రభావాన్ని కొంత మేర తగ్గించి, భవిష్యత్ తరాలకు స్వచ్ఛమైన గాలి అందించాలన్నది ఈ కార్యక్రమం ప్రధాన ఉద్దేశం.

పారిశ్రామిక ప్రగతి వేగంగా కొనసాగుతున్న సమయంలో పర్యావరణ పరిరక్షణ బాధ్యతను కూడా అదే స్థాయిలో ముందుకు తీసుకెళ్లాల్సిన అవసరం ఉందని ప్రభుత్వం చెబుతోంది.

తొలి దశలో 33 శాతం గ్రీన్ కవర్ లక్ష్యాన్ని విజయవంతంగా పూర్తి చేయడంతో కార్యక్రమాన్ని మరింత విస్తరించేందుకు ప్రభుత్వం సిద్ధమవుతోంది. రాష్ట్రంలోని మిగిలిన పరిశ్రమలు కూడా గ్రీన్ కవర్ లక్ష్యంలో భాగస్వాములు అయ్యేలా చర్యలు తీసుకోవాలని కాలుష్య నియంత్రణ మండలి అధికారులను పవన్ కల్యాణ్ ఆదేశించారు. తొలి దశలో సాధించిన ఫలితాలను కొనసాగిస్తూ క్షేత్రస్థాయిలో అమలు మరింత కట్టుదిట్టంగా ఉండాలని స్పష్టం చేశారు.

ప్రధానమంత్రి నరేంద్ర మోదీ ప్రతిపాదించిన వికసిత్ భారత్–2047 విజన్లో భాగంగా రాష్ట్రంలో పచ్చదనాన్ని మరింత పెంచే దిశగా ప్రభుత్వం అడుగులు వేస్తోంది. రాష్ట్రంలో 50 శాతం గ్రీన్ కవర్ లక్ష్యాన్ని సాధించేందుకు ప్రతి శాఖ, ప్రతి పరిశ్రమ బాధ్యతాయుతంగా పనిచేయాలని ప్రభుత్వం పిలుపునిచ్చింది.

అభివృద్ధి అంటే కేవలం పరిశ్రమలు, పెట్టుబడులు, ఉద్యోగాల పెరుగుదల మాత్రమే కాదని.. పర్యావరణాన్ని కాపాడుతూ ముందుకు సాగడమే దీర్ఘకాలిక అభివృద్ధికి అసలైన కొలమానమని ఈ కార్యక్రమం చాటుతోంది. పచ్చదనం పెరిగితేనే పారిశ్రామిక ప్రగతికి స్థిరమైన భవిష్యత్తు ఉంటుంది. ఈ లక్ష్యంతో 33 శాతం గ్రీన్ కవర్ కార్యక్రమాన్ని రాష్ట్రవ్యాప్తంగా అమలు చేయాలని ప్రభుత్వం నిర్ణయించింది.