Jharkhand: జార్ఖండ్‌లో సంచలన నిర్ణయం.. 44 ప్రభుత్వ నియామక పరీక్షలు రద్దు!

విద్యార్థుల ఆందోళన ఎఫెక్ట్.. జార్ఖండ్‌లో 44 ప్రభుత్వ నియామక పరీక్షలు రద్దు..

JPSC-JSSC పరీక్షలపై భారీ చర్య.. 2014 నుంచి నిర్వహించిన 44 పరీక్షలు రద్దు..

రాంచీ: విద్యార్థుల ఆందోళనల నేపథ్యంలో జార్ఖండ్ ప్రభుత్వం కీలక నిర్ణయం తీసుకుంది. నియామక పరీక్షల్లో అవకతవకలు జరిగాయన్న ఆరోపణలపై 44 ప్రభుత్వ నియామక పరీక్షలను రద్దు చేస్తూ ప్రభుత్వం ఉత్తర్వులు జారీ చేసింది. జార్ఖండ్ పబ్లిక్ సర్వీస్ కమిషన్ (JPSC), ఔట్‌సోర్సింగ్ సంస్థ TSR Data Processing Pvt Ltd (TDPL) 2014 నుంచి నిర్వహించిన పలు పరీక్షలు ఈ జాబితాలో ఉన్నాయి.

ప్రభుత్వం మొత్తం ఎనిమిది నోటిఫికేషన్లు విడుదల చేసి రద్దు చేసిన పరీక్షల వివరాలను వెల్లడించింది. ఇప్పటికే విద్యార్థులు నియామక పరీక్షల్లో అవకతవకలపై ఆందోళనలు చేస్తున్న నేపథ్యంలో ఈ నిర్ణయం ప్రాధాన్యం సంతరించుకుంది.

రద్దు చేసిన 44 నియామక పరీక్షల్లో పలు కీలక ప్రభుత్వ పోస్టులకు సంబంధించిన పరీక్షలు ఉన్నాయి. వాటిలో.. డ్రగ్ ఇన్‌స్పెక్టర్లు, అసిస్టెంట్ ప్రొఫెసర్లు, డిప్యూటీ కలెక్టర్లు, డెంటల్ డాక్టర్లు, అసిస్టెంట్ ఇంజినీర్లు, సివిల్ జడ్జీలు, అదనపు పబ్లిక్ ప్రాసిక్యూటర్లు, ఫారెస్ట్ రేంజ్ అధికారులు వంటి పోస్టుల భర్తీకి నిర్వహించిన పరీక్షలు ఉన్నాయి.

అంతేకాకుండా ప్రభుత్వ పాలిటెక్నిక్ కళాశాలల్లో లెక్చరర్ల నియామకం, సీనియర్ సైంటిఫిక్ ఆఫీసర్లు, అసిస్టెంట్ కన్జర్వేటర్స్ ఆఫ్ ఫారెస్ట్ వంటి పోస్టులకు నిర్వహించిన పరీక్షలను కూడా రద్దు చేశారు. పలు పరిపాలనా, సాంకేతిక పోస్టుల భర్తీకి సంబంధించిన పరీక్షలు కూడా ఈ జాబితాలో ఉన్నాయి.

JPSC, JSSCతో పాటు ఔట్‌సోర్సింగ్ సంస్థ TDPL 2014 నుంచి నిర్వహించిన నియామక పరీక్షలను ప్రభుత్వం సమీక్షిస్తోంది. నియామక ప్రక్రియలో అవకతవకలు జరిగాయన్న ఆరోపణల నేపథ్యంలో పాత పరీక్షలపై కూడా చర్యలు తీసుకుంటోంది.

ఇటీవల విద్యార్థుల నిరసనలకు కేంద్రంగా మారిన JSSC-Combined Graduate Level (CGL) పరీక్షను కూడా ప్రభుత్వం రద్దు చేసిన విషయం తెలిసిందే. దీంతో పాటు TDPL నిర్వహించిన అన్ని పరీక్షలు, ఆ సంస్థ ప్రకటించిన ఫలితాలను కూడా రద్దు చేస్తున్నట్లు ప్రభుత్వం ప్రకటించింది.

నియామక పరీక్షల్లో అవకతవకలకు సంబంధించిన కేసులను త్వరగా పరిష్కరించేందుకు ప్రత్యేక చర్యలు తీసుకోవాలని ప్రభుత్వం నిర్ణయించింది. ఈ కేసుల విచారణ కోసం హైకోర్టులో ఫాస్ట్‌ట్రాక్ కోర్టు ఏర్పాటు చేయాలని అభ్యర్థించనుంది. దీంతో నియామక పరీక్షలకు సంబంధించిన న్యాయపరమైన వివాదాలు త్వరగా పరిష్కారం కావచ్చని ప్రభుత్వం భావిస్తోంది.

నియామక ప్రక్రియలో పారదర్శకతను పెంచేందుకు JPSC, JSSCలో అంతర్గత విజిలెన్స్ సెల్ ఏర్పాటు చేయాలని కూడా నిర్ణయించారు. భవిష్యత్తులో పరీక్షల నిర్వహణ, ఫలితాల ప్రకటన, నియామక ప్రక్రియలో అక్రమాలు జరగకుండా ఈ వ్యవస్థ పర్యవేక్షణ చేసే అవకాశం ఉంది.

JPSC, JSSCలో సంస్కరణల కోసం ఇప్పటికే సీనియర్ ఐఏఎస్ అధికారి అమితాబ్ కౌశల్ నేతృత్వంలో కమిటీని ప్రభుత్వం ఏర్పాటు చేసింది. పరీక్షల నిర్వహణలో ఉన్న లోపాలను పరిశీలించి, వ్యవస్థలో అవసరమైన మార్పులపై ఈ కమిటీ సిఫారసులు చేయనుంది. రెండు నెలల్లో ప్రభుత్వానికి నివేదిక సమర్పించాల్సి ఉంటుంది.

నియామక పరీక్షల రద్దు నిర్ణయం విద్యార్థుల ఆందోళనల నేపథ్యంలో వచ్చింది. సోమవారం జరిగిన కేబినెట్ సమావేశం తర్వాత ప్రభుత్వం తొలుత JSSC-CGL పరీక్షను రద్దు చేస్తున్నట్లు ప్రకటించింది.

విద్యార్థుల ప్రధాన డిమాండ్లలో ఇది ఒకటి. అనంతరం TDPL నిర్వహించిన అన్ని పరీక్షలు, ఆ సంస్థ ప్రకటించిన ఫలితాలను కూడా రద్దు చేస్తున్నట్లు ప్రభుత్వం స్పష్టం చేసింది. తాజాగా 44 పరీక్షల వివరాలను నోటిఫికేషన్ల ద్వారా ప్రకటించడంతో జార్ఖండ్ నియామక వ్యవస్థలో భారీ ప్రక్షాళనకు ప్రభుత్వం శ్రీకారం చుట్టినట్లైంది.

అయితే ఇప్పటికే ఈ పరీక్షల ద్వారా ఎంపికై ఉద్యోగాల్లో ఉన్న అభ్యర్థుల పరిస్థితి, తదుపరి నియామక ప్రక్రియ ఎలా ఉంటుంది అన్నది ఇప్పుడు కీలకంగా మారింది. ప్రభుత్వం చేపట్టనున్న విచారణ, సంస్కరణల కమిటీ నివేదిక, న్యాయపరమైన చర్యల తర్వాత ఈ అంశాలపై మరింత స్పష్టత వచ్చే అవకాశం ఉంది.