Chandrababu: సముద్రంలో గల్లంతైన ఏడుగురు మత్స్యకారుల కోసం ముమ్మర గాలింపు.. అధికారులతో సీఎం చంద్రబాబు సమీక్ష!

కోనసీమ మత్స్యకారుల కోసం ముమ్మర గాలింపు.. అధికారులకు సీఎం చంద్రబాబు కీలక ఆదేశాలు..

ఏడుగురు మత్స్యకారుల ఆచూకీ కోసం గాలింపు.. కోస్ట్‌గార్డ్‌తో సమన్వయం..

అమరావతి: బీఆర్ అంబేద్కర్ కోనసీమ జిల్లాకు చెందిన ఏడుగురు మత్స్యకారులు సముద్రంలో గల్లంతైన ఘటనపై ముఖ్యమంత్రి చంద్రబాబు నాయుడు అధికారులతో సమీక్ష నిర్వహించారు. మత్స్యకారుల ఆచూకీ కోసం కొనసాగుతున్న గాలింపు చర్యలను వేగవంతం చేయాలని ఆదేశించారు. బాధిత కుటుంబాలకు ప్రభుత్వం అండగా నిలవాలని స్పష్టం చేశారు.

అమరావతిలోని క్యాంపు కార్యాలయంలో మత్స్యశాఖ అధికారులతో సీఎం సమావేశమయ్యారు. అల్లవరం మండలంలోని ఓడలరేవు, దుమ్మలపేట, వాసలతిప్ప గ్రామాలకు చెందిన మత్స్యకారులు ప్రయాణిస్తున్న బోటు కొద్ది రోజుల క్రితం సముద్రంలో గల్లంతైన విషయం అధికారుల నుంచి తెలుసుకున్నారు.

గల్లంతైన ఏడుగురు మత్స్యకారులు ఈ నెల 3వ తేదీన వేటకు వెళ్లినట్లు అధికారులు సీఎంకు వివరించారు. సుమారు పది రోజుల తర్వాత తిరిగి వస్తామని వారు తమ కుటుంబ సభ్యులకు చెప్పినట్లు తెలిపారు. అయితే 16వ తేదీ వరకు వారు తిరిగి రాకపోవడంతో కుటుంబ సభ్యులు అధికారులకు సమాచారం అందించారు.

సమాచారం అందిన వెంటనే కోస్ట్ గార్డ్, మెరైన్ పోలీసులు గాలింపు చర్యలు ప్రారంభించినట్లు అధికారులు సీఎంకు వివరించారు. చెన్నైలోని కోస్ట్ గార్డ్ ప్రధాన కార్యాలయంతో రాష్ట్ర మత్స్యశాఖ అధికారులు ఇప్పటికే సంప్రదింపులు జరిపినట్లు తెలిపారు.

మత్స్యకారుల ఆచూకీ కోసం కోస్ట్ గార్డ్ సహాయంతో విస్తృతంగా గాలింపు చేపట్టినట్లు అధికారులు తెలిపారు. నేవీకి చెందిన డార్నియర్ విమానాలతో 216 నాటికల్ మైళ్ల వరకు గాలింపు నిర్వహించినట్లు సీఎంకు వివరించారు.

ఏపీకి చెందిన బోటు గల్లంతైన విషయాన్ని చెన్నైలోని కోస్ట్ గార్డ్ ఉన్నతాధికారుల ద్వారా బంగ్లాదేశ్, అండమాన్ అధికారులకు కూడా తెలియజేసినట్లు అధికారులు చెప్పారు. అందుబాటులో ఉన్న అన్ని మార్గాల్లో గాలింపు కొనసాగుతున్నట్లు వివరించారు.

సముద్రంలోకి వెళ్లే బోటులో ట్రాన్స్‌పాండర్ ఉందా? బోటు ఒంటరిగా ఎందుకు వెళ్లింది? బోటు గల్లంతైన విషయం అధికారులకు ఎప్పుడు తెలిసింది? సమాచారం అందిన వెంటనే గాలింపు చర్యలు ఎప్పుడు ప్రారంభించారు? వంటి అంశాలపై సీఎం చంద్రబాబు అధికారులను ప్రశ్నించారు.

అలాగే వేటకు వెళ్లే మత్స్యకారులకు ప్రస్తుతం అందుతున్న సాంకేతిక సహాయం, రోజువారీ సమన్వయ వ్యవస్థల గురించి కూడా సమీక్షించారు. ప్రమాదం జరిగిన తర్వాత స్పందించడం మాత్రమే కాకుండా, ఇలాంటి ఘటనలు ముందుగానే నివారించేలా వ్యవస్థను బలోపేతం చేయాలని సూచించారు.

సముద్రంలో వేటకు వెళ్లే ప్రతి బోటు, ప్రతి మత్స్యకారుడి వివరాలు తప్పనిసరిగా నమోదు చేయాలని సీఎం స్పష్టం చేశారు. మత్స్యకారులు ఎప్పుడు సముద్రంలోకి వెళ్లారు, ఎక్కడికి వెళ్లారు, ఎప్పుడు తిరిగి రావాల్సి ఉంది వంటి వివరాలు అందుబాటులో ఉంటే అత్యవసర పరిస్థితుల్లో వేగంగా సహాయం అందించవచ్చని చెప్పారు.

అన్ని శాఖలు పరస్పర సమన్వయంతో పనిచేసి మత్స్యకారులు ప్రమాదాల బారిన పడకుండా ముందస్తు చర్యలు తీసుకోవాలని ఆదేశించారు. ఇందుకోసం స్పష్టమైన స్టాండర్డ్ ఆపరేటింగ్ ప్రొసీజర్ (SOP) అమలు చేయాలని సూచించారు.

గల్లంతైన మత్స్యకారుల ఆచూకీ కోసం అందుబాటులో ఉన్న ప్రతి అవకాశాన్ని వినియోగించుకోవాలని సీఎం చంద్రబాబు అధికారులను ఆదేశించారు. గాలింపు చర్యల్లో ఎలాంటి లోటు లేకుండా అవసరమైన అన్ని శాఖలు, కేంద్ర భద్రతా సంస్థలతో సమన్వయం చేసుకోవాలని సూచించారు.

మరోవైపు బాధిత మత్స్యకారుల కుటుంబాలకు ప్రభుత్వం అండగా నిలవాలని అధికారులకు సీఎం స్పష్టం చేశారు. వారి కుటుంబాలకు అవసరమైన సహాయం అందిస్తూ, గాలింపు చర్యలపై ఎప్పటికప్పుడు సమాచారం అందించాలని ఆదేశించారు.

ఏడుగురు మత్స్యకారులు క్షేమంగా తిరిగి రావాలని కుటుంబ సభ్యులు, స్థానికులు ఎదురుచూస్తున్న నేపథ్యంలో గాలింపు చర్యలను మరింత ముమ్మరం చేయాలని ప్రభుత్వం దృష్టి సారించింది.