అంబానీ ఆంధ్రకు ఇచ్చిన వరాలు ఏమిటి? దాని విలువ ఎంత? ఉపయోగాలు ఏంటి?

• ఆంధ్రాకు రిలయన్స్ భారీ వరం.. కంప్రెస్డ్ బయోగ్యాస్ కోసం ఏకంగా లక్ష కోట్ల పెట్టుబడి!

• రాష్ట్రంలో 3 లక్షల ఉద్యోగాల కల్పనే లక్ష్యం.. గ్రామీణ నిరుద్యోగ యువతకు సరికొత్త ఉపాధి బాట!

• రైతన్నలు కేవలం అన్నదాతలు మాత్రమే కాదు.. దేశానికి ఇంధనమిచ్చే ఊర్జాదాతలు కావాలి!

Andhrapradesh: ఆంధ్రప్రదేశ్ రాష్ట్ర పారిశ్రామిక, వ్యవసాయ ముఖచిత్రాన్ని సమూలంగా మార్చే దిశగా అన్నమయ్య జిల్లా మదనపల్లె వేదికగా భారీ ప్రాజెక్టులకు అంకురార్పణ జరిగింది. రాయలసీమ గ్లోబల్ హార్టికల్చర్ హబ్ మరియు ఇండియన్ స్కూల్ ఆఫ్ అగ్రికల్చర్ శంకుస్థాపన కార్యక్రమంలో కేంద్ర ఆర్థిక మంత్రి నిర్మలా సీతారామన్, ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్, మంత్రి నారా లోకేష్‌లతో పాటు రిలయన్స్ ఇండస్ట్రీస్ ఎగ్జిక్యూటివ్ డైరెక్టర్ అనంత్ అంబానీ పాల్గొన్నారు. ఈ కార్యక్రమంలో మొత్తం రెండు లక్షల కోట్ల రూపాయల ప్రణాళికలు ఆవిష్కృతం కాగా, అందులో లక్ష కోట్ల రూపాయల విలువైన గ్లోబల్ హార్టికల్చర్ హబ్ ఒకటి కాగా, మరో లక్ష కోట్ల రూపాయలను రిలయన్స్ ఇండస్ట్రీస్ కంప్రెస్డ్ బయోగ్యాస్ (CBG) రంగంలో పెట్టుబడిగా పెట్టనున్నట్లు ప్రకటించింది.

రైతులు ఇకపై అన్నదాతలే కాదు.. ఊర్జాదాతలు

ఈ కార్యక్రమంలో రిలయన్స్ ఎగ్జిక్యూటివ్ డైరెక్టర్ అనంత్ అంబానీ మాట్లాడుతూ అత్యంత కీలకమైన సందేశాన్ని అందించారు. దేశానికి అన్నం పెట్టే రైతులు కేవలం అన్నదాతలుగా మాత్రమే మిగిలిపోకూడదని, దేశానికి స్వచ్ఛమైన ఇంధనాన్ని అందించే ‘ఊర్జాదాతలు’గా మారాలని ఆయన ఆకాంక్షించారు. పంట వ్యర్థాలు, పశువుల పేడ, వ్యవసాయ వ్యర్థాల నుంచి అధునాతన సాంకేతికతతో కంప్రెస్డ్ బయోగ్యాస్ తయారు చేయడం ద్వారా రైతులకు అదనపు ఆదాయ వనరులు సమకూరుతాయని, పనికిరావని పారేసే వ్యర్థాలే ఇకపై విలువైన సంపదగా మారతాయని స్పష్టం చేశారు.

లక్ష కోట్ల పెట్టుబడి – 3 లక్షల ఉద్యోగాల సృష్టి

రిలయన్స్ ఇండస్ట్రీస్ ద్వారా ఆంధ్రప్రదేశ్ వ్యాప్తంగా ఏర్పాటు చేయనున్న సిబిజి ప్లాంట్ల ద్వారా ఏకంగా మూడు లక్షలకు పైగా ప్రత్యక్ష, పరోక్ష ఉద్యోగావకాశాలు లభించనున్నాయి. బయోగ్యాస్ ప్లాంట్ల నిర్మాణం, నిర్వహణ, గ్రామాల నుంచి వ్యవసాయ వ్యర్థాల సేకరణ, రవాణా, లాజిస్టిక్స్, సాంకేతిక నిర్వహణ విభాగాల్లో స్థానిక యువతకు ఉపాధి దక్కనుంది. ఈ భారీ నెట్‌వర్క్ ద్వారా రాబోయే కొన్ని దశాబ్దాల్లో ఆంధ్రప్రదేశ్ రాష్ట్ర ఖజానాకు దాదాపు రూ.60,000 కోట్ల ఆదాయం సమకూరేలా పక్కా ఆర్థిక ప్రణాళికను రిలయన్స్ సిద్ధం చేసింది.

రైతులను సీఈవోలుగా తీర్చిదిద్దే ‘ఇండియన్ స్కూల్ ఆఫ్ అగ్రికల్చర్’

మదనపల్లెలో ఏర్పాటు చేయనున్న ‘ఇండియన్ స్కూల్ ఆఫ్ అగ్రికల్చర్’ రైతులకు వ్యాపార ఆలోచనా దృక్పథాన్ని నేర్పించేందుకు ఇండియన్ స్కూల్ ఆఫ్ బిజినెస్ (ISB) తరహాలో పనిచేయనుంది. ప్రపంచానికి భారతదేశం ఎందరో కార్పొరేట్ సీఈవోలను అందించిందని, ఇప్పుడు ఈ సంస్థ ద్వారా ప్రతి రైతును తన పొలానికి తానే సీఈవోగా మార్చడమే లక్ష్యమని అనంత్ అంబానీ పేర్కొన్నారు. ఆర్టిఫిషియల్ ఇంటెలిజెన్స్ (AI), డ్రోన్లు, రోబోటిక్స్, శాటిలైట్ మ్యాపింగ్, ప్రెసిషన్ ఫార్మింగ్, స్మార్ట్ ఇరిగేషన్ వంటి ఆధునిక పరిజ్ఞానాన్ని రైతులకు చేరువ చేసి, చీడపీడల రాకను ముందే పసిగట్టడం, నీటిని పొదుపుగా వాడటం నేర్పిస్తారు.

జియో నెట్‌వర్క్ ద్వారా పల్లెపల్లెకూ వర్చువల్ క్లాస్‌రూమ్‌లు

ఈ అత్యాధునిక వ్యవసాయ పాఠశాల కేవలం మదనపల్లెలోని క్యాంపస్‌కే పరిమితం కాకుండా, రిలయన్స్ జియో సహకారంతో రాష్ట్రంలోని మారుమూల గ్రామాలకు సైతం వర్చువల్ క్లాస్‌‌రూమ్‌ల ద్వారా చేరుకోనుంది. రైతులకు వారి స్వభాషలోనే పంట సాగు, ధరల విశ్లేషణపై శిక్షణ ఇస్తారు. ముఖ్యంగా మదనపల్లె టమోటా మార్కెట్‌ లాంటి చోట్ల ధరల హెచ్చుతగ్గుల సమస్యను ఎదుర్కొనేందుకు ‘ప్రైస్ ఇంటెలిజెన్స్’ డేటాను జియో కృషి ప్లాట్‌ఫామ్ ద్వారా రైతులకు అందిస్తారు. గ్రామాల్లోని యువతను డిజిటల్ అగ్రికల్చర్ ఎక్స్‌టెన్షన్ వర్కర్లుగా తీర్చిదిద్ది ఒక సమగ్ర వ్యవసాయ వ్యవస్థను నిర్మించనున్నారు.

రాయలసీమ ప్రగతికి సరికొత్త బాట – నన్ను ఆంధ్రా బిడ్డగా చూడండి

ఒకప్పుడు కరువు కాటకాలకు నెలవైన రాయలసీమ ప్రాంతాన్ని గ్లోబల్ హార్టికల్చర్ హబ్ ద్వారా అంతర్జాతీయ స్థాయి వ్యవసాయ వాణిజ్య కేంద్రంగా తీర్చిదిద్దుతున్నారు. ఈ ప్రాజెక్టు ద్వారా మామిడి, అరటి, దానిమ్మ, టమోటా వంటి తోటల సాగును మరో 6 లక్షల హెక్టార్లకు విస్తరించి దాదాపు 9.6 లక్షల మంది రైతులకు లబ్ధి చేకూర్చనున్నారు. ముఖ్యమంత్రి చంద్రబాబు నాయుడును ఉద్దేశించి ‘నన్ను ఆంధ్రప్రదేశ్ బిడ్డగా భావించి, రాష్ట్ర సేవకు మార్గనిర్దేశం చేయండి’ అని అనంత్ అంబానీ కోరడం సభికులను విశేషంగా ఆకట్టుకుంది. ఈ మెగా ప్రాజెక్టులు గ్రామీణ ఆర్థిక వ్యవస్థను పరుగులెత్తించి ఏపీకి పారిశ్రామిక ఊపును తీసుకురానున్నాయి.