కృష్ణా నదిపై కొత్తగా మరో రెండు బ్యారేజీలు.. సీఎం కీలక ప్రకటన!
AP Irrigation: విజయవాడలో నిర్వహించిన ‘పేదలకు పట్టాభిషేకం’ వేదికగా ముఖ్యమంత్రి నారా చంద్రబాబు నాయుడు కృష్ణా నదిపై ప్రకాశం బ్యారేజీకి ఎగువన వైకుంఠపురం, దిగువన చోడవరం వద్ద మరో రెండు నూతన బ్యారేజీలను నిర్మించనున్నట్లు ప్రకటించారు. ఈ ప్రాజెక్టుల ద్వారా అమరావతి, విజయవాడలకు నిరంతర జలవనరులు సమకూరడంతో పాటు, భూగర్భ జలాలు పెరిగి, సముద్రపు ఉప్పునీటి నుంచి డెల్టా భూములకు రక్షణ లభిస్తుంది. అలాగే పేదలకు ఇళ్ల క్రమబద్ధీకరణ పట్టాలను పంపిణీ చేశారు.
వైకుంఠపురం, చోడవరం వద్ద నిర్మాణాలు.. ప్రకాశం బ్యారేజీకి ఎగువ, దిగువన జలకళ!
విజయవాడ, అమరావతిలకు నిరంతర జలవనరులు.. తాగు, సాగునీటికి కొరత ఉండదు!
ప్రకాశం బ్యారేజీపై తగ్గే ఒత్తిడి.. కృష్ణా డెల్టా రైతులకు నిరంతర నీటి భరోసా!
Amaravati: రాజధాని అమరావతి మరియు చుట్టుపక్కల ప్రాంతాలకు నిరంతర నీటి లభ్యత కల్పించడమే లక్ష్యంగా కృష్ణా నదిపై కొత్తగా మరో రెండు బ్యారేజీలను నిర్మించనున్నట్లు ఆంధ్రప్రదేశ్ ముఖ్యమంత్రి నారా చంద్రబాబు నాయుడు ప్రకటించారు. విజయవాడలోని మాకినేని బసవపున్నయ్య స్టేడియంలో నిర్వహించిన ‘పేదలకు పట్టాభిషేకం’ కార్యక్రమంలో ఆయన ఈ చారిత్రక నిర్ణయాన్ని వెల్లడించారు. ప్రకాశం బ్యారేజీకి ఎగువన వైకుంఠపురం వద్ద, అలాగే దిగువన చోడవరం వద్ద ఈ రెండు నూతన బ్యారేజీలను త్వరలోనే నిర్మించనున్నట్లు స్పష్టం చేశారు.
సాగు, తాగునీటి అవసరాలకు శాశ్వత పరిష్కారం
ఈ రెండు కొత్త బ్యారేజీల నిర్మాణం పూర్తయితే అమరావతి, విజయవాడ నగరాలు ఎల్లప్పుడూ నిండు కుండలా జలకళతో విరాజిల్లుతాయి. శతాబ్దాల చరిత్ర కలిగిన ప్రస్తుత ప్రకాశం బ్యారేజీపై పడే భారం గణనీయంగా తగ్గడమే కాకుండా, కృష్ణా డెల్టా రైతులకు సాగునీటి ఎద్దడి తలెత్తకుండా సమర్థవంతంగా నీటిని నిల్వ చేసుకోవచ్చు. అంతేకాకుండా భవిష్యత్తులో అమరావతి, విజయవాడ, గుంటూరు నగరాల్లో వేగంగా పెరిగే జనాభాకు అవసరమైన తాగునీటి సరఫరా నిరంతరం అందుబాటులో ఉంటుంది.
భూగర్భ జలాలు – ఉప్పునీటికి అడ్డుకట్ట
నది పరివాహక ప్రాంతంలో ఏడాది పొడవునా నీరు నిల్వ ఉండటం వల్ల చుట్టుపక్కల ప్రాంతాల్లో భూగర్భ జల మట్టం విశేషంగా పెరుగుతుంది. దీనివల్ల వ్యవసాయ బోర్లకు నీటి ఊట పుష్కలంగా లభిస్తుంది. మరో ప్రధాన ప్రయోజనం ఏమిటంటే.. వేసవి కాలంలో సముద్రపు ఉప్పునీరు వెనక్కి నదిలోకి చొరబడకుండా ఈ బ్యారేజీలు సమర్థవంతమైన అడ్డుకట్టగా నిలుస్తాయి. ఫలితంగా డెల్టాలోని వేలాది ఎకరాల వ్యవసాయ భూములు చవుడు బారకుండా, సహజ సారవంతాన్ని కోల్పోకుండా శాశ్వత రక్షణ లభిస్తుంది.
పర్యాటక రంగం – వాటర్ స్పోర్ట్స్ హబ్
నది నిండా నిత్యం నీరు నిలిచి ఉండటం ద్వారా విజయవాడ, రాజధాని ప్రాంతాల్లో పర్యాటక రంగానికి సరికొత్త ద్వారాలు తెరుచుకోనున్నాయి. నదిలో విహార నౌకలు (బోటింగ్), అంతర్జాతీయ స్థాయి వాటర్ స్పోర్ట్స్, రివర్ ఫ్రంట్ అభివృద్ధి వంటి పర్యాటక ప్రాజెక్టులు వేగవంతం కావడానికి అద్భుతమైన అవకాశం ఏర్పడుతుంది. ప్రపంచ స్థాయి గ్రీన్ అండ్ బ్లూ నగరంగా రూపుదిద్దుకుంటున్న రాజధాని అమరావతికి ఈ రివర్ ఫ్రంట్ అందాలు ప్రధాన ఆకర్షణగా మారనున్నాయి.
అమరావతి–విజయవాడ–గుంటూరు: మహా నగరంగా విలీనం
ఈ సందర్భంగా సీఎం చంద్రబాబు మాట్లాడుతూ.. భవిష్యత్తులో అమరావతి ప్రపంచంలోనే నంబర్ వన్ రాజధానిగా ఎదుగుతుందని ధీమా వ్యక్తం చేశారు. బుల్లెట్ రైళ్లు, అత్యాధునిక వంతెనలు, స్కైస్క్రాపర్లు ఇక్కడ కొలువుదీరనున్నాయని తెలిపారు. త్వరలోనే ఇన్నర్ రింగ్ రోడ్డు, ఔటర్ రింగ్ రోడ్డు నిర్మాణాలు పట్టాలెక్కనున్నాయని, విశాఖపట్నం నుంచి చెన్నై వరకు నాలుగు లైన్ల రైల్వే ట్రాక్ కారిడార్ రానుందని వెల్లడించారు. ఇవన్నీ పూర్తయితే అమరావతి, విజయవాడ, గుంటూరు మూడు నగరాలు కలిసిపోయి తిరుగులేని ‘అన్‌స్టాపబుల్ మహానగరంగా’ ఆవిర్భవిస్తాయని చెప్పారు.
పేదలకు యాజమాన్య హక్కుల పత్రాలు
ఇదే వేదికపై దశాబ్దాలుగా విజయవాడ నగరంతో పాటు ఉమ్మడి కృష్ణా జిల్లా వ్యాప్తంగా కొండ ప్రాంతాల్లో నివాసాలు ఏర్పాటు చేసుకున్న వేలాది నిరుపేద కుటుంబాలకు ఇళ్ల క్రమబద్ధీకరణ పత్రాలు అందజేశారు. వేల కోట్ల రూపాయల విలువైన ప్రభుత్వ స్థలాలపై పేదలకు పూర్తిస్థాయి యాజమాన్య హక్కులు కల్పించామని పేర్కొన్నారు. ఉత్తరాంధ్ర, కోస్తా ప్రాంతాల్లోనూ లక్షలాది మంది పేదలకు ఇదే తరహా న్యాయం చేశామని, పోలవరం ప్రాజెక్టును త్వరితగతిన పూర్తి చేసి రాష్ట్రాన్ని కరువు రహితంగా మారుస్తామని సీఎం ఉద్ఘాటించారు.
Be the first to react
