రాజధాని అమరావతికి నిధుల వరద.. ఏపీ కేబినెట్ కీలక నిర్ణయాలు!

• ముఖ్యమంత్రి నారా చంద్రబాబు నాయుడు అధ్యక్షతన ఏపీ కేబినెట్ సమావేశం జరిగింది.సమావేశంలో 60కి పైగా అజెండా అంశాలపై చర్చించారు.
• రాజమహేంద్రవరం, గుంటూరు, తిరుపతి, కర్నూలు కేంద్రాలుగా నాలుగు కొత్త పోలీస్ కమిషనరేట్ల ఏర్పాటుకు ఆమోదం

అమరావతి: రాష్ట్ర మంత్రివర్గ సమావేశం ముగిసింది. ముఖ్యమంత్రి నారా చంద్రబాబు నాయుడు అధ్యక్షతన జరిగిన ఈ సమావేశంలో రాష్ట్ర అభివృద్ధి, అమరావతి నిర్మాణం, పోలీసు వ్యవస్థ బలోపేతం, పారిశ్రామిక పెట్టుబడులు, ఇంధన రంగానికి సంబంధించిన అంశాలపై కేబినెట్ కీలక నిర్ణయాలు తీసుకుంది. మొత్తం 60కి పైగా అంశాలపై చర్చించిన మంత్రివర్గం పలు ప్రతిపాదనలకు ఆమోదముద్ర వేసింది.

నాలుగు కొత్త పోలీస్ కమిషనరేట్లు

రాష్ట్రంలో మరో నాలుగు కొత్త పోలీస్ కమిషనరేట్ల ఏర్పాటుకు కేబినెట్ ఆమోదం తెలిపింది. రాజమహేంద్రవరం, గుంటూరు, తిరుపతి, కర్నూలు కేంద్రాలుగా వీటిని ఏర్పాటు చేయనున్నారు. ప్రస్తుతం రాష్ట్రంలో విజయవాడ, విశాఖపట్నం కేంద్రాలుగా కమిషనరేట్లు ఉండగా.. తాజా నిర్ణయంతో వాటి సంఖ్య ఆరుకు చేరనుంది.

అమరావతి గ్రామాలకు రూ.1,548.98 కోట్లు

రాజధాని అమరావతి పరిధిలోని గ్రామాల్లో మౌలిక వసతుల అభివృద్ధి పనులకు కేబినెట్ ఆమోదం తెలిపింది. మొత్తం రూ.1,548.98 కోట్ల విలువైన పనులకు పరిపాలనా అనుమతులు మంజూరు చేసింది. అమరావతి ఇన్‌ఫ్రాస్ట్రక్చర్‌ పనుల కోసం అదనంగా రూ.644.98 కోట్లు కేటాయించేందుకు కూడా ఆమోదం తెలిపింది.

అసెంబ్లీ భవనానికి సంబంధించిన స్పైర్, రూఫ్, లిఫ్టుల పనులకు రూ.661 కోట్లు కేటాయించేందుకు మంత్రివర్గం గ్రీన్ సిగ్నల్ ఇచ్చింది.

ఎల్పీఎస్ రైతులకు యాన్యుటీపై నిర్ణయం

ల్యాండ్ పూలింగ్ స్కీమ్ (LPS) కింద భూములు ఇచ్చిన రైతులకు కనీస యాన్యుటీ చెల్లించేలా నిబంధనల్లో మార్పులకు కేబినెట్ ఆమోదం తెలిపింది. ఇప్పటికే 1,304 మంది ఎల్పీఎస్ భూయజమానులకు చెల్లించిన రూ.5.04 కోట్ల యాన్యుటీని ర్యాటిఫై చేసింది.

పారిశ్రామిక ప్రాజెక్టులకు ప్రోత్సాహకాలు

రాష్ట్రంలో కొత్త పారిశ్రామిక పెట్టుబడులకు సంబంధించి పలు ప్రతిపాదనలకు కేబినెట్ ఆమోదం తెలిపింది. దాచేపల్లిలో మైహోమ్ ఇండస్ట్రీస్ గ్రీన్‌ఫీల్డ్ సిమెంట్ యూనిట్ కు ప్రోత్సాహకాలు ఇవ్వాలని నిర్ణయించింది.

అలాగే  శ్రీసిటీలో క్యాటర్‌పిల్లర్ గ్రీన్‌ఫీల్డ్ ఫెసిలిటీ ఏర్పాటుకు ఆమోదం తెలిపింది. కుప్పం ప్రాంతంలో పలు పరిశ్రమలకు భూముల కేటాయింపులకు కూడా మంత్రివర్గం గ్రీన్ సిగ్నల్ ఇచ్చింది.

ఎల్‌జీ ఎలక్ట్రానిక్స్ ప్రాజెక్టు కు సంబంధించిన గడువులు, ప్రోత్సాహకాల సవరణ ప్రతిపాదనకూ కేబినెట్ ఆమోదం తెలిపింది.

విద్యుత్ రంగంలో కీలక నిర్ణయం

విద్యుత్ రంగానికి సంబంధించి పవర్ ఫైనాన్స్ కార్పొరేషన్ (PFC) నుంచి రుణాలు పొందేందుకు ప్రభుత్వ హామీలకు కేబినెట్ ర్యాటిఫికేషన్ ఇచ్చింది. అలాగే 1,344 మెగావాట్ల పంప్డ్ స్టోరేజ్ విద్యుత్ కొనుగోలుకు మంత్రివర్గం ఆమోదం తెలిపింది.

అభివృద్ధి, పెట్టుబడులపై ఫోకస్

తాజా కేబినెట్ నిర్ణయాల్లో ఒకవైపు అమరావతి రాజధాని నిర్మాణానికి సంబంధించిన మౌలిక వసతుల పనులకు భారీగా నిధులు కేటాయించగా, మరోవైపు పోలీసు వ్యవస్థ విస్తరణ, పారిశ్రామిక ప్రాజెక్టులకు ప్రోత్సాహకాలు, విద్యుత్ రంగంలో పెట్టుబడులకు సంబంధించిన ప్రతిపాదనలకు ఆమోదం లభించింది. దీంతో రాష్ట్ర రాజధాని అభివృద్ధితో పాటు పరిపాలన, పారిశ్రామిక, ఇంధన రంగాల్లో ప్రభుత్వం తీసుకున్న నిర్ణయాలు ప్రాధాన్యం సంతరించుకున్నాయి.