రాజధానికి మరో మణిదీపం! గ్లోబల్ బ్రాండ్ల హోటల్స్ ఎంట్రీ!

• అమరావతిలో రూ.278 కోట్ల అంచనా పెట్టుబడితో భారీ హోటల్ ప్రాజెక్ట్.
• క్రౌన్ ప్లాజా, హాలిడే ఇన్ ఎక్స్‌ప్రెస్ హోటళ్లు.. 547 గదులతో అంతర్జాతీయ స్థాయి వసతులు.

అమరావతి: రాజధాని అమరావతిలో అంతర్జాతీయ స్థాయి హాస్పిటాలిటీ రంగానికి మరో భారీ ప్రాజెక్ట్ రాబోతోంది. ప్రముఖ హాస్పిటాలిటీ, రియల్ ఎస్టేట్ సంస్థ ఇండ్రాయల్ గ్రూప్ రూ.278 కోట్ల అంచనా పెట్టుబడితో ట్విన్ టవర్ హోటల్ ప్రాజెక్ట్‌ను చేపట్టేందుకు సిద్ధమవుతోంది. అమరావతి కేంద్ర వ్యాపార జిల్లాలో భాగంగా అభివృద్ధి చేయనున్న ఈ ప్రాజెక్ట్‌కు తుది పర్యావరణ అనుమతులు లభించాల్సి ఉంది.

నాలుగు ఎకరాల్లో నిర్మాణం

శాఖమూరు గ్రామ పరిధిలో సుమారు నాలుగు ఎకరాల విస్తీర్ణంలో ఈ హోటల్ సముదాయాన్ని నిర్మించనున్నారు. రెండు బేస్‌మెంట్‌ స్థాయిలతో పాటు పైభాగంలో 19 అంతస్తులు ఉండేలా ట్విన్ టవర్ నిర్మాణాన్ని ప్రతిపాదించారు. అంతర్జాతీయ హోటల్ బ్రాండ్లైన క్రౌన్ ప్లాజా, హాలిడే ఇన్ ఎక్స్‌ప్రెస్ ఈ ప్రాజెక్టులో భాగం కానున్నాయి.

547 గదులు.. ఆధునిక సౌకర్యాలు

రెండు హోటళ్లలో కలిపి మొత్తం 547 గదులు అందుబాటులోకి రానున్నాయి. అతిథుల అవసరాలకు అనుగుణంగా రెస్టారెంట్లు, సమావేశ మందిరాలు, కాన్ఫరెన్స్ సదుపాయాలు, వెల్‌నెస్‌ సెంటర్లు తదితర ప్రపంచస్థాయి వసతులను ఏర్పాటు చేయనున్నారు. రాజధాని ప్రాంతంలో వ్యాపార, అధికారిక, పర్యాటక కార్యకలాపాలు పెరుగుతున్న నేపథ్యంలో ఈ ప్రాజెక్ట్‌కు ప్రాధాన్యం ఏర్పడనుంది.

త్వరలో పనులు ప్రారంభం

పర్యావరణ కమిటీ తుది అనుమతులు మంజూరు చేసిన అనంతరం రెండు వారాల్లోనే నిర్మాణ పనులు ప్రారంభించే అవకాశం ఉన్నట్లు తెలుస్తోంది. అమరావతి సెంట్రల్ బిజినెస్ డిస్ట్రిక్ట్ అభివృద్ధిలో భాగంగా ఈ ప్రాజెక్ట్ కీలకంగా మారనుంది.

ఫర్నిచర్ తయారీ నుంచి అంతర్జాతీయ విస్తరణ వరకు..

ఇండ్రాయల్ గ్రూప్‌ 1989లో ఫర్నిచర్ తయారీ సంస్థగా తన ప్రస్థానాన్ని ప్రారంభించింది. అనంతరం హాస్పిటాలిటీ, రియల్ ఎస్టేట్ తదితర రంగాల్లోకి విస్తరించి అంతర్జాతీయ స్థాయిలో కార్యకలాపాలు సాగిస్తోంది. దశాబ్దాల అనుభవంతో ఇప్పుడు అమరావతిలో భారీ హోటల్ ప్రాజెక్ట్‌ను చేపడుతోంది.

అమరావతి రాజధాని ప్రాంతంలో మౌలిక వసతులు, వాణిజ్య కార్యకలాపాలు వేగం పుంజుకుంటున్న తరుణంలో అంతర్జాతీయ బ్రాండ్లతో కూడిన ఈ ట్విన్ టవర్ హోటల్ ప్రాజెక్ట్ హాస్పిటాలిటీ రంగంలో కొత్త అధ్యాయానికి నాంది పలకనుంది.