ఆంధ్రప్రదేశ్లో ఇంటర్మీడియట్ చదువుతున్న విద్యార్థులకు ముఖ్యమైన అలర్ట్. 2026 విద్యా సంవత్సరానికి సంబంధించి ఇంటర్మీడియట్ పరీక్షల షెడ్యూల్లో స్వల్ప మార్పులు చోటుచేసుకున్నాయి. ఈ మేరకు సవరించిన ఇంటర్ పరీక్షల టైమ్టేబుల్ను ఏపీ ఇంటర్మీడియట్ విద్యామండలి అధికారికంగా ప్రకటించింది. ఇప్పటికే ప్రకటించిన పరీక్షల షెడ్యూల్లో రెండు పరీక్షల తేదీలను మార్చినట్లు బోర్డు స్పష్టం చేసింది. ఫిబ్రవరి 23 నుంచి మార్చి 24వ తేదీ వరకు రాష్ట్రవ్యాప్తంగా ఇంటర్ పరీక్షలు నిర్వహించనున్నట్లు తెలిపింది.
ఇంటర్ బోర్డు విడుదల చేసిన తాజా షెడ్యూల్ ప్రకారం… మ్యాథ్స్ పేపర్–2ఏ, సివిక్స్ పేపర్–2 పరీక్షలను మార్చి 4వ తేదీన నిర్వహించనున్నారు. గతంలో ప్రకటించిన టైమ్టేబుల్తో పోలిస్తే ఇవే ప్రధాన మార్పులుగా బోర్డు పేర్కొంది. 2026 సంవత్సరానికి సంబంధించి ప్రభుత్వ సెలవుల జాబితా విడుదలైన అనంతరం, వాటికి అనుగుణంగా పరీక్షల షెడ్యూల్ను సవరించినట్లు అధికారులు తెలిపారు. దీంతో విద్యార్థులు తాజా టైమ్టేబుల్ను తప్పనిసరిగా గమనించాలని సూచించారు.
పరీక్షల నిర్వహణ వివరాలను పరిశీలిస్తే… ఏపీలో ఇంటర్మీడియట్ మొదటి సంవత్సరం పరీక్షలు ఫిబ్రవరి 23న ప్రారంభం కానుండగా, రెండో సంవత్సరం పరీక్షలు ఫిబ్రవరి 24 నుంచి మొదలుకానున్నాయి. అన్ని పరీక్షలు ఉదయం 9 గంటల నుంచి మధ్యాహ్నం 12 గంటల వరకు జరుగుతాయి. మొదట భాషా పరీక్షలు నిర్వహించగా, ఆ తర్వాత గ్రూప్కు సంబంధించిన ప్రధాన సబ్జెక్ట్ పేపర్లు ఉంటాయి. అదనంగా జనవరి 21న ‘ఎథిక్స్ అండ్ హ్యూమన్ వాల్యూస్’ పరీక్ష, జనవరి 23న ‘ఎన్విరాన్మెంటల్ ఎడ్యుకేషన్’ పరీక్షలు నిర్వహించనున్నట్లు బోర్డు వెల్లడించింది.
ఇంటర్ ప్రాక్టికల్ పరీక్షల షెడ్యూల్ కూడా ఖరారైంది. జనరల్ కోర్సులకు సంబంధించిన ప్రాక్టికల్ పరీక్షలు ఫిబ్రవరి 1 నుంచి ఫిబ్రవరి 10 వరకు జరగనున్నాయి. ఒకేషనల్ కోర్సుల విద్యార్థులకు జనవరి 27 నుంచి ఫిబ్రవరి 10 వరకు ప్రాక్టికల్స్ నిర్వహిస్తారు. పరీక్షల తేదీల్లో జరిగిన మార్పులను దృష్టిలో పెట్టుకొని విద్యార్థులు తమ చదువును పునర్వ్యవస్థీకరించుకోవాలని, తాజా టైమ్టేబుల్ ప్రకారం ప్రిపరేషన్ కొనసాగించాలని ఇంటర్ బోర్డు సూచించింది. ఈ సవరణలతో పరీక్షల నిర్వహణ మరింత సవ్యంగా జరుగుతుందని అధికారులు తెలిపారు.
