భారతదేశ ఏవియేషన్ రంగంలో రాబోయే దశాబ్దంలో భారీ వృద్ధి అవకాశాలు ఉన్నాయని నమ్ముతున్న అదానీ గ్రూప్, విమానాశ్రయాల వ్యాపారంలో చరిత్రాత్మక పెట్టుబడులకు సిద్ధమైంది. రాబోయే ఐదేళ్లలో ఏకంగా రూ.1 లక్ష కోట్ల పెట్టుబడిని ఎయిర్పోర్ట్ రంగంలో పెట్టనున్నట్లు అదానీ ఎయిర్పోర్ట్స్ డైరెక్టర్, గౌతమ్ అదానీ చిన్న కుమారుడు జీత్ అదానీ వెల్లడించారు. భారతదేశంలో విమాన ప్రయాణికుల సంఖ్య వేగంగా పెరుగుతున్న నేపథ్యంలో, ఆధునిక మౌలిక సదుపాయాలు, విస్తరణే లక్ష్యంగా ఈ పెట్టుబడులు ఉంటాయని ఆయన తెలిపారు.
ఈ నెల 25న నవీ ముంబై అంతర్జాతీయ విమానాశ్రయం వాణిజ్య కార్యకలాపాలు ప్రారంభించనున్న నేపథ్యంలో పీటీఐకి ఇచ్చిన ఇంటర్వ్యూలో జీత్ అదానీ ఈ వివరాలను వెల్లడించారు. నవీ ముంబై ఎయిర్పోర్ట్లో అదానీ గ్రూప్కు 74 శాతం వాటా ఉంది. దాదాపు రూ.19,650 కోట్ల వ్యయంతో నిర్మించిన ఈ విమానాశ్రయం తొలి దశలో ఏటా 2 కోట్ల మంది ప్రయాణికులకు సేవలు అందించనుంది. భవిష్యత్తులో దశలవారీగా సామర్థ్యాన్ని పెంచుతూ, ఏటా 9 కోట్ల మంది ప్రయాణికులను నిర్వహించే స్థాయికి తీసుకెళ్లాలన్నది గ్రూప్ లక్ష్యం. దీనివల్ల ఇప్పటికే తీవ్ర ఒత్తిడిలో ఉన్న ముంబై ఛత్రపతి శివాజీ అంతర్జాతీయ విమానాశ్రయంపై భారం గణనీయంగా తగ్గనుంది.
భారత ఏవియేషన్ రంగం వచ్చే 10 నుంచి 15 ఏళ్లపాటు ఏటా సగటున 15–16 శాతం వృద్ధి నమోదు చేసే సామర్థ్యం కలిగి ఉందని జీత్ అదానీ ధీమా వ్యక్తం చేశారు. మధ్యతరగతి ఆదాయం పెరగడం, దేశీయ–అంతర్జాతీయ ప్రయాణాల డిమాండ్ అధికమవడం, ప్రాంతీయ విమాన సేవల విస్తరణ వంటి అంశాలు ఈ వృద్ధికి ప్రధాన కారణాలుగా ఆయన పేర్కొన్నారు. ఈ నేపథ్యంలో ప్రభుత్వం చేపట్టబోయే తదుపరి విడత విమానాశ్రయాల ప్రైవేటీకరణలో కూడా అదానీ గ్రూప్ దూకుడుగా పాల్గొననుందని, మొత్తం 11 విమానాశ్రయాల కోసం బిడ్లు దాఖలు చేయనున్నట్లు స్పష్టం చేశారు.
ప్రస్తుతం అదానీ గ్రూప్ ముంబై, నవీ ముంబైతో పాటు అహ్మదాబాద్, లక్నో, గువాహటి, జైపూర్ వంటి దేశవ్యాప్తంగా 8 ప్రధాన విమానాశ్రయాలను నిర్వహిస్తోంది. దేశంలోని మొత్తం విమాన ప్రయాణికులలో దాదాపు 23 శాతం మంది అదానీ నిర్వహణలోని ఎయిర్పోర్ట్ల ద్వారానే ప్రయాణించడం విశేషం. భారీ పెట్టుబడులు, సాంకేతికత ఆధారిత సేవలు, అంతర్జాతీయ ప్రమాణాలతో విమానాశ్రయాల అభివృద్ధి ద్వారా భారత ఏవియేషన్ రంగంలో కీలక పాత్ర పోషించడమే అదానీ గ్రూప్ లక్ష్యంగా కనిపిస్తోంది.
