Cricket: మూడు క్రికెట్ స్టేడియాల్లో క్రీడా కార్యకలాపాలకు తాత్కాలిక బ్రేక్.. జాతీయ హరిత ట్రైబ్యునల్ కీలక ఆదేశాలు!

భూగర్భ జలాల వినియోగంపై మూడు స్టేడియాలకు ఎన్జీటీ షాక్..

అనుమతి లేకుండా క్రీడలు వద్దు.. మూడు స్టేడియాలకు ఎన్జీటీ ఆదేశాలు..

దేశంలో భూగర్భ జలాల వినియోగం, నీటి సంరక్షణపై పెరుగుతున్న ఆందోళనల నేపథ్యంలో జాతీయ హరిత ట్రైబ్యునల్ (ఎన్జీటీ) కీలక మధ్యంతర ఆదేశాలు జారీ చేసింది. భూగర్భ జలాల వినియోగంపై కేంద్ర భూగర్భ జలాల ప్రాధికార సంస్థ (CGWA), ట్రైబ్యునల్ జారీ చేసిన నోటీసులకు స్పందించని మూడు ప్రముఖ క్రికెట్ స్టేడియాల్లో తమ అనుమతి లేకుండా ఎలాంటి క్రీడా కార్యక్రమాలు నిర్వహించరాదని ఎన్జీటీ స్పష్టం చేసింది.

ఈ ఆదేశాల పరిధిలో ముంబైలోని డీవై పాటిల్ స్టేడియం, జైపూర్లోని సవాయ్ మాన్సింగ్ స్టేడియం, రాయ్పూర్లోని షహీద్ వీర్ నారాయణ్ సింగ్ అంతర్జాతీయ క్రికెట్ స్టేడియం ఉన్నాయి. తదుపరి విచారణ వరకు ఈ స్టేడియాల్లో క్రీడా కార్యకలాపాలను నిలిపివేయాలని ట్రైబ్యునల్ ఆదేశించింది.

కేసు ఎందుకు నమోదైంది? 
క్రికెట్ మైదానాల నిర్వహణ కోసం శుద్ధి చేసిన మురుగు నీరు (STP Treated Water) వినియోగించకుండా భూగర్భ జలాలు లేదా మంచినీటిని వినియోగిస్తున్నారనే ఆరోపణలపై ఈ కేసు విచారణకు వచ్చింది. అలాగే వర్షపు నీటిని నిల్వ చేసేందుకు అవసరమైన రెయిన్వాటర్ హార్వెస్టింగ్ వ్యవస్థలు ఏర్పాటు చేయకపోవడం కూడా ట్రైబ్యునల్ పరిశీలనలో ఉన్న అంశంగా మారింది.

ఈ ఏడాది ఏప్రిల్లో దేశంలోని ఆరు ప్రధాన క్రికెట్ స్టేడియాలకు ఎన్జీటీ నోటీసులు జారీ చేసింది. పిచ్, మైదానాల నిర్వహణకు ఉపయోగిస్తున్న నీటి మూలం ఏమిటో వివరించాలని ఆదేశించింది.

మూడు స్టేడియాలపై మాత్రమే ఎందుకు నిషేధం?
విచారణలో భాగంగా కటక్లోని బరాబతి స్టేడియం సమాధానం ఇవ్వడానికి నాలుగు వారాల గడువు కోరింది. లక్నోలోని భారత్ రత్న అటల్ బిహారీ వాజ్పేయి ఏకానా స్టేడియం ఇప్పటికే తన వివరణ సమర్పించింది. ఢిల్లీలోని అరుణ్ జైట్లీ స్టేడియం కూడా సమాధానం ఇవ్వగా, అదనపు సమాచారం కోరుతూ CGWA మరోసారి సంప్రదించింది.

అయితే ముంబై, జైపూర్, రాయ్పూర్ స్టేడియాల నిర్వాహకులు పదేపదే నోటీసులు పంపించినప్పటికీ స్పందించలేదని పిటిషనర్ తరఫు న్యాయవాదులు ట్రైబ్యునల్ దృష్టికి తీసుకెళ్లారు. ఇప్పటికే జరిమానా విధించినప్పటికీ ఎలాంటి స్పందన రాకపోవడం తీవ్రంగా పరిగణించినట్లు తెలిపారు.

నీటి కొరత నేపథ్యంలో కఠిన వైఖరి
దేశంలోని అనేక ప్రాంతాలు తీవ్రమైన నీటి కొరతను ఎదుర్కొంటున్న సమయంలో బాధ్యతాయుతంగా వ్యవహరించాలని భావించిన ట్రైబ్యునల్, నోటీసులను నిర్లక్ష్యం చేయడాన్ని తీవ్రంగా తప్పుబట్టింది. నీటి సంరక్షణకు సంబంధించి అవసరమైన చర్యలు తీసుకోవాల్సిన స్టేడియాలు స్పందించకపోవడం ఆందోళనకరమని వ్యాఖ్యానించింది. ఈ నేపథ్యంలో మూడు స్టేడియాల్లో తదుపరి ఉత్తర్వులు వెలువడే వరకు ఎలాంటి క్రీడా కార్యక్రమాలు నిర్వహించకూడదని మధ్యంతర ఆదేశాలు జారీ చేసింది.

ఆగస్టు 17న తదుపరి విచారణ
ఈ కేసుపై తదుపరి విచారణను ఆగస్టు 17కు ట్రైబ్యునల్ వాయిదా వేసింది. అప్పటివరకు సంబంధిత స్టేడియాలు తమ వివరణలు సమర్పించి, భూగర్భ జలాల వినియోగం, వర్షపు నీటి సంరక్షణకు తీసుకుంటున్న చర్యలపై స్పష్టత ఇవ్వాల్సి ఉంటుంది.

పర్యావరణ పరిరక్షణ, నీటి వనరుల సంరక్షణ విషయంలో క్రీడా సంస్థలు కూడా బాధ్యతాయుతంగా వ్యవహరించాల్సిన అవసరం ఉందని ఈ కేసు మరోసారి గుర్తు చేస్తోంది.