అయ్యప్పస్వామి భక్తుల రద్దీని దృష్టిలో ఉంచుకుని దక్షిణ మధ్య రైల్వే ప్రత్యేక ఏర్పాట్లు చేస్తోంది. రెండు తెలుగు రాష్ట్రాల నుంచి కేరళలోని వివిధ స్టేషన్లకు ప్రత్యేక రైళ్లను నడిపిస్తోంది. ఈ క్రమంలో చర్లపల్లి నుంచి కేరళ మీదుగా కర్ణాటకలోని మంగళూరు వరకు ప్రత్యేక రైళ్లను ప్రవేశపెట్టనున్నట్లు అధికారులు ప్రకటించారు. క్రిస్మస్, నూతన సంవత్సర సీజన్లో ప్రయాణికుల రద్దీ అధికంగా ఉండటంతో ఈ ప్రత్యేక సర్వీసులు అందుబాటులోకి తీసుకొస్తున్నారు.
మండల కాలంలో లక్షల సంఖ్యలో అయ్యప్పస్వామి భక్తులు మాలధారణ చేసి శబరిమల యాత్రకు బయలుదేరుతుంటారు. దశలవారీగా యాత్ర సాగించే భక్తుల్లో ఎక్కువ మంది రైలు ప్రయాణానికే ప్రాధాన్యం ఇస్తారు. భక్తులకు సౌకర్యవంతమైన ప్రయాణం కల్పించాలనే ఉద్దేశంతో రైల్వే అధికారులు ప్రత్యేక రైళ్ల సంఖ్యను పెంచుతున్నారు. ఇప్పటికే విశాఖపట్నం నుంచి కొల్లం వరకు కూడా ప్రత్యేక రైళ్లు నడిపేందుకు ఈస్ట్ కోస్ట్ రైల్వే ఏర్పాట్లు చేస్తోంది.
పండుగ సీజన్లో పుణ్యక్షేత్రాలు, పర్యాటక ప్రాంతాలకు వెళ్లే ప్రయాణికుల సంఖ్య భారీగా పెరుగుతుంది. ఈ రద్దీని సమర్థంగా నిర్వహించేందుకు ప్రతి ఏడాది మాదిరిగానే ఈసారి కూడా ప్రత్యేక రైళ్లను ప్రవేశపెట్టారు. దీని వల్ల సాధారణ రైళ్లపై ఒత్తిడి తగ్గడమే కాకుండా, ప్రయాణికులకు సౌకర్యవంతమైన ప్రయాణం లభించనుంది.
రైల్వే షెడ్యూల్ ప్రకారం ఈ నెల 24, 28 తేదీల్లో రాత్రి 11:30 గంటలకు చర్లపల్లి నుంచి 07267, 07269 నంబర్ల ప్రత్యేక రైళ్లు బయలుదేరి మూడో రోజు తెల్లవారుజామున 6:55 గంటలకు మంగళూరుకు చేరుకుంటాయి. అలాగే ఈ నెల 26న ఉదయం 9:55కు మంగళూరు నుంచి బయలుదేరే 07268, 07270 రైళ్లు మరుసటి రోజు సాయంత్రం 5 గంటలకు చర్లపల్లికి చేరుకుంటాయి.
ఈ ప్రత్యేక రైళ్లు నల్గొండ, మిర్యాలగూడ, నడికుడి, పిడుగురాళ్ల, సత్తెనపల్లి, గుంటూరు, తెనాలి, చీరాల, ఒంగోలు, నెల్లూరు, పెరంబూరు, కాట్పాడి, జోలార్పేట, సేలం, ఈరోడ్, తిరుప్పూర్, పొదనూర్, పాలక్కాడ, షోరనూర్, తిరూర్, కోజికోడ్, వడకర, తలస్సేరి, కన్నూర్, కాసర్గాడ్ మీదుగా రాకపోకలు సాగిస్తాయి. ఈ సర్వీసులు అయ్యప్ప భక్తులతో పాటు పండుగ సీజన్ ప్రయాణికులకు కూడా ఎంతో ఉపయుక్తంగా ఉండనున్నాయి.
