Vijay: ఎన్డీటీవీ ఎగ్జిట్ పోల్స్ సంచలనం.. విజయ్ టీవీకే పార్టీకి 120 సీట్లు! కింగ్ మేకర్ కాదు.. కింగ్ కాబోతున్న విజయ్!
Vijay: హోరాహోరీగా సాగిన తమిళనాడు అసెంబ్లీ ఎన్నికల్లో అధికార ‘డీఎంకే’ పార్టీనే మళ్లీ అధికారంలోకి రానున్నట్లు మెజారిటీ ఎగ్జిట్ పోల్ ఫలితాలు వెల్లడించాయి. కానీ, ఎన్డీటీవీ-యాక్సిస్ మై ఇండియా సర్వే మాత్రం రాష్ట్రంలో పెను సంచలనం నమోదు కాబోతున్నట్లు వెల్లడించింది.
- డీఎంకే కూటమికి ఎన్డీటీవీ ఎగ్జిట్ పోల్స్ షాక్..
- Politics: సోమవారం వెలువడనున్న తుది ఫలితాలు..
Vijay: తమిళనాడు అసెంబ్లీ ఎన్నికల పోలింగ్ ముగియడంతో వెలువడిన ఎగ్జిట్ పోల్ ఫలితాలు రాష్ట్ర రాజకీయాల్లో తీవ్ర ఉత్కంఠను రేపుతున్నాయి. మెజారిటీ సర్వేలు అధికార డీఎంకే కూటమికే మరోసారి పట్టం కట్టినప్పటికీ, ఎన్డీటీవీ-యాక్సిస్ మై ఇండియా సర్వే మాత్రం ఊహించని విశ్లేషణను తెరపైకి తెచ్చింది. ప్రముఖ నటుడు విజయ్ స్థాపించిన 'తమిళ వెట్రి కళగం' (టీవీకే) తన తొలి ప్రయత్నంలోనే అధికార పక్షానికి ముచ్చెమటలు పోయిస్తూ కింగ్మేకర్గా లేదా ప్రధాన రాజకీయ శక్తిగా అవతరించబోతోందని ఈ సర్వే వెల్లడించింది. మొత్తం 234 స్థానాలకు గానూ టీవీకే ఏకంగా 98 నుంచి 120 సీట్లు గెలుచుకునే అవకాశం ఉందని, అదే సమయంలో డీఎంకే కూటమి 92-110 స్థానాలకే పరిమితం కావచ్చని అంచనా వేయడం రాజకీయ వర్గాల్లో పెను సంచలనంగా మారింది. అన్నాడీఎంకే కూటమి 22-32 సీట్లతో మూడో స్థానానికి పడిపోవచ్చని పేర్కొనడం ద్వారా దశాబ్దాలుగా కొనసాగుతున్న ద్రవిడ పార్టీల ఆధిపత్యానికి బ్రేక్ పడే సూచనలు కనిపిస్తున్నాయి.
రాష్ట్రంలోని ఇతర సర్వే సంస్థలు భిన్నమైన అంచనాలను వెలువరించాయి. పీపుల్స్ పల్స్ మరియు ప్రజా పోల్ వంటి సంస్థలు డీఎంకే కూటమికే స్పష్టమైన మెజారిటీ దక్కుతుందని ధీమా వ్యక్తం చేశాయి. ప్రజా పోల్ అంచనాల ప్రకారం డీఎంకే 148-168 స్థానాలతో భారీ విజయాన్ని నమోదు చేస్తుందని, విజయ్ పార్టీ ప్రభావం కేవలం 1-9 సీట్లకే పరిమితమవుతుందని పేర్కొంది. దీనికి భిన్నంగా కామాఖ్య అనలిటిక్స్ మాత్రం త్రిముఖ పోటీని అంచనా వేసింది. డీఎంకే, అన్నాడీఎంకేలతో పాటు టీవీకే కూడా 67-81 సీట్లు సాధిస్తుందని చెప్పడం ద్వారా విజయ్ క్రేజ్ ఓట్ల రూపంలో మారుతోందని విశ్లేషించింది. మరోవైపు జేవీసీ సర్వే మాత్రం అందరినీ ఆశ్చర్యపరుస్తూ అన్నాడీఎంకే కూటమి 128-147 స్థానాలతో అధికారంలోకి వస్తుందని జోస్యం చెప్పడం గమనార్హం.
మొత్తానికి తమిళ రాజకీయ ముఖచిత్రం ఇప్పుడు విజయ్ పార్టీ చుట్టూ తిరుగుతోంది. ఎన్డీటీవీ అంచనాలు నిజమైతే తమిళనాడులో సరికొత్త రాజకీయ శకం ప్రారంభం కావడమే కాకుండా, విజయ్ కింగ్ లేదా కింగ్మేకర్గా కీలక పాత్ర పోషించనున్నారు. కనిష్ఠంగా 98 సీట్లు వచ్చినా ఏ పార్టీ కూడా సొంతంగా ప్రభుత్వాన్ని ఏర్పాటు చేసే పరిస్థితి ఉండకపోవచ్చని విశ్లేషకులు భావిస్తున్నారు. ఈ నేపథ్యంలో సోమవారం వెలువడనున్న తుది ఫలితాలపై దేశవ్యాప్తంగా ఆసక్తి నెలకొంది. ఓటర్లు సంప్రదాయ ద్రవిడ పంథాలోనే వెళ్లారా లేక విజయ్ రూపంలో కొత్త మార్పును కోరుకున్నారా అనేది మరికొద్ది గంటల్లో తేలనుంది.
Be the first to react
