Tamil Nadu Politics: తమిళనాట విజయ్కు షాక్.. ప్రభుత్వ ఏర్పాటుకు మద్దతివ్వని డీఎంకే మిత్రపక్షాలు!
Tamil Nadu Politics: తమిళనాడు రాజకీయాల్లో సంచలనం సృష్టిస్తూ అసెంబ్లీ ఎన్నికల్లో అతిపెద్ద పార్టీగా అవతరించిన నటుడు విజయ్ నేతృత్వంలోని తమిళగ వెట్రి కళగం (టీవీకే) ప్రభుత్వ ఏర్పాటు మార్గంపై నీలినీడలు కమ్ముకున్నాయి.
- ప్రభుత్వ ఏర్పాటుకు అవసరమైన మెజారిటీకి 10 సీట్ల దూరంలో నిలిచిన పార్టీ..
- మద్దతుపై స్పష్టత ఇవ్వని డీఎండీకే అధినేత్రి ప్రేమలత విజయకాంత్..
Tamil Nadu Politics: తమిళనాడు అసెంబ్లీ ఎన్నికల్లో నటుడు విజయ్ నేతృత్వంలోని 'తమిళగ వెట్రి కళగం' (TVK) పార్టీ 108 స్థానాలు గెలుచుకుని అతిపెద్ద శక్తిగా అవతరించినప్పటికీ, ప్రభుత్వ ఏర్పాటు విషయంలో తీవ్ర ప్రతిష్టంభన ఎదురవుతోంది. రాష్ట్రంలోని మొత్తం 234 స్థానాలకు గానూ ప్రభుత్వ ఏర్పాటుకు అవసరమైన 118 సీట్ల మ్యాజిక్ ఫిగర్కు విజయ్ పార్టీ కేవలం పది స్థానాల దూరంలో నిలిచిపోయింది. ఈ కీలక తరుణంలో డీఎంకే కూటమిలోని మిత్రపక్షాలు విజయ్కు మద్దతిచ్చేందుకు ససేమిరా అంటుండటంతో రాజకీయ సమీకరణాలు ఆసక్తికరంగా మారాయి. ఎండీఎంకే ప్రధాన కార్యదర్శి వైగో ఈ అంశంపై స్పందిస్తూ, ఎన్నికల తర్వాత పొత్తులు మార్చే ప్రసక్తే లేదని, డీఎంకే కూటమిలోని ఏ పార్టీ కూడా టీవీకేకు మద్దతు ఇచ్చే ఆలోచనలో లేదని స్పష్టం చేశారు.
ఇదే అభిప్రాయాన్ని విదుతలై చిరుతైగల్ కట్చి (వీసీకే) నేత థోల్ తిరుమావళవన్ కూడా వ్యక్తం చేస్తూ, తామంతా లౌకిక రాజకీయ మార్గంలో సుదీర్ఘ కాలంగా కలిసి ప్రయాణిస్తున్నామని, టీవీకేకు మద్దతు ఇచ్చే అంశంపై ఇప్పటివరకు ఎలాంటి ఆలోచన చేయలేదని వివరించారు. మరోవైపు డీఎండీకే అధినేత్రి ప్రేమలత విజయకాంత్, విజయ్ను తమ ఇంటి బిడ్డగా అభివర్ణిస్తూ ఆయన గెలుపును అభినందించినప్పటికీ, రాజకీయ మద్దతుపై మాత్రం ఎటువంటి స్పష్టమైన హామీ ఇవ్వలేదు. డీఎంకే కూటమిలో ఉండి కేవలం ఒక్క స్థానానికే పరిమితమైన డీఎండీకే, కూటమి నేత స్టాలిన్ ఓటమి పాలుకావడంతో ప్రస్తుతం ఆ కూటమిలో గందరగోళ పరిస్థితులు నెలకొన్నాయని వ్యాఖ్యానించారు.
ఈ రాజకీయ అనిశ్చితి నేపథ్యంలో విజయ్ తన తదుపరి వ్యూహాలపై దృష్టి సారించారు. చెన్నైలోని పనైయూర్ కార్యాలయంలో కొత్తగా ఎన్నికైన ఎమ్మెల్యేలు మరియు పార్టీ ముఖ్య నేతలతో అత్యవసర సమావేశాన్ని ఏర్పాటు చేసి, మెజారిటీ నిరూపించుకోవడానికి గల అవకాశాలపై చర్చిస్తున్నారు. ఏ పార్టీ కూడా నేరుగా మద్దతు ప్రకటించని ఈ క్లిష్ట పరిస్థితుల్లో, ప్రభుత్వ ఏర్పాటు కోసం విజయ్ ఎలాంటి వినూత్న ఎత్తుగడలు వేస్తారనేది ఇప్పుడు తమిళనాట ఉత్కంఠ రేపుతోంది. ద్రవిడ పార్టీల ఆధిపత్యాన్ని సవాల్ చేస్తూ దూసుకొచ్చిన విజయ్, అధికార పీఠాన్ని దక్కించుకోవడంలో ఎదురవుతున్న ఈ అడ్డంకులను ఎలా అధిగమిస్తారో వేచి చూడాలి.
Be the first to react
