Vangalapudi Anitha: మదర్స్ డే వేడుకల్లో వృద్ధ మహిళలతో మమేకమైన హోం మంత్రి అనిత!
Vangalapudi Anitha: కృష్ణా జిల్లాలో ఆదివారం మాతృదినోత్సవ వేడుకలు ఎంతో ఆప్యాయంగా, భావోద్వేగభరితంగా జరిగాయి. రాష్ట్ర హోం మంత్రి వంగలపూడి అనిత పెనమలూరు మండలం గోశాల గ్రామంలోని బంధం వృద్ధ మహిళల ఆశ్రమాన్ని సందర్శించి అక్కడి వృద్ధ మహిళలతో కలిసి మదర్స్ డే వేడుకల్లో పాల్గొన్నారు.
బంధం ఆశ్రమంలో ఘనంగా మాతృదినోత్సవ వేడుకలు..
వృద్ధ మహిళల యోగక్షేమాలు అడిగి తెలుసుకున్న హోం మంత్రి..
కృష్ణా జిల్లాలో ఆదివారం మాతృదినోత్సవ వేడుకలు ఎంతో ఆప్యాయంగా, భావోద్వేగభరితంగా జరిగాయి. రాష్ట్ర హోం మంత్రి వంగలపూడి అనిత పెనమలూరు మండలం గోశాల గ్రామంలోని బంధం వృద్ధ మహిళల ఆశ్రమాన్ని సందర్శించి అక్కడి వృద్ధ మహిళలతో కలిసి మదర్స్ డే వేడుకల్లో పాల్గొన్నారు. కుటుంబ సభ్యులతో కలిసి ఆశ్రమానికి వచ్చిన మంత్రి అనిత, అక్కడి మహిళలతో ఎంతో స్నేహపూర్వకంగా మమేకమయ్యారు.
ఆశ్రమంలో ప్రత్యేకంగా ఏర్పాటు చేసిన కార్యక్రమంలో మంత్రి అనిత కేక్ కట్ చేసి మహిళలకు మాతృదినోత్సవ శుభాకాంక్షలు తెలిపారు. అనంతరం ఆశ్రమంలోని ఒక్కో మహిళను ఆప్యాయంగా పలకరిస్తూ వారి ఆరోగ్య పరిస్థితులు, యోగక్షేమాలను అడిగి తెలుసుకున్నారు. వృద్ధ మహిళలు కూడా మంత్రితో తమ అనుభవాలను పంచుకుంటూ ఆనందం వ్యక్తం చేశారు.
ఈ సందర్భంగా మంత్రి అనిత మహిళలకు చీరలను బహుకరించి సంతోషాన్ని పంచుకున్నారు. ఆమె రాకతో ఆశ్రమం మొత్తం ఆనంద వాతావరణంతో కళకళలాడింది. అక్కడి మహిళలు మంత్రికి ఆశీర్వాదాలు అందిస్తూ భావోద్వేగానికి గురయ్యారు.
ఈ సందర్భంగా మంత్రి అనిత మాట్లాడుతూ, “నిస్వార్థమైన ప్రేమకు నిలువుటద్దం అమ్మ. బిడ్డల ఎదుగుదల కోసం తన జీవితాన్నే ధారబోసే ప్రతి తల్లికి మాతృదినోత్సవ శుభాకాంక్షలు. సమాజ నిర్మాణంలో తల్లుల పాత్ర వెలకట్టలేనిది” అని పేర్కొన్నారు.
మాతృమూర్తుల పట్ల గౌరవం, ప్రేమను చాటేలా నిర్వహించిన ఈ కార్యక్రమం స్థానికులను ఆకట్టుకుంది. వృద్ధ మహిళలతో కలిసి మంత్రి అనిత గడిపిన సమయం అందరినీ హృదయానికి హత్తుకునేలా చేసింది.
Be the first to react
