Israel Iran Conflict: అగ్రరాజ్యం అమెరికాకు ఇరాన్ యుద్ధం ఊహించని రీతిలో భారంగా మారుతోంది. యుద్ధం మొదలై వారం కూడా గడవకముందే అమెరికా ప్రభుత్వం భారీగా నిధులను ఖర్చు చేసింది. అంతర్జాతీయ సమాచారం ప్రకారం, కేవలం ఆరు రోజుల్లోనే దాదాపు 11.3 బిలియన్ డాలర్లు అంటే మన భారతీయ కరెన్సీలో సుమారు రూ. 94,500 కోట్లు ఖర్చయ్యాయి. ఫిబ్రవరి 28న ఇజ్రాయెల్తో కలిసి అమెరికా ఈ దాడులు ప్రారంభించిన సంగతి తెలిసిందే. అయితే ఇంత తక్కువ సమయంలో ఇంత పెద్ద మొత్తంలో ప్రజల సొమ్ము ఖర్చు కావడం ఇప్పుడు చర్చనీయాంశంగా మారింది.
ముఖ్యంగా యుద్ధం మొదలైన మొదటి రెండు రోజుల్లోనే అమెరికా సైన్యం ప్రయోగించిన బాంబులు, క్షిపణుల విలువే దాదాపు రూ. 51,400 కోట్లుగా ఉంది. ఇవి కేవలం ఆయుధాల కోసం చేసిన ఖర్చులు మాత్రమేనని, క్షేత్రస్థాయిలో ఇతర సైనిక అవసరాలను లెక్కలోకి తీసుకుంటే ఈ అంకె ఐదు రెట్లు పెరిగే అవకాశం ఉందని విశ్లేషకులు భావిస్తున్నారు. వైట్హౌస్ అధికారులు సెనేటర్లతో జరిపిన అంతర్గత సమావేశంలో ఈ లెక్కలను బయటపెట్టినట్లు తెలుస్తోంది. యుద్ధం కొనసాగే కొద్దీ ఈ ఆర్థిక భారం అమెరికా ఆర్థిక వ్యవస్థపై తీవ్ర ప్రభావం చూపేలా కనిపిస్తోంది.
మరోవైపు, అమెరికా అధ్యక్షుడు ట్రంప్ ఈ యుద్ధం కోసం అదనపు నిధుల వేటలో పడ్డారు. యుద్ధం కేవలం ఇరాన్కే పరిమితం కాకుండా లెబనాన్ వరకు విస్తరించడం, ప్రపంచ దేశాల్లో ఇంధన ధరలు పెరగడం వంటివి పరిస్థితిని మరింత క్లిష్టతరం చేశాయి. దీనిని ఎదుర్కోవడానికి కాంగ్రెస్ నుంచి మరో 50 బిలియన్ డాలర్ల అదనపు బడ్జెట్ కోరాలని ట్రంప్ ప్రభుత్వం యోచిస్తోంది. అయితే ఇప్పటికే దేశ రక్షణ నిల్వలు తగ్గిపోతున్నాయని, ఆయుధాల సరఫరా కూడా డిమాండ్కు తగ్గట్టుగా లేదని ప్రతిపక్ష డెమొక్రాట్లు ఆందోళన వ్యక్తం చేస్తున్నారు.
యుద్ధం వల్ల ఆర్థిక నష్టమే కాకుండా ప్రాణ నష్టం కూడా భారీగా జరుగుతోంది. ఇప్పటివరకు అందిన నివేదికల ప్రకారం సుమారు 2,000 మంది ప్రాణాలు కోల్పోయారు. ట్రంప్ తన పర్యటనల్లో "మేము యుద్ధం గెలిచాం, కానీ పని పూర్తయ్యే వరకు అక్కడే ఉంటాం" అని గంభీరంగా ప్రకటిస్తున్నప్పటికీ, ఈ పోరాటం ఎప్పుడు ముగుస్తుందనే దానిపై ఎవరికీ స్పష్టత లేదు. యుద్ధం తర్వాత ఇరాన్ పరిస్థితి ఏంటి? అసలు ఈ దాడుల వల్ల అమెరికా సాధించేది ఏంటి? అనే ప్రశ్నలపై విపక్షాలు ప్రభుత్వాన్ని నిలదీస్తున్నాయి.
అమెరికా రక్షణ శాఖ ఉన్నతాధికారులతో ట్రంప్ వరుసగా సమావేశాలు నిర్వహిస్తుండటం చూస్తుంటే, యుద్ధ తీవ్రత మరింత పెరిగే సూచనలు కనిపిస్తున్నాయి. ఇది కేవలం ఇరాన్పై పట్టు కోసం జరుగుతున్న పోరాటమా లేక ప్రపంచ రాజకీయాల్లో మార్పుల కోసమా అన్నది పక్కన పెడితే, సాధారణ అమెరికా పౌరుల పన్నుల డబ్బు మాత్రం యుద్ధ జ్వాలల్లో కాలిపోతోంది. మున్ముందు ఈ ఖర్చు లక్షల కోట్లకు చేరుకున్నా ఆశ్చర్యపోనక్కర్లేదని ఆర్థిక నిపుణులు హెచ్చరిస్తున్నారు.
