తమిళనాడులో 108 సీట్లతో అతిపెద్ద పార్టీగా అవతరించిన టీవీకే..
విజయ్ మద్దతు ఇవ్వాలని కాంగ్రెస్ నిర్ణయించినట్లు ప్రకటన..
చెన్నై: తమిళనాడు రాజకీయాల్లో ఉత్కంఠభరిత పరిణామాలు చోటుచేసుకుంటున్నాయి. అసెంబ్లీ ఎన్నికల్లో ఏ పార్టీకి పూర్తి మెజారిటీ రాకపోవడంతో ప్రభుత్వం ఏర్పాటు ప్రశ్నార్థకంగా మారింది. ఈ నేపథ్యంలో 108 సీట్లతో అతిపెద్ద పార్టీగా అవతరించిన టీవీకే ప్రభుత్వం ఏర్పాటు దిశగా వేగంగా అడుగులు వేస్తోంది.
ప్రభుత్వ ఏర్పాటుకు అవసరమైన మ్యాజిక్ ఫిగర్ చేరేందుకు టీవీకేకు ఇంకా 10 సీట్లు అవసరమవుతున్నాయి. ఈ పరిస్థితిలో కాంగ్రెస్ పార్టీ విజయ్కు మద్దతు ఇవ్వాలని అధికారికంగా ప్రకటించడం కీలక మలుపుగా మారింది. ఐదు సీట్లు గెలిచిన కాంగ్రెస్ మద్దతుతో టీవీకే బలం 113కు చేరనుంది. అయినప్పటికీ మెజారిటీకి ఇంకా ఐదు సీట్లు అవసరం ఉంది.
ఇక టీవీకేకు ఇతర పార్టీల మద్దతు కూడా లభించే అవకాశాలు కనిపిస్తున్నాయి. అన్నాడీఎంకే కూటమిలోని పీఎంకే కూడా టీవీకే ప్రభుత్వానికి మద్దతు ఇవ్వనున్నట్లు సమాచారం. ఎన్నికల్లో నాలుగు సీట్లు గెలిచిన పీఎంకేతో పాటు సీపీఎం, సీపీఐ, వీసీకే, ఐయూఎంఎల్ పార్టీలు కూడా ముందుకు రావడంతో టీవీకే బలం 125 సీట్లకు చేరే అవకాశముంది. ఈ పరిణామాలు టీవీకే ప్రభుత్వ ఏర్పాటుకు బలమైన పునాది వేస్తున్నాయి.
ఇప్పటికే కొత్తగా ఎన్నికైన ఎమ్మెల్యేలతో చర్చలు కొనసాగిస్తున్న టీవీకే అధ్యక్షుడు విజయ్, ఈరోజు గవర్నర్ను కలవనున్నారు. ప్రభుత్వ ఏర్పాటుకు అవసరమైన మద్దతు వివరాలను సమర్పించే అవకాశముంది. అన్ని అనుకూలిస్తే, రేపే చెన్నైలో విజయ్ ముఖ్యమంత్రిగా ప్రమాణ స్వీకారం చేసే అవకాశం ఉందని రాజకీయ వర్గాలు భావిస్తున్నాయి. ఎన్నికల ఫలితాల తర్వాత వేగంగా మారుతున్న రాజకీయ సమీకరణాలు తమిళనాడు రాజకీయాలకు కొత్త దిశను సూచిస్తున్నాయి.
