- 30 రోజుల్లో షెడ్యూల్ ఇవ్వాల్సిందేనని ఆదేశం..
- Politics: ఆలస్యమైన ప్రాజెక్టులపై రేరా కొరడా..
Telangana: హైదరాబాద్ రియల్ ఎస్టేట్ రంగంలో నెలకొన్న కీలక వివాదంపై తెలంగాణ రియల్ ఎస్టేట్ రెగ్యులేటరీ అథారిటీ (TSRERA) ఒక చారిత్రాత్మకమైన మరియు సంచలన తీర్పును వెలువరించింది. నగరంలోని కొంపల్లి ప్రాంతంలో ఒక ప్రముఖ నిర్మాణ సంస్థ చేపట్టిన ప్రాజెక్టులో ఫ్లాట్లు కొనుగోలు చేసి మోసపోయామని బాధితులు దాఖలు చేసిన ఫిర్యాదుపై రేరా ఈ కీలక నిర్ణయం తీసుకుంది. రిజిస్టర్డ్ సేల్ అగ్రిమెంట్ లేకపోయినప్పటికీ, గణనీయమైన మొత్తంలో డబ్బు చెల్లించి ఫ్లాట్లను కేటాయించుకున్న కొనుగోలుదారులను 'అలాటీ'లుగానే పరిగణించాలని రేరా స్పష్టం చేసింది. నమోదు కాని ఒప్పందాలను సాకుగా చూపి వినియోగదారుల హక్కులను కాలరాయడం చట్టరీత్యా చెల్లదని, హోమ్బయర్ల ప్రయోజనాలను కాపాడాల్సిన పూర్తి బాధ్యత డెవలపర్లపైనే ఉందని ఈ తీర్పు ద్వారా తేల్చిచెప్పింది.
ఈ వివాదం వివరాల్లోకి వెళ్తే, సదరు ప్రాజెక్టులో 2020-22 మధ్య కాలంలో ఫ్లాట్లు బుక్ చేసుకున్న కొనుగోలుదారులకు రెండు, మూడేళ్లలో నిర్మాణం పూర్తి చేసి అప్పగిస్తామని డెవలపర్ హామీ ఇచ్చారు. అయితే ఐదేళ్లు గడిచినా నిర్మాణం పూర్తి కాకపోవడంతో పాటు, పనులు నత్తనడకన సాగుతుండటంతో బాధితులు రేరాను ఆశ్రయించారు. విచారణ సమయంలో డెవలపర్ వింత వాదనలు వినిపిస్తూ, అధికారిక సేల్ అగ్రిమెంట్లు లేని వారు అసలు అలాటీలే కాదని, మరికొందరు కేవలం పెట్టుబడిదారులు మాత్రమేనని పేర్కొన్నారు. అయితే, రేరా చట్టంలోని సెక్షన్ 2(d)ని ఉటంకిస్తూ తెలంగాణ రేరా ఈ వాదనలను నిర్ద్వంద్వంగా తోసిపుచ్చింది. డబ్బు చెల్లించిన రసీదులు, అలాట్మెంట్ పత్రాలు ఉన్న ప్రతి ఒక్కరూ చట్టబద్ధమైన కొనుగోలుదారులేనని స్పష్టం చేస్తూ, రిజిస్టర్డ్ ఒప్పందం లేకపోవడం వారి హక్కులకు అడ్డంకి కాదని తీర్పునిచ్చింది.
బాధితులకు తక్షణ ఊరట కలిగిస్తూ, సదరు ప్రాజెక్టును త్వరగా పూర్తి చేయాలని మరియు 30 రోజుల్లోగా దశలవారీ నిర్మాణ షెడ్యూల్ను కొనుగోలుదారులకు సమర్పించాలని రేరా డెవలపర్ను ఆదేశించింది. ముఖ్యంగా, అనుమతులు లేకుండా నిర్మించిన అంతస్తుల్లో ఫ్లాట్లు పొందిన వారికి ఎలాంటి అదనపు రుసుము వసూలు చేయకుండా 30 రోజుల్లోగా ప్రత్యామ్నాయ ఫ్లాట్లు కేటాయించాలని, అది సాధ్యం కాని పక్షంలో వారు చెల్లించిన మొత్తం సొమ్మును వాపసు చేయాలని ఆదేశాల్లో పేర్కొంది. బుకింగ్ సమయంలో ఇచ్చిన 36 నెలల గడువుకు చట్టపరమైన గుర్తింపు ఉంటుందని నొక్కిచెప్పడం ద్వారా, ఒప్పందాలను సాకుగా చూపి తప్పించుకోవాలనుకునే డెవలపర్లకు రేరా గట్టి హెచ్చరిక జారీ చేసింది.
